Malifalensi nga Nkhani za Unganu wa Umoyu Widu Wachikhristu Ndipuso Uteŵeti
OCTOBER 7-13
CHUMA CHAKUTULIYA MU MAZU NGAKU CHIUTA | YAKOBE 3-5
“Mugwiriskiyengi Ntchitu Zeru Zaku Chiuta”
Kumbi Mugwiriskiya Ntchitu “Zeru Yakutuwa Kuchanya” pa Umoyu Winu?
9 “Chakwamba njakutowa.” Mazu ngakuti kutowa ngang’anamuwa kuja wambula kufipiskika pamwenga wambula kalema, kubwalu ndi mumtima viyo. Bayibolu likamba kuti zeru zisere mumtima, kweni zeru zakutuliya kuchanya zingasere cha mumtima wa munthu yo we ndi maŵanaŵanu ngaheni, makhumbiru ngaheni kweniso vilatu viheni. (Nthanthi 2:10; Mateyu 15:19, 20) Kweni asani mtima widu ngwakutowa, kung’anamuwa vo munthu wambula kufikapu wangafiska kuchita, vingaŵa vambula kusuzga kuti ‘tituweku ku vinthu viheni ndi kuchita vinthu vamampha.’ (Sumu 37:27; Nthanthi 3:7) Kumbi mphakwenere cha kuti kutowa ndiku kuyambi kuzumbulika pa mijalidu ya zeru zakutuwa kuchanya? Kweniso, asani te akutowa cha mwakuliŵavu ndipuso mwauzimu, kumbi tingalongo wuli mijalidu yinyaki ya zeru zakutuwa kuchanya pa umoyu widu?
10 “Pavuli paki njachimangu.” Zeru yakutuwa kuchanya yititiwovya kuti tijengi pa chimangu ndi anyidu. Lenili ndi jalidu lo mzimu waku Chiuta utuzga. (Agalatiya 5:22) Tiyesesa kuleka kuchita vinthu vo vingatimbanyizga “chimangu cho chimanga pamoza” ŵanthu aku Yehova. (Aefeso 4:3) Kweniso tiyesesa kuweziyapu chimangu asani tapambana maŵanaŵanu ndi anyidu. Ntchifukwa wuli tikhumbika kuchita viyo? Bayibolu likamba kuti: “Lutirizgani . . . kuja mwachimangu, ndipu chanju chaku Chiuta ndi chimangu chaki vazamuja namwi.” (2 Akorinto 13:11) Asani tilutirizga kuja pa chimangu ndi anyidu, Chiuta wachimangu waŵengi nasi. Vo tichitiya abali ndi azichi, vingakwaska ubwezi widu ndi Yehova. Kumbi tingachita wuli kuti tijengi mwachimangu ndi anyidu nyengu zosi? Tiyeni tiwoni chakuyeruzgiyapu.
Kumbi Mugwiriskiya Ntchitu “Zeru Yakutuwa Kuchanya” pa Umoyu Winu?
12 “Njakoloŵa.” Kumbi mazu ngakuti njakoloŵa ngang’anamuwanji? Akaswiri anyaki a Bayibolu akamba kuti mazu nga Chigiriki chakwambiriya ngo ngafwatulika kuti “njakoloŵa” pa Yakobe 3:17 ngakusuzga kungafwatuliya. Akufwatuliya anyaki agwiriskiya ntchitu mazu ngakuti “njakufwasa,” “njakuzika,” kweniso “njakuŵanaŵaniya ŵanthu anyaki.” Mazu ngamumphata mu Bayibolu la Chingerezi la New World Translation ngalongo kuti mazu ngaki chayingu ngang’anamuwa “kuzomereza.” Kumbi tingalongo wuli kuti tigwiriskiya ntchitu zeru yakutuwa kuchanya yo njakoloŵa?
Kumbi Mugwiriskiya Ntchitu “Zeru Yakutuwa Kuchanya” pa Umoyu Winu?
14 “Njakunozgeka kuvwiya.” Mazu nga Chigiriki ngo ngafwatulika kuti “njakunozgeka kuvwiya” ngasanirika peposi cha mu Malemba nga Chigiriki Ngachikhristu. Malinga ndi vo kaswiri munyaki wa Bayibolu wangukamba, kanandi mazu yanga “ngagwiriskikiya ntchitu ndi asilikali.” Mazu yanga ngang’anamuwa “kukopeka mwambula kusuzga” ndipuso “kujithereska.” Munthu yo walongozgeka ndi zeru zakutuwa kuchanya waja wakunozgeka kuvwiya vo Malemba ngakamba. Iyu waja muvwa zaki cha yo wakana kulondo fundu zo zisuskana ndi vo iyu wakhumba. Mumalu mwaki, iyu wasintha mwaliŵi asani walonde ulongozgi wa mu Malemba wakulongo kuti wayamba kuchita vinthu viheni pamwenga kusankha uheni. Kumbi yimwi ŵanthu atikuziŵani ndi jalidu lenili?
“Njakuzaza ndi Lisungu Kweniso Vipasu Vamampha”
15 “Njakuzaza ndi lisungu kweniso vipasu vamampha.” Lisungu ntchigaŵa chakukhumbika ukongwa cha zeru yakutuwa kuchanya, chifukwa zeru yeniyi “njakuzaza ndi lisungu.” Wonani kuti mazu ngakuti “lisungu” kweniso “vipasu vamampha” ngazumbulikiya limoza. Mwaviyo, mphakwenere nadi kuti mazu yanga ngazumbulikiyi limoza, chifukwa kanandi mu Bayibolu mazu yanga ngakamba za kuŵanaŵaniya anyidu mwakuŵafipiya mtima. Venivi vichitiska kuti tiŵachitiyengi vinthu vamampha anyidu. Buku linyaki likamba kuti lisungu ling’anamuwa “kumuvwiya chitima munthu yo vamuchitikiya vinthu viheni ndi kuyesesa kuchitapu kanthu.” Mwaviyo, munthu yo we ndi zeru yakutuwa kwaku Chiuta waja cha wambula kukondwa, wambula kuŵanaŵaniya anyaki kweniso waziŵa ŵaka vinthu cha. Mumalu mwaki, waja wakukondwa, waŵanaŵaniya anyaki, kweniso wachitapu kanthu kuti waŵawovyi. Kumbi tingalongo wuli kuti tikuzaza ndi lisungu?
Kumbi Mugwiriskiya Ntchitu “Zeru Yakutuwa Kuchanya” pa Umoyu Winu?
18 “Njambula sankhu.” Zeru yakutuwa kwaku Chiuta yititiwovya kuti tileki kusankhana mtundu kweniso kumalikiya charu chidu. Asani tilongozgeka ndi zeru yeniyi, tiyesesengi kuti tileki kuja ndi jalidu lelosi lakwanjiya mumtima widu. (Yakobe 2:9) Tichita cha vinthu mwakwanjiya ŵanthu anyaki chifukwa cha masambiru ngawu, chuma chawu kweniso udindu wawu mumpingu. Kweniso titiŵayuyuwa cha abali ndi azichi mumpingu, chinanga kuti angawoneka kuti mbakusika. Asani Yehova watiŵalongo chanju chaki ŵanthu ŵenaŵa, nasi tikhumbika kuŵawona kuti mbakwenere chanju chidu.
19 “Njambula chinyengu.” Mazu nga Chigiriki ngakuti “chinyengu” ngatenere kuti ngakambanga za “munthu yo wachitanga masaza.” Mu nyengu yakali, Agiriki kweniso Aroma avwalanga vinthu kumasu kuti ŵanthu aleki kuŵaziŵa asani achita masaza. Mwaviyo, mazu nga Chigiriki ngakuti “chinyengu” nganguziyamba kugwiriskikiya ntchitu pakukamba za munthu yo wabisa umunthu waki pamwenga yo wapusisa ŵanthu. Chigaŵa chenichi cha zeru yakutuwa kwaku Chiuta chikwaska ŵaka mo tichitiya vinthu ndi abali ndi azichi ŵidu pe cha, kweni chikwaska so vo titiŵaŵanaŵaniya.
Kufufuza Fundu Zakuzirwa za mu Bayibolu
w08 11/15 20 ¶6
Fundu Zikulu za Mukalata Yakuluta Kwaku Yakobe ndi Kwaku Peturo
4:5—Kumbi ndi lemba nili lo Yakobe wanguliko mazu pa vesi ili? Yakobe wanguko mazu lemba lelosi cha. Kweni mazu ngakukambirika yanga ngatenere kuti ngatuliya mu fundu za mu malemba yanga: Chiyambo 6:5; 8:21; Nthanthi 21:10; kweniso Agalatiya 5:17.
w97 11/15 20-21 ¶8
Chivwanu Chititiwovya Kuti Tije Akufwasa Kweniso Kuti Tilimbikiyengi Kupemphera
8 Mbubudi kukamba vinthu viheni vakukwaskana ndi abali ndi azichi. (Yakobe 4:11, 12) Anyaki ajaliya ŵaka kunena Akhristu anyawu. Panyaki achita ivi chifukwa chakuti atijiwona kuti mbarunji ukongwa pamwenga atijikweza chifukwa chakuwona anyawu kuti mbakusika. (Sumu 50:20; Nthanthi 3:29) Mazu nga Chigiriki ngo ngafwatulika kuti ‘kunena’ ngang’anamuwa kutinkha, kukamba mwakukuskiyaku nkhani ya mubali widu pamwenga kukamba boza. Ivi visazgapu kuyeruzga mubali widu kuti vimuŵaŵi. Kumbi kuchita venivi kuyanana wuli ndi ‘kunyoza dangu kweniso kuyeruzga dangu’ laku Chiuta? Alembi ndi Afarisi ‘anguleka kugwiriskiya ntchitu dangu laku Chiuta.’ Mumalu mwaki, yiwu ayeruzganga mwakukoliyana ndi marangu ngawu ngo angupanga. (Mariko 7:1-13) Mwakuyanana ŵaka, asani tayeruzga mubali yo Yehova wamuyeruzga cha, kumbi ndikuti ‘tayeruzga dangu laku Chiuta’ cha? Kweniso, asani tichita viyo, kumbi tingalongo cha kuti tiwona kuti dangu laku Chiuta ndakupereŵera? Asani tiyeruzga mubali widu pa chifukwa chambula kuvwika, ndikuti tatondeka kufiska dangu lakuti tiyanjanengi.—Aroma 13:8-10.
OCTOBER 14-20
CHUMA CHAKUTULIYA MU MAZU NGAKU CHIUTA | 1 PETURO 1-2
“Muje Akupaturika”
Sembi Yaku Yesu Ndi “Mphasu Yakufikapu” Yakutuliya kwa Awusefwi
5 Kumbi tingalongo wuli kuti titanja zina laku Chiuta? Tingalongo mu vo tichita. Yehova wakhumba kuti tijengi atuŵa. (Ŵerengani 1 Peturo 1:15, 16.) Ivi ving’anamuwa kuti tisopengi Yehova pe kweniso timuvwiyengi ndi mtima wosi. Chinanga mphanyengu yo titombozgeka, tiyesesengi ndi mtima wosi kuchita vinthu mwakukoliyana ndi fundu zaki za urunji kweniso marangu ngaki. Asani tichita vinthu mwa urunji, ukweru widu uŵala ndipu venivi vichitisa kuti zina laku Chiuta likankhusiki. (Mate. 5:14-16) Nge ŵanthu a mijalidu yamampha, vo tichita vilongo kuti marangu ngaku Yehova ngamampha ndipu vo Satana wangukamba, vaboza. Chifukwa chakuti ndisi akubuda, tosi tinangisa kweni tilapa kutuliya pasi pa mtima ndipu tichita so cha vinthu vo vileka kutumbika Yehova.—Yere. 14:7.
lvs 77 ¶6
Mo Tingasankhiya Vakusangaluska
6 Yehova watitikambiya kuti: “Muje akupaturika, chifukwa ini nde wakupaturika.” (1 Peturo 1:14-16; 2 Peturo 3:11) Yehova wangazomereza kusopa kwidu pijapija asani nkhwakupaturika pamwenga kuti nkhwakutowa. (Marangu 15:21) Kusopa kwidu kungaja cha kwakutowa asani tichita vinthu vo Yehova watinkha nge malusu ngaheni ngakugonana, viwawa, pamwenga vakukwaskana ndi mizimu. (Aroma 6:12-14; 8:13) Tingamukwiyisa ukongwa Yehova asani tikondwa ndi vinthu venivi. Vinthu venivi vingachitiska kuti kusopa kwidu kuje kwakufipiskika kweniso kwambula kuzomerezeka kwaku Yehova ndipu vingachitiska kuti ubwezi widu ndi iyu umali.
Kufufuza Fundu Zakuzirwa za mu Bayibolu
w08 11/15 21 ¶10
Fundu Zikulu za Mukalata Yakuluta Kwaku Yakobe ndi Kwaku Peturo
1:10-12. Angelu akhumbisiskanga kulingizga ndi kuvwisa fundu zikuluzikulu za uneneska zo achimi aku Chiuta a munyengu yakali angulemba zakukwaskana ndi mpingu wakusankhika wachikhristu. Kweni vinthu venivi vinguziŵika umampha Yehova wati wayamba kuchita vinthu ndi mpingu. (Aefe. 3:10) Mwakuyanana ndi angelu, nasi tikhumbika kuyesesa kufufuza “vinthu vandimba vaku Chiuta.”—1 Akori. 2:10.
it-2 565 ¶3
Wakuwonere
Wakuwonere Mura Ukongwa. Viwoneka kuti mazu ngo nge pa 1 Peturo 2:25 ngakutuliya pa Yesaya 53:6, po pakamba za ŵanthu wo ŵenga ‘nge mbereri zakulanda.’ Pavuli paki Peturo wangukamba kuti: “Kweni sonu mwawere ku mliska kweniso wakuwonere maumoyu nginu.” Wakuwonere yo wakambika yapa watenere kuti ndi Yehova Chiuta, chifukwa ŵanthu wo Peturo wanguŵalembe kalata iyi angumuleka cha Khristu Yesu. Kuziya mwaku Yesu Khristu, ŵanthu ŵenaŵa ndipu awere kali kwaku Yehova Chiuta, yo ndi Mliska Mura Ukongwa. (Sumu 23:1; 80:1; Yere. 23:3; Ezeki. 34:12) Yehova ndiyu so wakuwonere, yo wayendere. (Sumu 17:3) Kuyendere (mu Chigiriki, e·pi·sko·peʹ) kungasazgapu cheruzgu cho iyu wapereka, nge po wanguchitiya ndi Yerusalemu mu nyengu ya akutumika yo wanguziŵa cha ‘nyengu yakumuyendere [mu Chigiriki, e·pi·sko·pesʹ].’ (Luka 19:44) Pamwenga kungazisa vitumbiku ku ŵanthu wo akankhuska Chiuta pa ‘zuŵa laki lakwendere [mu Chigiriki, e·pi·sko·pesʹ].’—1 Petu. 2:12.
OCTOBER 21-27
CHUMA CHAKUTULIYA MU MAZU NGAKU CHIUTA | 1 PETURO 3-5
“Umaliru wa Vinthu Vosi we Pafupi”
“Jani Masu Kuti Mungalekanga Cha Kuromba”
“MUNTHU munyaki yo wagwiranga ntchitu usiku wangukamba kuti: “Nyengu yo yisuzga ukongwa kuja masu usiku, nkhumatandakucha.” Mwambula kukayika, ŵanthu wo agwira ntchitu usiku wosi, angazomereza fundu yeniyi. Ndimu so viliri ndi Akhristu a mazuŵa nganu, chifukwa usiku wa mgonezi waku Satana, we kumatandakucha. (Aro. 13:12) Kugona pa nyengu yeniyi, nkhwakofya ukongwa! Mwaviyo, tikhumbika ‘kuŵa azeru’ ndi kuvwiya ulongozgi wa m’Malemba wakuti ‘tije masu kuti tingalekanga cha kuromba.’—1 Petu. 4:7.
w99 4/15 22 ¶3
Mo Mungaziŵiya Kweniso mo Mungamaliskiya Masuzgu ngo Ngatikutondekesani Kukuwa Mwauzimu
Pakumaliya, lutirizgani kukumbuka mazu ngakutcheŵesa ngo wakutumika Peturo wangukamba ngakuti: “Kweni umaliru wa vinthu vosi we pafupi. Mwaviyo, muŵanaŵanengi umampha ndipuso muje masu pa nkhani ya kupemphera. Chakukhumbika ukongwa ntchakuti muyanjanengi ukongwa, chifukwa chanju chiwundiya maubudi nganandi.” (1 Peturo 4:7, 8) Vingaŵa vambula kusuzga kuzomereza kuti vo ŵanthu anyaki anangisa kweniso vo isi taŵeni nasi tinangisa visere mumtima widu ndipuso mumaŵanaŵanu ngidu ndi kutitondekesa kukuwa mwauzimu. Satana waziŵa umampha venivi. Chiŵana chinyaki cho wagwiriskiya ntchitu nkhupatusa ŵanthu kweniso kuŵathereska. Mwaviyo, tikhumbika kubenekere maubudi ngenanga ndi chanju chakutuliya mumtima kuti tileki kumupaska ‘mpata Dyaboli.’—Aefeso 4:25-27.
Kulonde Alendu Nkhwakukondwesa Ndipuso Nkhwakukhumbika Ukongwa!
2 Peturo wanguchiska abali ŵaki kuti ‘alondiyanengi kwambula kudinginyika.’ (1 Petu. 4:9) Mazu ngo akungafwatuliya kuti “kulonde alendu,” mu Chigiriki ngang’anamuwa “kwanja, pamwenga kuchitiya lisungu ŵanthu ambula kuŵaziŵa.” Kweni Peturo wanguchiska abali ndi azichi kuti ‘alondiyanengi’ chinanga kuti aziŵananga kali kweniso achitiyanga vinthu limoza. Kumbi kuchita viyo kwaŵawovyanga wuli?
3 Kwaŵawovyanga kuti akoliyanengi. Ŵanaŵaniyani vo vinguchitikiyapu imwi. Kumbi munthu munyaki wakukudananipu kuti mukachezi kunyumba kwaki? Mutenere kuti mukumbuka vinthu vamampha vo vinguchitika pa nyengu iyi. Kweniso mwati mwadana abali ndi azichi a mumpingu winu kuti mukachezi nawu kunyumba kwinu, mutenere kuti mungwamba kukoliyana ukongwa. Nthowa yamampha yo tingaziŵiya abali ndi azichi, nkhuŵadaniya kunyumba kwidu kuti tizichezi nawu. Akhristu wo ŵengaku munyengu yaku Peturo, akhumbikanga kukoliyana chifukwa vinthu vingunangika ukongwa. Ndimu so viliri ndi Akhristu “mazuŵa [nganu] ngakumaliya.”—2 Timo. 3:1.
Kufufuza Fundu Zakuzirwa za mu Bayibolu
w13 6/15 23
Vo Akuŵerenga Afumba
Kumbi mazu nga pa 1 Peturo 3:19 ngakuti Yesu ‘wanguchipharazgiya mizimu yo yenga mujeri’ ngang’anamuwanji?
▪ Wakutumika Peturo wangukamba kuti mizimu yeniyi ndiyu “kali yenga yambula kuvwiya pa nyengu yo Chiuta walindizganga mwakuzizipizga mu nyengu yaku Nowa.” (1 Petu. 3:20) Yapa viwoneka kuti Peturo wang’anamuwanga angelu wo angusankha kukoliyana ndi Satana pakugakulukiya Yehova. Yuda wangukambapu za angelu wo “anguleka kusunga malu ngawu ngakwamba, kweni akusiya malu ngo ajangaku,” ndipu wangukamba kuti Chiuta “wakuŵamanga ndi simbi ndi kuŵajaliya kwamuyaya mu mdima wakuti bii kuti aziyeruzgiki pa zuŵa likulu.”—Yuda 6.
Kumbi angelu ŵenaŵa angulongo wuli kuti ŵenga ambula kuvwiya mu nyengu yaku Nowa? Chigumula chechendachitiki, angelu aheni ŵenaŵa anguvwala maliŵavu nga ŵanthu. Venivi vakoliyananga cha ndi khumbu laku Chiuta. (Chiya. 6:2, 4) Kweniso, angelu yaŵa agonananga ndi anthukazi. Venivi navu venga vamampha cha chifukwa Chiuta wanguŵalenga kuti achitengi viyo cha. (Chiya. 5:2) Chiuta wazamubaya angelu ambula kuvwiya ŵenaŵa pa nyengu yaki yakuŵikika. Malinga ndi vo Yuda wangukamba, pasonupanu angelu yaŵa ŵe “mu mdima wakuti bii,” ndipu munthowa yinyaki tingakamba kuti ŵe mujeri.
Kumbi Yesu wanguyipharazgiya zukwanji “mizimu yo yenga mujeri,” nanga wanguyipharazgiya wuli? Peturo wakulemba kuti venivi vinguchitika Yesu wati waja “so ndi umoyu mu mzimu.” (1 Petu. 3:18, 19) Wonani so kuti Peturo wangukamba kuti Yesu ‘wanguchipharazga.’ Peturo wangukamba mazu yanga nge kuti vachitika kali. Venivi vilongo kuti Yesu wangupharazgiya mizimu iyi, Peturo wechendalembi kalata yaki yakwamba. Viwoneka kuti Yesu wangupharazgiya mizimu yiheni iyi pati pajumpha nyengu kutuliya po wanguyuskikiya. Iyu wanguchipharazga vakukwaskana ndi chilangu cho mizimu yeniyi yenga pafupi kulonde. Iyu wangupharazga uthenga wa chilindizga cha, kweni wangupharazga uthenga wa cheruzgu. (Yona 1:1, 2) Yesu wati walongo kuti wenga ndi chivwanu kweniso wati wagomezgeka mpaka nyifwa yaki pavuli paki ndi kuyuskika, wangulongo kuti Dyaboli walivi nthazi paku iyu. Mwaviyo, penga pakuvwika kuti Yesu wapereki uthenga wa cheruzgu.—Yoha. 14:30; 16:8-11.
Kunthazi uku, Yesu wazamumanga Satana limoza ndi angelu ŵaki aheni ndipu wazakuŵaponya muchizenji. (Luka 8:30, 31; Chivu. 20:1-3) Angelu ambula kuvwiya ŵenaŵa ŵeche mumdima ukulu wauzimu mpaka po nyengu yazamukwaniya, ndipu cheruzgu chawu chakumaliya chifikengi kwambula kutondeka.—Chivu. 20:7-10.
w08 11/15 21 ¶8
Fundu Zikulu za Mukalata Yakuluta Kwaku Yakobe ndi Kwaku Peturo
4:6—Kumbi “uthenga wamampha ungupharazgika” ku “ŵanthu akufwa” naŵa? Wo akambika yapa mbanthu wo ‘akufwa chifukwa cha kunanga kwawu ndipuso maubudi ngawu,’ pamwenga kuti ŵanthu wo ŵenga akufwa mwauzimu, ŵechendavwi uthenga wamampha. (Aefe. 2:1) Pavuli paki ŵati agomezga uthenga wamampha, angwamba “kuja amoyu” mwauzimu.
OCTOBER 28–NOVEMBER 3
CHUMA CHAKUTULIYA MU MAZU NGAKU CHIUTA | 2 PETURO 1-3
“Lutirizgani Kukumbuka Kuŵapu kwa Zuŵa Laku Yehova”
w06 12/15 27 ¶11
Yehova ‘Wawonesesengi Kuti Urunji Wachitika’
11 Kumbi Yesu wang’anamuwanganji wachikamba kuti Yehova wawonesesengi kuti urunji wachitika “mwaliŵi”? Mazu ngaku Chiuta ngalongo kuti ‘chinanga kuti [Yehova] wazizipizga’ kwa nyengu yitali, kweni wawonesesengi kuti urunji wachitika mwaliŵi kweniso pa nyengu yakwenere. (Luka 18:7, 8; 2 Peturo 3:9, 10) Mu nyengu yaku Nowa, Chigumula chati chafika, chingupeya ŵanthu aheni wosi mwaliŵi. Mwakuyanana ŵaka, mu nyengu yaku Loti motu wo ungutuliya kuchanya ungubaya ŵanthu wosi aheni. Yesu wangukamba kuti: “Ndimu so vazamuŵiya pa zuŵa lo Mwana wa munthu wazamuvumbulika.” (Luka 17:27-30) Pa nyengu iyi so napu, “pharanyiku lamabuchibuchi” lazamuwiya ŵanthu wosi aheni. (1 Atesalonika 5:2, 3) Mwaviyo, te ndi chigomezgu kuti Yehova wazomerezengi cha kuti charu chaku Satana ichi chilutirizgi kuŵapu mpaka kujumpha zuŵa laki lakuŵikika.
w06 12/15 19 ¶18
“Zuŵa Likulu Laku Yehova le Pafupi”
18 Ndichu chifukwa chaki wakutumika Peturo watititcheŵeska kuti tikhumbika kulutirizga “kukumbuka kuŵapu kwa zuŵa laku Yehova”! Kumbi tingachita wuli venivi? ‘Kuja ndi nkharu yakupaturika kweniso kuchita vinthu vakulongo kuti te akujipereka kwaku Chiuta ndiyu nthowa yamampha yo tingalongore kuti tikumbuka kuŵapu kwa zuŵa laku Yehova.’ (2 Peturo 3:11, 12) Kuchita venivi nyengu zosi kungatiwovya kuti tilindizgengi ndi mtima wosi kuŵapu kwa “zuŵa laku Yehova.” Mu Chigiriki, mazu ngo akungafwatuliya kuti “kulutirizga kukumbuka” ngang’anamuwa “kuthaŵirizga.” Kukamba uneneska, tingayithaŵirizga cha nyengu yo yajaku kuti zuŵa laku Yehova lifiki. Kweni po tilindizga zuŵa lenili, vingawoneka kuti nyengu yitchimbiya ukongwa asani titangwanika mu ntchitu yaku Chiuta.—1 Akorinto 15:58.
Kufufuza Fundu Zakuzirwa za mu Bayibolu
w08 11/15 22 ¶2
Fundu Zikulu za Mukalata Yakuluta Kwaku Yakobe ndi Kwaku Peturo
1:19—Kumbi “nyenyezi ya thondu” ndiyani, yikutuwa zukwanji, nanga tiziŵa wuli kuti venivi vikuchitika nadi? “Nyenyezi ya thondu” yimiya Yesu Khristu yo ndi Fumu yanthazi. (Chivu. 22:16) Mu 1914, Yesu wanguwoneke pamasu pa chilengedu chosi kuti ndiyu Mesiya yo ndi Fumu ya Ufumu waku Chiuta, ndipu nyengu yeniyi yenga nge matandakucha nga zuŵa linyaki lasonu. Kusambuka kwaku Yesu kungulongo unkhankhu kweniso nthazi zo wenazu mu Ufumu waki, ndipu venivi visimikiziya kuti mazu nga uchimi waku Chiuta ngauneneska. Kungavwisa umampha mazu yanga kutiwovyengi kuvwisa vinthu. Vitiwovyengi so kusimikiziya kuti nyenyezi ya Thondu yikutuwa nadi.
w08 11/15 22 ¶3
Fundu Zikulu za Mukalata Yakuluta Kwaku Yakobe ndi Kwaku Peturo
2:4—Kumbi “Tatalasi” ntchinthu wuli, nanga angelu akugaruka akuponyekamu zukwanji? Tatalasi ndi jeri lo kukuŵikika vakulengeka vauzimu pe, ŵanthu cha. Ndi malu nga mdima ukulu ukongwa chifukwa chakuti maŵanaŵanu nga angelu ŵenaŵa nge kutali ndi khumbu laku Chiuta. Angelu wosi wo ŵe mu Tatalasi alivi chilindizga chechosi kunthazi. Chiuta wakuŵaponya mu Tatalasi angelu wosi ambula kuvwiya mu nyengu yaku Nowa, ndipu alutirizgengi kuja mwenimo mpaka po azamubayikiya.