Malifalensi nga Nkhani za Unganu wa Umoyu Widu Wachikhristu Ndipuso Uteŵeti
MARCH 4-10
CHUMA CHAKUTULIYA M’MAZU NGAKU CHIUTA | AROMA 12-14
“Kumbi Kwanja Akhristu Anyidu Kung’anamuwanji?”
it-1 55
Chanju
Mazu ngakuti kwanja abali (mu Chigiriki, phi·la·del·phiʹa) ngalongo kuti munthu weyosi mumpingu wakhumbika kwanja anyaki. (Aro. 12:10; Ahe. 13:1; wonani so 1 Petu. 3:8.) Venivi vilongo kuti ŵanthu mumpingu akhumbika kwanjana ukongwa nge kuti mbanthu a banja limoza. Chinanga kuti tiziŵa kali kuti abali ndi azichi atanjana, kweni akhumbika kusazgiyaku chanju chawu.—1 Ate. 4:9, 10.
Mazu nga Chigiriki ngakuti phi·loʹstor·gos, ngang’anamuwa “kwanjana ukongwa.” Mazu ngenanga ngagwiriskikiya ntchitu asani akamba za ŵanthu wo atanjana kutuliya pasi pa mtima. Mazu nga Chigiriki ngakuyananaku nangu ngakuti sterʹgo, kanandi ngang’anamuwa chanju chakuwa nachu cho chiŵapu pakati pa ŵanthu a banja limoza. Wakutumika Paulo wanguchiska Akhristu kuti ayesesengi kuja ndi jalidu lenili. (Aro. 12:10) Paulo wangulongo so kuti mu mazuŵa ngakumaliya, ŵanthu azamuŵavi “chanju chakuwa nachu” (mu Chigiriki, aʹstor·goi) ndipu ŵanthu ŵenaŵa mbakwenere kubayika.—2 Timo. 3:3; Aro. 1:31, 32.
w09 10/15 8 ¶3
“Jani Mwachimangu ndi Ŵanthu Wosi”
3 Ŵerengani Aroma 12:17. Paulo wangukamba kuti tikhumbika cha kuweze asani ŵanthu atichitiya vinthu viheni. Kuvwiya ulongozgi uwu kungawovya so ukongwa asani ŵanthu anyaki mu banja lidu mbakaboni cha. Munthulumi pamwenga munthukazi yo ndi Kaboni wakhumbika cha kuweze mwakukamba pamwenga kuchita vinthu viheni. Palivi chamampha chechosi cho tingasaniya asani ‘tingaweze chiheni pa chiheni.’ Mumalu mwaki, venivi vingachitiska kuti vinthu vinangikiyi limu.
w07 7/1 24-25 ¶12-13
“Mungaweziyanga Cha Chiheni pa Chiheni ku Munthu Weyosi”
12Pa nkhani ya mo tingachitiya vinthu ndi Akhristu anyidu kweniso ŵanthu anyaki, Paulo wangukamba kuti: “Mungaweziyanga cha chiheni pa chiheni ku munthu weyosi.” Mazu yanga ngakoliyana ndi vo wangukambapu nyengu yinyaki kuti: “Tinkhani chinthu chiheni.” Kumbi munthu wangakamba kuti watinkha vinthu viheni uku waweze asani anyaki amunangiya? Kuchita viyo kungalongo kuti munthu yo we ndi chanju ‘chauryarya.’ Paulo wangukamba so kuti: “Ŵanaŵaniyani vinthu vo ŵanthu wosi ativiwona kuti vamampha.” (Aroma 12:9, 17) Kumbi mazu yanga tingangagwiriskiya wuli ntchitu?
13Mukalata yaki yakuluta kwa Akorinto, Paulo wangulemba vakukwaskana ndi masuzgu ngo akutumika angukumana nangu. Iyu wangulemba kuti: “Taja chinthu chakuwoneseka mubwalu lamasaza kucharu, kwa angelu, kweniso ku ŵanthu. . . . Asani atitinyoza, titumbika. Asani titombozgeka, tikunthiyapu mwakuzizipizga. Asani atitipusikiya, timuka mwakuzikira.” (1 Akorinto 4:9-13) Mazuŵa nganu napu, Akhristu auneneska aja nge ŵe mubwalu lamasaza ndipu ŵanthu awona vosi vo vitiŵachitikiya. Asani ŵanthu awona vinthu vamampha vo tichita chinanga kuti anyaki atitichitiya vinthu viheni, yiwu angakhumbisiska kuvwisiya uthenga wo tipharazga.—1 Peturo 2:12.
w12 11/15 29 ¶13
Mugowokiyanengi ndi Mtima Wosi
13 Nyengu zinyaki munthu yo ndi Mkhristu cha wangatinangiya. Asani ivi vachitika, isi tingamuwovya waka kuti waziŵi vo Bayibolu lisambiza. Wakutumika Paulo wangulemba kuti: “‘Asani murwani waku we ndi nja, mupaski chakurya, asani we ndi nyota, mupaski chakuti wamwi. Pakuti asani wachita viyo, umuwunjikiyengi maka ngamotu pamutu paki.’ Mungazomerezanga cha kuti chiheni chikuthereskeni, kweni lutirizgani kuthereska chiheni mwakuchita chamampha.” (Aro. 12:20, 21) Asani tilutirizga kuchita vinthu mwaulemu asani munthu watinangiya, vingawovya so ŵanthu anyaki kuti asinthi nkharu zawu ziheni. Munthu yo wakunangiyani wangasintha ndi kwamba kusambira Bayibolu asani mutimuvwisa kweniso asani mutimulongo lisungu. Kaya wasambirengi Bayibolu pamwenga cha, isi tikhumbika kuchita nayu vinthu mwaulemu kuti wajiwone yija nkharu yidu yamampha.—1 Petu. 2:12; 3:16.
Kufufuza Fundu Zakuzirwa za M’Bayibolu
lvs 76-77 ¶5-6
Mo Tingasankhiya Vakukondwesa
5 Vosi vo tichita pa umoyu widu, vikoliyana ndi vo tichita pakusopa Yehova. Paulo wangukonkhoskapu pa nkhani yeniyi kuti: “Mupereki maliŵavu nginu nge sembi yamoyu, yakupaturika kweniso yakuzomerezeka kwaku Chiuta.” (Aroma 12:1) Yesu nayu wangukamba so kuti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi, ndi nthazi zaku zosi.” (Mariko 12:30) Nyengu zosi tikhumba kupereka kwaku Yehova vinthu vamampha ukongwa. Asani Ayisirayeli apereka kwaku Yehova sembi ya nyama, yiwu akhumbikanga kupereka nyama yambula kalema. Chiuta wayilondiyanga cha nyama yeyosi yakalema. (Ŵalevi 22:18-20) Mazuŵa nganu napu, nyengu zinyaki kusopa kwidu kungaja kwambula kuzomerezeka kwaku Yehova. Kumbi venivi vingachitika wuli?
6 Yehova watitikambiya kuti: “Muje akupaturika, chifukwa ini nde wakupaturika.” (1 Peturo 1:14-16; 2 Peturo 3:11) Yehova wazomereza kusopa kwidu pijapija asani nkhwakupaturika pamwenga kuti nkhutuŵa. (Marangu 15:21) Kusopa kwidu kungaja kwakufipiskika asani tichita vo Yehova watinkha nge malusu ngaheni ngakugonana, chiwawa kweniso vamizimu. (Aroma 6:12-14; 8:13) Tingamuguŵisa ukongwa Yehova asani tikondwa ndi vinthu venivi. Vinthu ivi vingachitiska kuti kusopa kwidu kuje kwakufipiskika kweniso kwambula kuzomerezeka, ndipu vingatimbanyiza ubwezi widu ndi Yehova.
w08 6/15 31 ¶4
Fundu Zikulu Zakutuliya Mukalata Yakuluta kwa Aroma
13:1—Kumbi ŵaraŵara amazaza wo“ŵe mumalu mwawu akuzomerezeka ndi Chiuta” munthowa wuli? Akulamuliya a maboma “ŵe mumalu mwawu chifukwa akuzomerezeka ndi Chiuta” munthowa yakuti iyu ndiyu wakuŵazomereza kuti alamuliyengi. Tikamba viyo chifukwa Chiuta wanguziŵiya limu maulamuliru nganyaki ngo nganguzijapu pati pajumpha nyengu. Ukaboni wa nkhani yeniyi usanirika mu Mazu Ngaku Chiuta. Bayibolu lingukambiya limu va ŵanthu anyaki wo anguzija akulamuliya.
MARCH 11-17
CHUMA CHAKUTULIYA M’MAZU NGAKU CHIUTA | AROMA 15-16
“Gomezgani Yehova Kuti Wakupembuzgeni Kweniso Kuti Wakuwovyeni Kukunthiyapu”
“Liyani ndi Wo Aliya”
11 Lemba lo likamba za chitima chikulu cho Yesu wenga nachu Lazaro wati wafwa, ndimoza mwa malemba ngakuchiska ngo ngasanirika mu mazu ngakupembuzga ngaku Chiuta. Tizizwa cha ndi venivi chifukwa “vinthu vo vikulembeka kali, vikulembeke kuti vitisambizi, ndi chilatu chakuti tije ndi chilindizga chifukwa cha kukunthiyapu ndipuso kupembuzgika ndi Malemba.” (Aro. 15:4) Asani namwi mwe ndi chitima mungapembuzgika ndi malemba nge yanga:
▪ “Yehova wepafupi ndi akusweka mtima. Iyu wataska wo asuzgika mumtima.”—Sumu 34:18, 19.
▪ “Maŵanaŵanu ngati ngaŵa nganandi mumtima mwangu, imwi [Yehova] mungundipembuzga ndi kundichiska.”—Sumu 94:19.
▪ “Ambuyafwi, Yesu Khristu ndipuso Chiuta Awusefwi yo wangutiyanja ndi kutipembuzga kwamuyaya ndipuso kutipaska chilindizga chamampha mwakugwiriskiya ntchitu wezi ukulu, apembuzgi mitima yinu ndi kukuwovyani kuti muje akukho.”—2 Ate. 2:16, 17.
“Zomerezani Kuti Kukunthiyapu Kumalizi Kugwira Ntchitu Yaki”
5 Mupemphengi Yehova kuti wakupaskeni nthazi. Yehova ndi “Chiuta yo watitiwovya kuti tikunthiyengepu kweniso yo watitipembuzga.” (Aro. 15:5) Ndiyu pe yo wavwisa masuzgu ngidu, mo tivwiya mumtima ndipuso mo tikukuliya. Mwaviyo, iyu ndiyu wangatiwovya kuti tikunthiyengepu. Bayibolu likamba kuti: “Wo atimuwopa watiŵapaska vo akhumba, watiŵavwa asani apempha chovyu mwakuŵeyere ndipu watiŵataska.” (Sumu 145:19) Kweni kumbi Chiuta wamuka wuli asani titimupempha kuti watipaski nthazi kuti tikunthiyengepu?
w14 6/15 14 ¶11
“Uyanjengi Yehova Chiuta Waku”
11 Yehova ‘wapereka chilindizga cho chititipaska likondwa kweniso chimangu.’ (Aro. 15:13) Vo Chiuta walayizga vititiwovya kukunthiyapu mayeseru kuti tilutirizgi kuja ndi chivwanu chakukho. Akhristu akusankhika wo ‘agomezgeka mpaka nyifwa, apaskika chisoti chaumoyu wakuchanya.’ (Chivu. 2:10) Akhristu akugomezgeka wo alindizga kuzihara charu chapasi, azamulonde vitumbiku vambula kumala vo Chiuta walayizga mu Paradayisu. (Luka 23:43) Kumbi titingawona wuli malayizgu ngenanga? Kukamba uneneska, te ndi likondwa ndi chimangu kweniso titimuyanja ukongwa Chiuta yo watitipaska “mphasu yeyosi yamampha ndipuso yakufikapu.”—Yako. 1:17.
Kufufuza Fundu Zakuzirwa za M’Bayibolu
w89 12/1 24 ¶3
“Chanju Chinu Ntchauneneska”
Ŵanthu a mitundu yinyaki wo angwamba Chikhristu akhumbikanga kuwovya Akhristu anyawu wo angukumana ndi masuzgu. Kweniso yiwu ŵenga ndi “ngongoli” kwa Akhristu aku Yerusalemu. Tikamba viyo chifukwa uthenga wamampha wo anguvwa ungutuliya ku Yerusalemu kweniko. Paulo wangusachizga kuti: “Asani Akhristu Achiyuda angugaŵana chuma chawu chauzimu ndi ŵanthu amitundu yinyaki, ndikuti ŵanthu amitundu yinyaki ŵenaŵa akhumbika kuweza mwakuŵateŵete ndi vinthu vo ŵenavu.”—Aroma 15:27, The New English Bible.
it-1 858 ¶5
Kuziŵiya Limu Vakunthazi
Mesiya, pamwenga kuti Khristu, ndiyu wanguzija Mbewu yakulayizgika yo yichitiska kuti ŵanthu wosi arunji azilonde vitumbiku. (Aga. 3:8, 14) Mazu ngakuti “mbewu” ngazumbulika kakwamba Adamu ndi Heva ŵati agarukiya Chiuta mu Edeni, kweni pa nyengu iyi ndipu Abelu wechendaweku. (Chiya. 3:15) Yapa ndipu kwaja vyaka pafufupi 4,000 kuti “chisisi chakupaturika” chivumbuliki. Chisisi ichi chenga chakukwaskana ndi “mbewu” yaku Mesiya. Mwaviyo, chisisi ichi “chabisika kwa nyengu yitali ukongwa.”—Aro. 16:25-27; Aefe. 1:8-10; 3:4-11.
MARCH 18-24
CHUMA CHAKUTULIYA M’MAZU NGAKU CHIUTA | 1 AKORINTO 1-3
“Kumbi Ndimwi Munthu Wakucharu Pamwenga Munthu Wauzimu?”
Kumbi Kuja Munthu Wauzimu Kung’anamuwanji?
4 Chakwamba, tiyeni tiwoni mo munthu wakucharu waŵanaŵaniya. Ŵanthu akucharu aŵika maŵanaŵanu ngawu pa vinthu valiŵavu. Paulo wangukamba kuti ‘maŵanaŵanu ngenanga ndingu sonu ngagwira ntchitu mu ŵana ambula kuvwiya.’ (Aefe. 2:2) Maŵanaŵanu yanga ngachitiska ŵanthu kuti alondongi vo anyawu achita. Chifukwa chakuti yiwu aŵika maŵanaŵanu pa vinthu valiŵavu, anandi achita vinthu vo awona kuti vakwenere kwaku yiwu ndipu marangu ngaku Chiuta alivi nangu ntchitu. Munthu wakucharu kanandi waŵanaŵaniya ukongwa za kuja ndi katundu munandi ndipuso kutchuka. Kweniso iyu wawona kuti wanangwa waki ngwakukhumbika ukongwa kuluska chechosi.
5 Kumbi munthu wakucharu tingamuziŵa so wuli? Ŵanthu wo achita “ntchitu za liŵavu” ŵe mugulu la ŵanthu akucharu. (Aga. 5:19-21) Mukalata yakwamba yo Paulo wangulembe mpingu wa ku Korinto, wanguzumbuwamu vinthu vinyaki vo ŵanthu akucharu achita. Yiwu aseleriyapu asani ŵanthu ayambana, agaŵaniska ŵanthu, achiska anyawu kuti agaruki, atore anyawu kukhoti, atiŵatumbika cha wo alongozga ndipu awona kuti kurya ndi kumwa ndivu vakukhumbika ukongwa pa umoyu wawu. Asani wayeseka, munthu wakucharu waswera cha kuthera. (Nthanthi 7:21, 22) Yuda wangukamba za ŵanthu wo azamuŵavi “mzimu waku Chiuta.”—Yuda 18, 19.
Kumbi Kuja Munthu Wauzimu Kung’anamuwanji?
6 Nanga “munthu wauzimu” tingamuziŵa wuli? Munthu wauzimu wapambana ndi munthu wakucharu chifukwa iyu waŵanaŵaniya ubwezi waki ndi Chiuta. Ŵanthu wo atanja vinthu vauzimu ayesesa ‘kuyezga Chiuta.’ (Aefe. 5:1) Ivi ving’anamuwa kuti awona vinthu nge mo Yehova wativiwone. Yiwu awona kuti Chiuta waliku nadi. Mwakupambana ndi ŵanthu akucharu, ŵanthu auzimu achita vinthu mwakukoliyana ndi fundu zaku Yehova. (Sumu 119:33; 143:10) M’malu mwakuŵika maŵanaŵanu pa ntchitu za liŵavu, munthu wauzimu wayesesa kuja ndi “mijalidu yo mzimu utuzga.” (Aga. 5:22, 23) Kuti tivwisi umampha vo mazu ngakuti munthu wauzimu ngang’anamuwa, tiyeni tiŵanaŵaniyi chakuyeruzgiyapu ichi: Yo wachita malonda, ŵanthu atimukamba kuti munthu wabizinesi. Mwakuyanana ŵaka, yo watanja kusopa Chiuta, ŵanthu atimukamba kuti munthu wauzimu.
Kumbi Kuja Munthu Wauzimu Kung’anamuwanji?
15 Kumbi weyosi pakuyija wangamulondo wuli Khristu? Lemba la 1 Akorinto 2:16 likamba kuti tikhumbika kuja ndi “maŵanaŵanu ngaku Khristu.” Ndipu pa Aroma 15:5 pakamba za kuja ndi “maŵanaŵanu ngakuyanana ndi ngo Khristu Yesu wenga nangu.” Mwaviyo, kuti tije nge Khristu, tikhumbika kuziŵa mo iyu waŵanaŵaniya ndipuso mo wachitiya vinthu. Asani taziŵa, tikhumbika kumulondo. Yesu waŵanaŵaniya ukongwa ubwezi waki ndi Chiuta. Mwaviyo, asani tilondo Yesu, tija pa ubwezi ndi Yehova. Ndichu chifukwa chaki nkhwakukhumbika ukongwa kuja ndi maŵanaŵanu ngaku Yesu.
Kufufuza Fundu Zakuzirwa za M’Bayibolu
it-2 1193 ¶1
Zeru
Chifukwa cha zeru zaki, charu chingukana Khristu, mphasu yo Chiuta wangupereka ndipu chinguyiwona kuti njakupusa. Pa nyengu iyi, akulamuliya a charu ichi awonekanga kuti mbazeru kweni ŵenga ndi mtima uheni mpaka angufika ‘pakubaya Ambuya a unkhankhu.’ (1 Akori. 1:18; 2:7, 8) Kweni pavuli paki, Chiuta wanguvumbuwa kuti zeru za charu ichi zakupusa ndipu wangulengeska ŵanthu ŵawu azeru. Iyu wanguchita ivi mwakugwiriskiya ntchitu chinthu cho yiwu awonanga kuti ‘ntchakupusa chaku Chiuta.’ Kweniso wangugwiriskiya ntchitu ŵanthu wo awonekanga kuti ‘mbakupusa, akulopwa, kweniso ambula kuzirwa,’ kuti afiski khumbu laki lambula kusinthika. (1 Akori. 1:19-28) Paulo wangukumbusa Akhristu a ku Korinto kuti “zeru za mugonezi wunu [kweniso] zeru za akuwusa a mugonezi wunu” zimalengi. Zeru zo Paulo wakambanga yapa zenga chigaŵa cha uthenga wo wapharazganga cha. (1 Akori. 2:6, 13) Iyu wangutcheŵeska Akhristu a ku Kolose kuti angawiranga cha muchiŵana cha “zeru za ŵanthu kweniso uryarya waŵakaŵaka mwakukoliyana ndi mudawuku wa ŵanthu.”—Ako. 2:8; yeruzgiyani ndi mavesi 20-23.
w08 7/15 27 ¶6
Fundu Zikulu Zakutuliya Mumakalata Ngakuluta kwa Akorinto
2:3-5. Pa nyengu yo Paulo wapharazganga mu tawuni ya Korinto yo yenga likulu la masambiru nga zeru za ŵanthu, watenere kuti wafipanga mtima kuti wachitengi wuli kuti ŵanthu akopeki ndi uthenga waki. Kweni iyu wanguzomereza cha kuti mantha ngamutondekesi kufiska uteŵeti wo Chiuta wangumupaska. Mwakuyanana waka, nasi tingazomerezganga cha kuti vinthu vinyaki vititondekesi kupharazga uthenga wamampha wa Ufumu waku Chiuta. Tikhumbika kupempha Yehova kuti watiwovyi nge mo Paulo wanguchitiya.
MARCH 25-31
CHUMA CHAKUTULIYA M’MAZU NGAKU CHIUTA | 1 AKORINTO 4-6
“Chakutupisa Chimanavi Chitupisa Bulunga Losi la Fulawu Wakukasa”
it-2 230
Chakutupisa
Wakutumika Paulo wangukamba so vakukwaskana ndi chakutupisa pa nyengu yo wangukambiya mpingu wa ku Korinto kuti usezgi munthu yo wachitanga malusu ngaheni ngakugonana. Iyu wangukamba kuti: “Kumbi muziŵa cha kuti chakutupisa chimanavi, chitupisa bulunga losi la fulawu wakukasa? Tuzganipu chiŵandi chakali kuti muje chiŵandi chasonu, ndi chilatu chakuti muleki kutupisika. Pakuti kukamba uneneska, Khristu mbereri yidu ya Pasika, waperekeka kuŵa sembi.” Pavuli paki, wangulongo vo wang’anamuwanga wachikamba kuti “chakutupisa.” Wangukamba kuti: “Mwaviyo tiyeni tichiti phwandu lenili kwambula chakutupisa chakali pamwenga kwambula chakutupisa chiheni ndipuso chaubudi, kweni tichiti ndi chiŵandi chambula chakutupisa, chamampha ndi chauneneska.” (1 Akori. 5:6-8) Yapa Paulo wakambanga vo vachitikanga pa Phwandu la Ayuda la Viŵandi Vambula Chakutupisa lo lachitikanga pavuli pa Pasika. Chakutupisa chimanavi chingatupisa bulunga losi la fulawu wakukasa. Mwakuyanana waka, Yehova wangawona kuti mpingu wosi ngwakufipiskika asani ulekere munthu yo wachita malusu ngaheni ngakugonana. Yiwu akhumbikanga kuchitapu kanthu kuti atuzgepu “chakutupisa” pakati pawu, nge mo Ayisirayeli nawu ajaliyanga kwambula chakutupisa munyumba mwawu pa nyengu ya phwandu lenili.
it-2 869-870
Satana
Kumbi ‘kupereka munthu kwaku Satana kuti liŵavu laki linangiki’ kung’anamuwanji?
Pa nyengu yo Paulo wakambiyanga Akhristu a ku Korinto kuti achitepu kanthu pa nkhani ya munthu munyaki yo wagonananga ndi anyina, iyu wangukamba kuti: “Muperekeni kwaku Satana munthu waviyo kuti liŵavu laki linangiki.” (1 Akori. 5:5) Yapa Paulo walamulanga kuti munthu yo wasezgeki mumpingu, kung’anamuwa kuti akhumbikanga cha kuchitiya nayu vinthu limoza. (1 Akori. 5:13) Kumupereka kwaku Satana kung’anamuwa kumusezga mumpingu ndi kumutaya mucharu cho chilamulika ndi Satana. Nge mo “chakutupisa chimanavi” chitupisiya “bulunga losi la fulawu wakukasa,” munthu uyu yo wachitanga mijalidu ya “liŵavu,” watingi wachitiskengi kuti abali ndi azichi mumpingu atoliyeku jalidu laki. Mwaviyo, mpingu wakhumbikanga kunanga “liŵavu” laki mwakusezga munthu mwenuyu yo wachitanga ureŵi ndi anyina. (1 Akori. 5:6, 7) Mwakuyanana waka, Paulo wangupereka Hemenayo ndi Alekizanda mumanja mwaku Satana, chifukwa anguleka kukoleska chivwanu kweniso njuŵi yamampha, ndipu chivwanu chawu chingusweka nge sitima.—1 Timo. 1:20.
lvs 241, fundu yakukumaliya
Kusezga
Asani munthu wachita ubudi ukulu ndipu walapa cha kweniso wakana kulondo fundu zaku Yehova wangaja cha mumpingu. Munthu waviyo watenere kusezgeka. Tikhumbika cha kuchitiya limoza vinthu ndi munthu yo wasezgeka ndipu tikhumbika cha kukambiskana nayu. (1 Akorinto 5:11; 2 Yohane 9-11) Kusezga munthu yo wabuda kuvikiliya zina laku Yehova kweniso mpingu. (1 Akorinto 5:6) Kutovya so munthu yo wabuda kuti walapi ndi kuwere so kwaku Yehova.—Luka 15:17.
▸ Mutu 3, ndimi 19
Kufufuza Fundu Zakuzirwa za M’Bayibolu
w09 5/15 24 ¶16
Angelu “ndi Mizimu Yakuchita Uteŵeti Wakupaturika”
16 Akhristu wo ayeseka aja nge ‘chinthu chakuwoneseka mubwalu lamasaza kwa angelu.’ (1 Akori. 4:9) Angelu akondwa ukongwa asani tilutirizga kuja akugomezgeka kwaku Yehova. Kweniso akondwa ukongwa asani munthu yo wangubuda walapa. (Luka 15:10) Yiwu akondwa so ukongwa ndi vo azichi akugomezgeka achita. Bayibolu lilongo so kuti “munthukazi watenere kuja ndi chisimikizu pamutu waki chakulongo kuti watijithereska, chifukwa cha angelu.” (1 Akori. 11:3, 10) Angelu akondwa ukongwa asani awona anthukazi achikhristu kweniso ateŵeti wosi aku Chiuta wo achita vinthu mwakukoliyana ndi ndondomeku yo Yehova wakuŵika pa nkhani ya umutu. Venivi vitovya so ŵana aku Chiuta a kuchanya kuti akumbukengi kuti nawu akhumbika kuvwiya Yehova nyengu zosi.
it-2 211
Dangu
Dangu lo Angelu Akupaskika. Chinanga kuti angelu mbapachanya ukongwa kuluska taŵanthu, kweni avwiya marangu ngaku Chiuta. (Ahe. 1:7, 14; Sumu 104:4) Yehova walamula ndi Satana viyo ndipu nyengu yinyaki wangumukaniza kuchita vinthu vinyaki. (Jobu 1:12; 2:6) Mikayeli yo ndi mura wa angelu waziŵanga kweniso watumbikanga udindu waku Yehova nge Wakuyeruzga Mura. Pa nyengu yo wangupambana maŵanaŵanu ndi Dyaboli, iyu wangukamba kuti: “Yehova wakuchenyi.” (Yuda 9; yeruzgiyani ndi Zeka. 3:2.) Yehova Chiuta wakupaska Yesu Khristu mazaza kuti walamuliyengi angelu wosi. (Ahe. 1:6; 1 Petu. 3:22; Mate. 13:41; 25:31; Afi. 2:9-11) Ndichu chifukwa chaki Yesu wangulamula mungelu munyaki kuti wakapereki uthenga kwaku Yohane. (Chivu. 1:1) Kweniso pa 1 Akorinto 6:3, wakutumika Paulo wakamba za abali auzimu aku Khristu kuti azamuyeruzga angelu. Ivi vazamuchitika chifukwa yiwu azamuwovyana ndi Yesu pakuziyeruzga angelu aheni.