Yimwi Mwatorana Ŵaka Sonu, Muŵikengi Mtima Pakuteŵete Yehova

1-2. (a) Ntchifukwa wuli ŵanthu wo atorana sonu akhumbika kuthemba Yehova? (Salimo 37:3, 4) (b) Kumbi tikambiskanengenji mu nkhani iyi?

KUMBI mwe pafupi kusere munthengwa pamwenga mwatorana pambula kuswera? Asani ndi viyo, tikayika cha kuti mukhumbisiska kukondwa ndi umoyu limoza ndi munthu yo mutimuyanja ukongwa. Kweni kukamba mwambula kuyeŵapu mani, munthengwa mwe masuzgu ngaki ndipu ŵanthu wo atorana waka sonu atenere kusankha vinthu vakukhumbika ukongwa. Mo muchitiya asani mwakumana ndi masuzgu kweniso vo musankha, vazamukwaska likondwa linu kwa vyaka vinandi. Asani muthemba Yehova, musankhengi vinthu mwazeru, nthengwa yinu yijengi yakukho ndipuso mukondwengi. Asani mutende maŵanaŵanu ngaku Chiuta cha, mwazamukumana ndi masuzgu ngo ngangazinanga nthengwa yinu ndipu mungazileka kukondwa.​—Ŵerengani Salimo 37:3, 4.

² Chinanga kuti nkhani iyi yalembeke wo atorana waka sonu, kweni yikonkhoskengi masuzgu ngo ngangakwaska nthengwa zosi. Yikonkhoskengi ukongwa vo tingasambira kwa anthulumi ndi anthukazi akugomezgeka wo azumbulika mu Bayibolu. Vakuwoniyapu vawu, vititisambiza fundu zo tingazigwiriskiya ntchitu mu vigaŵa vakupambanapambana va umoyu widu, kusazgapu munthengwa. Tiwonengi so vo tingasambira pa vo vachitikiya mabanja nganyaki nga mazuŵa nganu.

KUMBI ŴANTHU WO ATORANA SONU ANGAKUMANA NDI MASUZGU WULI?

3-4. Kumbi ŵanthu wo atorana sonu angakumana ndi masuzgu wuli?

³ Ŵanthu anyaki angachiska wo atorana sonu kuti ajengi umoyu wo ŵanthu anandi aja. Mwakuyeruzgiyapu, apapi kweniso abali ŵawu anyaki, angachichizga wo atorana waka kuti ayambi liŵi kubala ŵana. Pamwenga mabwezi nga pamtima ndipuso abali ŵawu akuliŵavu, angachiska wo atorana sonu kuti azengi pamwenga kugula nyumba yamampha ndi kuzazamu katundu wamampha.

⁴ Asani ŵanthu wo atorana waka sonu angaleka kuphwere, angasankha kuchita vinthu vo vingachitiska kuti asere mungongoli ya zani muziwoni. Asani vaŵa viyo, munthulumi ndi muwolu waki angayamba kugwira ntchitu kwa maora nganandi kuti awezi ngongoli. Ntchitu yeniyi, yingayamba kuŵaryiya nyengu yakuti asambiriyengi Bayibolu pakuŵija, achitengi kusopa kwa pabanja kweniso kupharazga. Yiwu angayamba kuja ku maunganu kuti achitengi ovatayimu ndi chilatu chakuti asaniyengi ndalama zinandi pamwenga kuti avikiliyi ntchitu yawu. Mwaviyo, yiwu angataya mwaŵi wakuchita vinandi pakuteŵete Yehova.

5. Kumbi mwasambiranji kwaku Klaus ndi Marisa?

⁵ Vo vachitikiyapu ŵanthu anyaki vilongo kuti tingakondwa cha asani tiŵika maŵanaŵanu ngidu pakusaniya vinthu vakuliŵavu. Tiyeni tikambiskani vo Klaus ndi Marisa angusambira pa nkhani yeniyi.b Ŵati atorana ŵaka, wosi ŵaŵi agwiranga ntchitu kwa maora nganandi kuti ajengi umoyu wapachanya. Kweni yiwu akhorwanga cha. Klaus wanguti: “Tenga ndi vinthu vinandi ukongwa vakuliŵavu kuluska vo takhumbikiyanga, kweni tengavi chilatu chechosi chauzimu. Kukamba uneneska, umoyu waki wenga wakukondwesa cha.” Panyaki namwi mwawona kuti kuŵika maŵanaŵanu pa kusaniya vinthu vakuliŵavu kwakuwovyani cha kuti mukhorwengi. Asani ndi viyo, kugongowa cha. Kuŵanaŵaniya vakuwoniyapu vamampha va ŵanthu anyaki, kungakuwovyani kuti musinthi. Chakwamba, tiyeni tikambiskani vo anthulumi akuto, angasambira kwa Fumu Yehosafati.

NGE FUMU YEHOSAFATI, NAMWI MUTHEMBENGI YEHOVA

6. Mwakukoliyana ndi ulongozgi wa pa Nthanthi 3:5, 6, kumbi Fumu Yehosafati yinguchita wuli yati yakumana ndi suzgu yikulu?

⁶ Yimwi anthulumi akuto, kumbi nyengu zinyaki mutijivwa kuti mwe ndi udindu ukulu ukongwa? Asani ndi viyo, mungayanduwa ndi chakuwoniyapu cha Fumu Yehosafati. Nge fumu, Yehosafati wenga ndi udindu wakuvikiriya mtundu wosi! Kumbi iyu wanguchita wuli kuti wafiski udindu ukulu wenuwu? Yehosafati wanguchita vosi vo wangafiska kuti wavikiliyi ŵanthu ŵaki. Iyu wanguzenga matawuni nga mipanda yakukho nga ku Yuda kweniso wanguwunganisa asilikali anthazi akujumpha 1,160,000. (2 Mbiri 17:12-19) Pavuli paki, Yehosafati wangukumana ndi suzgu yikulu. Chigulu cha asilikali Aamoni, Amowabu kweniso ŵanthu a kuchigaŵa chamapiri cha Seiri, chinguwofyeza Yehosafati, banja laki kweniso ŵanthu ŵaki. (2 Mbiri 20:1, 2) Kumbi Yehosafati wanguchita wuli? Iyu wangupempha Yehova kuti wamuwovyi kweniso kumupaska nthazi. Vo iyu wanguchita vingukoliyana ndi ulongozgi wazeru wo we pa Nthanthi 3:5, 6.  (Ŵerengani.) Pempheru lakujiyuyuwa laku Yehosafati lo le pa 2 Mbiri 20:5-12, lilongo kuti iyu waŵathembanga ukongwa Awisi achanju akuchanya. Kumbi Yehova wangumuka wuli pempheru laku Yehosafati?

7. Kumbi Yehova wangumuka wuli pempheru laku Yehosafati?

⁷ Yehova wangulongoro ndi Yehosafati kuziya mwa Mlevi munyaki zina laki Yahaziyeli. Yehova wangukamba kuti: “Muje ŵaka mumalu nginu, ndi kuma jo ndipu muwoni utaski waku Yehova wo waperekengi chifukwa chaku yimwi.” (2 Mbiri 20:13-17) Kukamba uneneska nkhondu achita viyo cha! Kweni ulongozgi uwu ungutuliya ku munthu cha, kweni kwaku Yehova. Yehosafati wanguvwiya ulongozgi wenuwu chifukwa chakuti wathembanga Chiuta waki ndi mtima wosi. Iyu ndi ŵanthu ŵaki, ŵati aluta kuchikumana ndi arwani, kunthazi kwa gulu laki lankhondu wanguŵikaku asilikali alusu ukongwa cha, kweni akumba sumu ambula vidya. Yehova wangufiska vo wangulayizga Yehosafati ndipu wanguthereska arwani ŵawu.​—2 Mbiri 20:18-23.

8. Kumbi anthulumi akuto, angasambiranji ku chakuwoniyapu chaku Yehosafati?

⁸ Yimwi anthulumi akuto, mungasambira ku chakuwoniyapu chaku Yehosafati. Mwe ndi udindu wakuphwere banja linu, ndichu chifukwa chaki mufwiyapu kuti muvikiriyi kweniso kuphwere banja linu. Asani mwakumana ndi masuzgu, mungawona nge kuti mungamalana nangu mwija. Kweni mungathembanga nthazi zinu cha. Mumalu mwaki, asani mwe kwakumwija, mupempherengi kwaku Yehova kuti wakuwovyeni. Ndipuso mupempherengi kutuliya pasi pa mtima limoza ndi muwolu winu. Mupenjengi ulongozgi wakutuliya kwaku Yehova mwakusambira Bayibolu kweniso mabuku ngo gulu laku Chiuta lititipaska, ndipu mugwiriskiyengi ntchitu ulongozgi wo mwasaniya. Anyaki angakoliyana navu cha vo musankha chifukwa chakuti mulondo fundu za mu Bayibolu ndipu angakukambiyani kuti mulivi zeru. Yiwu angakukambiyani kuti ndalama kweniso vinthu vo mungagula vingavikiriya banja linu. Kweni mukumbukengi chakuwoniyapu chaku Yehosafati. Iyu wathembanga Yehova ndipu wangulongo venivi kuziya mu vo wachitanga. Yehova wangumujowo cha munthu wakugomezgeka mwenuyu, ndipu namwi wakujowoningi cha. (Salimo 37:28; Ahe. 13:5) Kumbi ŵanthu akutorana angachita wuli kuti awonesesengi kuti wosi akondwa munthengwa yawu?

NGE MCHIMI YESAYA KWENISO MUWOLU WAKI, NAMWI MUWIKENGI MTIMA PAKUTEŴETE YEHOVA

9. Kumbi tingakambanji vakukwaskana ndi Mchimi Yesaya kweniso muwolu waki?

⁹ Mchimi Yesaya ndi muwolu waki, anguŵika maŵanaŵanu ngawu ngosi pakuteŵete Yehova. Yesaya wenga mchimi ndipu viwoneka kuti muwolu waki wenga ndi ntchitu za uchimi zo wagwiranga, chifukwa wadanikanga kuti “mchimi munthukazi.” (Yesa. 8:1-4) Nge banja, Yesaya ndi muwolu waki, kusopa Yehova akuŵikanga pakwamba pa umoyu wawu. Yiwu ntchakuwoniyapu chamampha ukongwa ku ŵanthu akutorana mazuŵa nganu!

10. Kumbi kusambira mauchimi nga mu Bayibolu kungaŵawovya wuli akutorana kuti akhumbisiskengi kuchita vinandi pakuteŵete Yehova?

¹⁰ Mazuŵa nganu napu, ŵanthu akutorana angaŵika mtima wawu pakuteŵete Yehova mwakuchita vosi vo angafiska pakumuteŵete. Yiwu angamuthemba ukongwa Yehova asani asambiriya limoza mauchimi nga mu Bayibolu ndi kuwona mo ngafiskikiya.c (Tito 1:2) Yiwu angaŵanaŵaniya vo angachita kuti afiskeku mauchimi nganyaki nga mu Bayibolu. Mwakuyeruzgiyapu, yiwu angawovya kufiska uchimi waku Yesu wakuti uthenga wamampha wazamupharazgika pacharu chosi chapasi umaliru wechendazi. (Mate. 24:14) Asani ŵanthu akutorana asimikiza kuti uchimi unyaki wa mu Bayibolu ufiskika, akhumbisiskengi kuchita vinandi pakuteŵete Yehova.

NGE PURISILA NDI AKULA, NAMWI MUŴIKENGI VINTHU VA UFUMU PAKWAMBA

11. Kumbi Purisila ndi Akula angufiska kuchitanji, nanga ntchifukwa wuli?

¹¹ Achinyamata yimwi mwatorana sonu, mungasambira kwaku Purisila ndi Akula, banja la Chiyuda lo lajanga mu tawuni ya Roma. Yiwu anguvwa uthenga wakukwaskana ndi Yesu ndipu anguja Akhristu. Tikayika cha kuti akondwanga ndi mo vinthu venge pa umoyu wawu. Kweni vinthu vinguŵasinthiya mwamabuchibuchi Fumu Kilaudiyo yati yalamula kuti Ayuda wosi atuwemu mu Roma. Wonani mo venivi vingukwaskiya Akula ndi Purisila. Yiwu akhumbikanga kuleka malu ngo anguziŵiriya, kusaniya nyumba yasonu ndipuso kuchiyamba so bizinesi yawu yakusona mahema kuchigaŵa cha sonu. Kumbi venivi vinguchitiska kuti yiwu aleki kuŵika vinthu va Ufumu pakwamba? Mutenere kuti muziŵa kwamuka kwa fumbu lenili. Ŵe kumuzi wawu wasonu ku Korinto, Akula ndi Purisila angwamba kovya mpingu wa kwenuku ndipu agwiriyanga ntchitu limoza ndi wakutumika Paulo pa kuchiska abali akwenuku. Pavuli paki, angusamiya ku matawuni ngo kwakhumbikanga apharazgi anandi. (Machi. 18:18-21; Aro. 16:3-5) Yiwu achitanga vinandi pakuteŵete Yehova kweniso akondwangapa umoyu wawu!

12. Ntchifukwa wuli ŵanthu akutorana akhumbika kuja ndi vilatu vauzimu?

¹² Akutorana mazuŵa nganu, angayezga Purisila ndi Akula mwakuŵika vinthu va Ufumu pakwamba. Nyengu yamampha ukongwa yo angakambiskiyana vo akhumba kuchita pakuteŵete Yehova, mphanyengu yo ŵe pa chibwezi. Asani ŵanthu akutorana atijiŵikiya vilatu vauzimu ndipu wosi afwiyapu kuti afiski vilatu venivi, angaŵa ndi mwaŵi ukulu wakuwona Yehova wachiŵawovya pa umoyu wawu. (Waku. 4:9, 12) Wonani vo vinguchitikiya Russell ndi Elizabeth. Russell wangukamba kuti: “Pa nyengu yo tenga pa chibwezi, takambiskananga ukongwa vo tazamuchita pakuteŵete Yehova.” Elizabeth wanguti: “Takambiskananga venivi kuti asani tazikhumba so kusankha vakuchita vinyaki, tiziwonesesi kuti vo tazamusankha pa nyengu yo, vingazitimbanyizganga cha kufiska vilatu vidu vauzimu.” Chifukwa cha mo vinthu venge ndi Russell kweniso Elizabeth, yiwu angufiska kusamiya ku Micronesia kuti akateŵetiyengi ko kwakhumbikanga apharazgi anandi.

13. Mwakukoliyana ndi Salimo 28:7, kumbi ndi vinthu wuli vo vingachitika asani tithemba Yehova?

¹³ Nge Russell ndi Elizabeth, ŵanthu anandi akutorana asankha kumaliya nyengu yawu yinandi pa ntchitu yakupharazga ndi kusambiza kwambula kutimbanyizgika ndi chechosi. Asani ŵanthu akutorana atijiŵikiya vilatu kuti ateŵete Yehova ndipu pavuli paki kuvifiskiya limoza, vinthu vitiŵayende umampha. Yiwu azamuwona mo Yehova watiŵaphwere, azakumuthemba ukongwa kweniso azamukuŵa ndi likondwa chayilu.​—Ŵerengani Salimo 28:7.

NGE WAKUTUMIKA PETURO NDI MUWOLU WAKI, NAMWI MUGOMEZGENGI MALAYIZGU NGAKU YEHOVA

14. Kumbi wakutumika Peturo ndi muwolu waki angulongo wuli kuti agomezganga layizgu la pa Mateyu 6:25, 31-34?

¹⁴ Ŵanthu akutorana angasambira so ku chakuwoniyapu cha wakutumika Peturo ndi muwolu waki. Pati pajumpha myezi pafufupi 6 kutuliya po wangukumana ndi Yesu, wakutumika Peturo wakhumbikanga kusankha chinthu chakukhumbika ukongwa. Peturo wachitanga ulovi kuti waphweriyengi banja laki. Mwaviyo, Yesu wati wadana Peturo kuti wamulondongi nyengu zosi, Peturo wakhumbikanga kuŵanaŵaniya banja laki pakusankha vakuchita. (Luka 5:1-11) Peturo wangusankha kwende limoza ndi Yesu pa ntchitu yakupharazga. Iyu wangusankha mwazeru! Ndipu te ndi chifukwa chakuvwika chakugomezge kuti muwolu waku Peturo wangukoliyana ndi vo mulumu waki wangusankha. Bayibolu lilongo kuti Yesu wati wayuskika, muwolu waku Peturo wangwende limoza ndi mulumu waki nyengu yinyaki. (1 Akori. 9:5) Tikayika cha kuti chifukwa chakuti wenga munthukazi wamampha wa Chikhristu, Peturo wenga ndi wanangwa wakulongoro wachipereka ulongozgi kwa anthulumi akuto kweniso anthukazi akuyirwa Achikhristu. (1 Petu. 3:1-7) Viwoneke limu kuti Peturo ndi muwolu waki, agomezganga layizgu laku Yehova lakuti waŵapaskengi vinthu vo akhumbikiya asani aŵika vinthu va Ufumu pakwamba pa umoyu wawu.​—Ŵerengani Mateyu 6:25, 31-34.

15. Kumbi musambiranji pa vo vinguchitikiya Tiago ndi Esther?

¹⁵ Asani pajumpha vyaka vimanavi kutuliya po mukutoriyana, kumbi mungachita wuli kuti mulutirizgi kuja ndi khumbu la kusazgiyaku uteŵeti winu? Nthowa yimoza yo mungachitiya venivi, nkhuziŵa vo vachitikiyapu mabanja nganyaki. Mwakuyeruzgiyapu, mungaŵerenga nkhani za mutu wakuti “Ateŵete Mwakukhumba Ŵija.” Nkhani izi, zinguwovya Tiago ndi muwolu waki Esther a ku Brazil, kuti aje ndi linweka la kuchiteŵete ko kukhumbika apharazgi anandi. Tiago wanguti: “Tichiŵerenga mo Yehova wanguwovye ateŵeti ŵaki a mazuŵa nganu, nasi takhumbanga kujiwone tija Yehova wachitilongozga kweniso kutiphwere.” Pakumaliya, yiwu angusamiya ku Paraguay ko aja achiteŵete muchigaŵa cho ŵanthu aŵereŵeta Chiphwitikizi kwambiya mu 2014. Esther wanguti: “Lemba lo titiliyanja ukongwa tosi taŵaŵi nda Aefeso 3:20. Kanandi, tawona mazu ngenanga ngachifiskika po titeŵete Yehova.” Mukalata yeniyi yo wangulembe Akhristu a ku Efeso, Paulo wangulayizga kuti Yehova watipaskengi vinandi kuphara vo tipempha. Layizgu ili lifiskika nadi!

16. Kumbi mabanja ngachinyamata ngangasaniya pani ulongozgi asani akhumba kuwona so vo akhumba kuchita pakuteŵete Yehova?

¹⁶ Mabanja ngachinyamata mazuŵa nganu, ngangayanduwa ndi vo vachitikiyapu ŵanthu wo athemba Yehova. Mabanja nganyaki ngangaŵa kuti ngaja ngachichita uteŵeti wanyengu zosi kwa vyaka vinandi. Mungachita umampha kuŵafumba ulongozgi asani mukhumba kuwona so vo mukhumba kuchita pakuteŵete Yehova. Yeniyi ndi nthowa yinyaki yakulongore kuti muthemba Yehova. (Nthanthi 22:17, 19) Ŵara nawu angawovya mabanja ngachinyamata kuti ngaje ndi vilatu vauzimu kweniso kuvifiska.

17. Kumbi ndi vinthu wuli vo vinguchitikiya Klaus ndi Marisa, nanga tisambiranji pa vo vinguŵachitikiya?

¹⁷ Kweni nyengu zinyaki vo tikhumba kuchita pakusazgiyaku uteŵeti widu, vingayenda nge mo isi tikhumbiya cha. Venivi ndivu vinguchitikiya Klaus ndi Marisa, wo taŵazumbuwa kukwamba. Yiwu ŵati aja munthengwa kwa vyaka vitatu, angusama kwawu ndipu angujipereka kuti akagwireku ntchitu yakuzenga ku ofesi ya nthambi ya ku Finland. Kweni yiwu anguziŵisika kuti mbakwenere cha kuja kwenuku kwa myezi yakujumpha 6. Pakwamba, yiwu anguguŵa. Kweni pati pajumpha nyengu yimanavi ivi vati vachitika, yiwu angudanika kuti akasere sukulu yakusambira chineneru cha Chiarabu ndipu sonu akondwa kuteŵete mucharu chinyaki, kuchigaŵa cho ŵanthu aŵereŵeta Chiarabu. Asani Marisa wakumbuka vo vinguchitika, iyu wakamba kuti: “Ndachitanga mantha kuchita chinthu cho ndechendachitepu ndipu ndakhumbikanga kuthemba Yehova ndi mtima wosi. Kweni ndaja ndichiwona mo Yehova watitiwovye nyengu zosi mu nthowa zo taŵanaŵanangaku cha. Chifukwa cha vo vatichitikiya, sonu nditimuthemba ukongwa Yehova.” Nge mo chakuwoniyapu ichi chilongore, mungasimikiza kuti Yehova wakutumbikeningi nyengu zosi asani mutimuthemba ndi mtima wosi.

18. Kumbi ŵanthu akutorana angachitanji kuti alutirizgi kuthemba Yehova?

¹⁸ Nthengwa ndi mphasu yakutuliya kwaku Yehova. (Mate. 19:5, 6) Iyu wakhumba kuti ŵanthu akutorana akondwengi ndi mphasu yeniyi. (Nthanthi 5:18) Yimwi mabanja ngachinyamata, mwalekiyanji kuwona so mo muchitiya vinthu pa umoyu winu? Kumbi muchita vosi vo mungafiska kuti mulongo kuti mutimuwonga ukongwa Yehova chifukwa cha mphasu yo wakupaskani? Kambiskanani ndi Yehova mupempheru. Fufuzani mu Mazu ngaki fundu zo mungazigwiriskiya ntchitu pa umoyu winu. Pavuli paki, londoni ulongozgi wo Yehova wakupaskani. Mungasimikiza kuti mukondwengi ndi umoyu kweniso vinthu vikuyendiyeningi umampha asani muŵika mtima winu pa kuteŵete Yehova!