Yehova Watiŵatumbika Wo Awere ku Charu Chawu

ABALI ndi azichi anandi wo kuvuli uku angutuwa ku vyaru vawu vikavu ndi kuluta ku vyaru vakukhupuka, akuwere ku vyaru vawu. Chifukwa chakuti atanja Yehova kweniso ŵanthu, yiwu akusamiya ku vigaŵa ko kukhumbika apharazgi anandi a Ufumu. (Mate. 22:37-39) Kumbi yiwu akusiya vinthu nivi, nanga Yehova waŵatumbika wuli? Kuti tisaniyi kwamuka, tiyeni tikambiskani va charu cha Cameroon.

“KUMALU NGAMAMPHA KO NDICHITA ‘ULOVI’ WA ŴANTHU”

Mu 1998, mubali munyaki zina laki Onésime wangusama ku charu chawu cha Cameroon. Iyu wanguja ku charu chinyaki kwa vyaka pafufupi 14. Zuŵa linyaki pa maunganu wanguvwa mubali wachikamba chakuyeruzgiyapu chakukwaskana ndi ntchitu yakupharazga. Mubali yo wangukamba nkhani wangukamba kuti “Tiyeruzgiyi kuti pe ŵanthu wo abaya somba ku malu ngakupambana. Kweni munyaki wabaya somba zinandi kuluska munyaki. Kumbi munthu yo wabaya somba zimanavi, wangatondeka kuluta ku malu ngo munyaki wabaya somba zinandi?”

Chakuyeruzgiyapu chenichi chinguchitiska kuti Onésime waŵanaŵaniyi zakuwere kwawu ku Cameroon ko ŵanthu anandi akhumba kusambira Bayibolu. Iyu wanguchita venivi kuti wakapharazgengi limoza ndi abali ndi azichi. Kweni iyu wafipanga mtima. Kumbi watingi wakaziŵiliyegi so kuja ku charu chaki, pavuli pakuja ku charu chinyaki kwa vyaka vinandi? Kuti waziŵi asani wangafiska, Onésime wanguluta kwawu ku Cameroon ndipu wanguchijaku kwa myezi 6. Pavuli paki, mu 2012 wanguziya limu ku Cameroon.

Onésime wangukamba kuti: “Ndakhumbikanga kuziŵiliya nyengu ya kufunda kweniso umoyu wa kunu. Ku Nyumba ya Ufumu ndakhumbikanga kuziŵiliya kuja so pa mipandu ya mathabwa.” Mwakukondwa iyu wangukamba so kuti: “Kweni asani ndivwisiya ukongwa pa maunganu, kamana ndi kamana ndaluwangaku kuti ndajanga pa mipandu ya wofuwofu.”

Mu 2013, Onésime wanguto Géraldine, yo wanguwere ku Cameroon pavuli pakuja ku France kwa vyaka 9. Kumbi banja lenili lingutumbikika wuli chifukwa chakuŵika khumbu laku Chiuta pa malu ngakwamba pa umoyu wawu? Onésime wangukamba kuti: “Ini ndi Géraldine tingusele Sukulu ya Apharazgi a Ufumu ndipu pavuli paki tingwamba kuteŵete pa Beteli. Mu chaka chimoza pe, ŵanthu akukwana 20 wo asambiranga Bayibolu mu mpingu widu angubatizika. Sonu ndiwona kuti nde kumalu ngamampha ko ndichita ‘ulovi’ wa ŵanthu.” (Mariko 1:17, 18) Géraldine nayu wangukamba so kuti: “Ndatumbikika ukongwa kuluska mo ndaŵanaŵaniyanga.”

KUSANIYA LIKONDWA MU NTCHITU YA KUSAMBIZA ŴANTHU

Judith wangusamiya ku United State kweni wakhumbisiskanga kuti wachitengi vinandi pakuteŵete Yehova. Iyu wangukamba kuti: “Peposi po ndalutiya kuchiwona ŵanthu a mu banja langu ku Cameroon, ndaliyanga chifukwa ndasiyanga ŵanthu anandi wo ndayambanga kusambira nawu Bayibolu.” Chinanga kuti venga viyo, Judith wakhumbanga cha kuwere kwawu. Iyu wagwiranga ntchitu ya ndalama zinandi ndipu zawovyanga kuti awisi ku Cameroon asaniyengi chovyu cha kuchipatala. Kweni chifukwa chakuti Judith wanguthemba Yehova, wanguwere kwawu ku Cameroon. Iyu wangukamba kuti watiwusoŵa umoyu wawofuwofu wo wenga nawu ku United States. Iyu wangupemphera kwaku Yehova kuti wamuwovyi kuti waziŵiliyi umoyu wasonu. Kweniso wakuwonere dera ndi muwolu waki angumuchiska ukongwa.

Judith wangukamba vo vinguchitika pa nyengu yo wanguwere ku Cameroon. Iyu wangukamba kuti: “Pa vyaka vitatu pe, ndingukondwa kovya ŵanthu kuti aje akusambira.” Judith wati wayirwa wangwamba kuteŵete nge mpayiniya wapade. Ndipu sonu wateŵete limoza ndi mulumu wali Sam-Castel, yo wateŵete nge wakuwonere dera. Nanga ndi vinthu wuli vo vinguchitikiya awisi aku Judith? Iyu ndi ŵanthu a mu banja laki, angufiska kusaniya chipatala mucharu chinyaki cho atingi afiskengi kulipira kuti awisi aŵachiti upaleshoni. Ndipu vakukondwesa kuti upaleshoni yo yingwenda umampha.

YEHOVA WATITIPHWERE

Mubali munyaki zina laki Victor wangusamiya ku Canada. Wati waŵerenga nkhani yo yenga mu Chigongwi cha Alinda, yo yakambanga va masambiru ngapachanya, wanguŵanaŵaniya sukulu yo wasambiranga. Iyu wanguleka masambiru ngaku yunivesite ndipu wangwamba kuchita kosi ya kanyengu kamanavi waka. Victor wangukamba kuti: “Venivi vinguwovya kuti ndisaniyi ntchitu mwaliŵi kweniso kuti ndifiski kuchita upayiniya wo ndawukhumbanga kwa nyengu yitali.” Pavuli paki, Victor wangutorana ndi Caroline. Yiwu anguluta ku Cameroon kuchiwona ŵanthu a mu banja laki. Ŵe kwenuku anguluta kuchiwona malu ku ofesi ya nthambi ndipu abali anyaki anguŵachiska kuti aŵanaŵaniyepu asani angafiska kuteŵete ku Cameroon. Victor wangukamba kuti: “Tengavi chifukwa chakukaniya. Ndipu chifukwa chakuti tajanga kali umoyu wambula kukhumba vinandi, tenga akunozgeka kuchita uteŵeti.” Chinanga kuti Caroline wenga ndi suzgu linyaki muliŵavu, kweni angusankha mbwenu kuti asami.

Victor ndi Caroline angulutirizga kuchita upayiniya wa nyengu zosi kuti awovyi ŵanthu anandi wo akhumbanga kusambira Bayibolu muchigaŵa chawu. Kwa kanyengu yiwu asunganga ndalama. Kweni pavuli paki anguwere so ku Canada ko anguchigwira ntchitu kwa myezi yimanavi, vo vinguŵawovya kuti awere so ku Cameroon ndi kuchilutirizga kuchita upayiniya. Kumbi yiwu angutumbikika wuli? Yiwu anguchisere Sukulu ya Apharazgi a Ufumu ndipu pavuli paki angwamba kuteŵete nge apayiniya apade. Ndipu sonu ateŵete mugulu la ntchitu zakuzenga. Victor wangukamba kuti: “Kuleka umoyu wawofuwofu wo tinguziŵiliya, vatiwovya kuwona kuti Yehova watitiphwere.”

TIKONDWA CHIFUKWA CHAKOVYA ŴANTHU KUTI AJIPEREKI KWAKU YEHOVA

Mu 2002, Alain, wasambiranga sukulu pa yunivesite yinyaki ku Germany. Iyu wanguŵerenga kapepala ka mutu wakuti, Achinyamata—Kodi Moyo Wanu Mudzaugwiritsa Ntchito Bwanji? Vo iyu wanguŵerenga vingumuchitiska kuti wasankhi so umampha vo wakhumba kuchita pa umoyu waki. Mu 2006, Alain wangusere Sukulu Yakusambiza Uteŵeti ndipu angumutumiza kuti wakateŵetiyengi ku charu chawu ku Cameroon.

Alain we ku Cameroon, wangusaniya ntchitu yo wagwiranga kwa mazuŵa ngamanavi pasabata. Pavuli paki, wangusaniya ntchitu ya ndalama zinandi. Kweni wafipanga mtima kuti yimutondekesengi kuti wamaliyengi nyengu yinandi mu uteŵeti. Mwaviyo, ŵati amukambiya kuti wateŵetiyengi nge mpayiniya wapade, wanguzomera nyengu yeniyo. Abwana ŵaki angumukambiya kuti amulipilengi ndalama zinandi kweni Alain wangukana ndipu wangulutirizga kuchita upayiniya. Pavuli paki, Alain wanguto Stéphanie yo wanguja ku France vyaka vinandi. Kumbi Stéphanie wangukumana ndi masuzgu wuli wati wasamiya ku Cameroon?

Stéphanie wangukamba kuti: “Ndingusanirika ndi matenda nganyaki muliŵavu kweniso vinthu vinyaki vandipatanga. Kweni kaŵikaŵi ndayesesanga kuluta ku chipatala ndipu ndingusaniya chovyu.” Banja ili lingutumbikika chifukwa cha kukunthiyapu. Alain wangukamba kuti: “Tati taluta kuchipharazga ku muzi wo we kuchigaŵa chakutali cho chidanika kuti Katé, tingusaniya ŵanthu anandi wo akhumba kusambira Bayibolu. Pavuli paki tati taweku, tasambiranga ndi ŵanthu ŵenaŵa mwakugwiriskiya ntchitu foni. Ŵanthu ŵaŵi wo tasambiranga nawu Bayibolu angubatizika ndipu kagulu kakutali kangupangika.” Stéphanie nayu wangukamba so kuti: “Palivi chinthu chakukondwesa ukongwa kuluska kovya ŵanthu kuti ajipereki kwaku Yehova ndi kubatizika. Kuteŵete kunu, kwatiwovya kusaniya likondwa lenili kananandi ŵaka.” Sonu, Alain ndi Stéphanie achita uteŵeti wakuwonere dera.

“TINGUCHITA VINTHU VO TAKHUMBIKANGA NADI KUCHITA”

Gisèle wangubatizika pa nyengu yo wasambiranga va udokotala ku Italy. Iyu wachiskikanga ndi banja linyaki lo lingumusambiza Bayibolu chifukwa lajanga umoyu wambula kukhumba vinandi ndipu lachitanga upayiniya. Mwaviyo, Gisèle wakhumbanga kuchita vinandi pakuteŵete Yehova. Iyu wangwamba kuchita upayiniya wa nyengu zosi we pafupi kumaliza masambiru ngaki.

Gisèle wakhumbanga kuwere kwawu ku Cameroon kuti wakachitengi vinandi pakuteŵete Yehova, kweni iyu wafipanga mtima. Iyu wangukamba kuti: “Ndakhumbikanga kuleka wanangwa wangu wo boma lingundipaska wakujaliya mucharu cha Italy. Kweniso ndakhumbikanga kulekana ndi mabwezi ngangu ndi ŵanthu a mu banja langu wo ajanga kwenuku.” Chinanga kuti venga viyo, mu May 2016, Gisèle wanguwere kwawu ku Cameroon. Pati pajumpha, nyengu Gisèle wangutolana ndi Léonce. Ndipu ofesi ya nthambi yaku Cameroon, yinguŵakambiya kuti asamiyi ku tawuni ya Ayos ko kwakhumbikanga apharazgi anandi a Ufumu.

Kumbi umoyu wenga wuli ku Ayos? Gisèle wangukamba kuti: “Kanandi kwa sabata yamphumphu kwajanga kwambula magesi ndipu mafoni ngajanga ngambula kutchaja. Ndipu kanandi ngagwiranga ntchitu cha. Ndingusambira kubika pa nkhuni ndipu tapinganga mawilubala kweniso tambulikiyanga matochi ndi usiku kuti tikatungi maji, asani ku chisimi kulivi ŵanthu anandi.” Kumbi ndi vinthu wuli vo vinguwovya kuti banja ili likunthiyepu? Gisèle wangukamba kuti: “Mzimu waku Yehova ndiwu ungutiwovya. Kweniso ini ndi mulumu wangu, tawovyananga chechosi. Ndipu ŵanthu a mu banja lidu kweniso mabwezi atichiskanga ndipu nyengu zinyaki atipasangaku ndalama.”

Kumbi Gisèle wakondwa chifukwa chakuti wakuwere kwawu ku Cameroon? Hinya! Iyu wangukamba kuti: “Pakwamba takumananga ndi masuzgu kweniso taguŵanga. Kweni tati tamalana ndi venivi, ini ndi mulumu wangu tinguwona kuti tinguchita vinthu vo takhumbikanga nadi kuchita. Titimuthemba Yehova ndipu te nayu pa ubwezi wakukho.” Léonce ndi Gisèle angusele Sukulu ya Apharazgi a Ufumu ndipu sonu achita upayiniya wapade wakanyengu.

Nge alovi wo akunthiyapu nyengu zakupambanapambana kuti abayi somba zinandi, ŵanthu wo awere kucharu chawu, asiya vinthu vinandi kuti awovyi ŵanthu a mtima wamampha wo akhumba kusambira uthenga wa Ufumu. Mwambula kukayika, Yehova watiŵaluwa cha apharazgi aphamphu ŵenaŵa, chifukwa cha chanju cho angulongo pa zina laki. (Nehe. 5:19; Ahe. 6:10) Asani mukusamiya ku charu chinyaki ndipu muwona kuti kucharu chinu kukhumbika apharazgi anandi a Ufumu, kumbi mungafiska kuwere ku charu chinu? Asani mungachita viyo, Yehova wakutumbikeningi ukongwa.—Nthanthi 10:22.