Vo Mungachita Kuti Muzije Mucharu Chifya

Nkhani zo zajumpha zalongo kuti pambula kuswera Chiuta watuzgengepu charu chiheni ichi kweniso masuzgu ngosi. Tisimikiza kuti venivi vichitikengi nadi. Chifukwa wuli? Chifukwa Mazu ngaku Chiuta, Bayibolu ngakulayizga kuti:

‘Charu chiluta.’ —1 YOHANE 2:17.

Tigomezga kuti pazamukuŵa ŵanthu anyaki wo azamutaskika chifukwa vesi ili lilayizga so kuti:

“Munthu yo wachita khumbu laku Chiuta, waŵengeku mpaka muyaya.”

Mwaviyo, kuti tizitaskiki tikhumbika kuchita khumbu laku Chiuta. Kuti tiziŵi khumbu laku Chiuta, chakwamba titenere dankha kumuziŵa.

‘KUZIŴA CHIUTA’ KUNGATIWOVYA KUZITASKIKA PO CHARU CHAZAMUMALIYA

Vithuzi: 1. Nesi waja pasi mu chipatala ndipu wavuka ukongwa kweniso watimbanyizgika. 2. Iyu wapumuwa kuti waryi chakurya ndipu wawona nesi munyaki wakondwa kuŵerenga magazini. 3. Nesi munyaki watimuŵerenge vesi la mu Bayibolu ndipuso wamupaska kadi lakuziŵisa ŵanthu va jw.org.

Yesu wanguti: “Azamusaniya umoyu wamuyaya asani aziŵa yimwi Chiuta yija wauneneska.” (Yohane 17:3) Kuti tizitaskiki ndi kuzija kwamuyaya, tikhumb ‘kuziŵa’ Chiuta. Ivi ving’anamuwa kuchita vinandi kuluska kuziŵa ŵaka kuti Chiuta waliku pamwenga kuziŵa fundu zimanavi zakukwaskana ndi iyu. Tikhumbika kuja nayu pa ubwezi. Kuti ubwezi widu ndi anyidu uje wakukho, titenere kusaniya nyengu yakucheze nawu. Ivi viyanana waka ndi kukholesa ubwezi widu ndi Chiuta. Wonani fundu zinyaki za uneneska zo tisambira mu Bayibolu, zo zingatiwovya kuja pa ubwezi ndi Chiuta ndipuso kulutirizga kuwukholesa.

Uneneska wo Tisambira mu Bayibolu

Tisambira kuti Chiuta wakhumba kuti tizije mu Paradayisu.

Iyu wangulenga ŵanthu akwamba, Adamu ndi Heva ndipu wanguŵaŵika mumalu ngakutowa ngo ngadanika kuti munda wa Edeni. Yiwu ŵenga akufikapu ndipu Chiuta wanguŵapaska chechosi cho akhumbikiyanga kuti akondwengi ndi umoyu. Yiwu atingi ajengi kwamuyaya. Asani angulutirizga kuja mabwezi ngaku Chiuta atingi afwengi cha. Kweni yiwu angusankha kuleka kuvwiya dangu lipusu lo Chiuta wanguŵapaska.

Tisambira chifukwa cho tisuzgikiya.

Chifukwa chakuleka kuvwiya Chiuta, munthu wakwamba Adamu wangutaya mwaŵi wakuja kwamuyaya, iyu kweniso ŵanthu wosi. Bayibolu likamba kuti: “Ubudi ukuselere mucharu kuziya mwa munthu yumoza, ndi nyifwa chifukwa cha ubudi, nyifwa nayu yikusapaliya ku ŵanthu wosi.” (Aroma 5:12) Nge mo munthu watole chilema kwa apapi ŵaki, ŵana wosi aku Adamu akuhara ubudi kutuliya kwaku iyu. Chifukwa cha venivi, tikota ndipuso kufwa.

Tisambira vo Chiuta wakuchita kuti watiwovyi.

Bayibolu likamba kuti: “Chiuta wakuchiyanja ukongwa charu, mwakuti wakupereka Mwana waki wapade, kuti weyosi yo wavwana mwaku iyu waleki kunangika, kweni waje ndi umoyu wamuyaya.” (Yohane 3:16) Chiuta wangutumiza Yesu pacharu chapasi kuti wazipereki umoyu waki mumalu mwaku isi. Pakukamba va chanju chenichi, munthulumi munyaki wa vyaka 86 zina laki Prabhakar wa ku India wanguti: “Ivi vilongo kuti Yehovaa watindiyanja ukongwa. Chanju chaki chandiwovya kuja ndi chilindizga cha umoyu wamuyaya.”

Tisambira mo tingalongore kuti tiwonga vo Chiuta wakutichitiya.

Bayibolu likamba kuti tingalongo kuti tiwonga vo Chiuta wakutichitiya asani ‘tisunga marangu ngaki.’ (1 Yohane 2:3) Mwachanju, Yehova Chiuta watilongo vo tingachita kuti tikondwengi ndi umoyu sonu. (Yesaya 48:17, 18) Chiuta wakhumba cha kuti tisuzgikengi. Iyu walayizga kuti asani tilondo ulongozgi waki tikondwengi ndi umoyu sonu pe cha, kweni tiŵengi so ndi mwaŵi wakuzija kwamuyaya.

MUŴERENGENGI BAYIBOLU ZUŴA LELOSI

Pa nyengu yakupumuwa nesi waŵerenga Bayibolu ndipu pavuli paki walereska kuchanya. — Mungazitaskika pa nyengu yo charu ichi chazamumaliya asani mupemphera kuti Chiuta wakuwovyeni kweniso asani muchita khumbu laki

Nyengu zosi titurya chakurya kuti tije ndi umoyu. Kweni Yesu wanguti: “Munthu wangaja ndi umoyu ndi chiŵandi pe cha, kweni ndi mazu ngosi ngakutuliya mumulomu mwaku Yehova.”—Mateyu 4:4.

Mazuŵa nganu, tisaniya mazu ngaku Yehova mu Bayibolu. Asani musambira buku lakupaturika lenili, muziŵengi uneneska wakuzirwa wakukwaskana ndi vo Chiuta wanguchita kuvuli, vo wachita sonu kweniso vo wazamuchita kunthazi.

MUPEMPHERENGI KWAKU CHIUTA KUTI WAKUWOVYENI

Kumbi mungachita wuli asani mukhumba kuvwiya marangu ngaku Chiuta kweni vitikusuzgani kuleka vinthu vo iyu wakamba kuti viheni? Asani ndi viyo, kuziŵa Chiuta kungakuwovyani ukongwa.

Wonani mo venge ndi munthukazi munyaki yo tamudana kuti Sakura, yo wachitanga jalidu la ureŵi. Iyu wati wayamba kusambira Bayibolu, wanguziŵa dangu laku Chiuta lakuti, “thaŵani ureŵi.” (1 Akorinto 6:18) Sakura wangupemphera kwaku Chiuta kuti wamupaski nthazi ndipu wanguleka jalidu liheni lenili. Kweni wakhumbikanga mbwenu kulimbana ndi mayeseru. Iyu wanguti: “Asani ndayamba kuŵanaŵana vakukwaskana ndi ureŵi, ndamukambiyanga uneneska wosi Yehova mupempheru, chifukwa ndaziŵanga kuti ndingalimbana navu cha pakundija. Pempheru landiwovya kundere pafupi ndi Yehova.” Mwakuyanana ndi Sakura, ŵanthu mamiliyoni nganandi amuziŵa Chiuta. Iyu watiŵapaska nthazi zo akhumbikiya kuti asinthi maumoyu ngawu ndi kuchita vinthu vo vitimukondwesa.—Afilipi 4:13.

Asani mwamuziŵa umampha Chiuta, ‘muziŵikengi so ukongwa ndi Chiuta,’ nge bwezi laki lakuzirwa. (Agalatiya 4:9; Salimo 25:14) Pavuli paki, muŵengi akwenere kuzitaskika ndi kuzisere mucharu chifya chaku Chiuta. Kweni kumbi charu chifya chenichi chazamukuŵa wuli? Nkhani yakulondopu yikonkhoskengi.

a Bayibolu likamba kuti zina laku Chiuta ndi Yehova.