Kumbi Muziŵa?
Ntchifukwa wuli penga pakwenere kuti Yehova wazomerezi Ayisirayeli kuti aperekengi njiŵa kweniso nkhunda nge sembi?
DANGU lazomerezanga kuti njiŵa kweniso nkhunda, viperekekengi nge sembi kwaku Yehova. Viyuni vosi viŵi venivi, nyengu zosi vazumbulikiyanga limoza mu marangu ngo ngakambanga vakukwaskana ndi sembi ndipu asani munthu walivi njiŵa, waperekanga nkhunda. (Levi. 1:14; 12:8; 14:30) Ntchifukwa wuli venivi venga vakwenere? Chifukwa chimoza ntchakuti njiŵa zasanirikanga nyengu zosi cha. Chifukwa wuli?
Njiŵa
Njiŵa ndi viyuni vo visama ndipu vija mucharu chosi cha Israel mu myezi ya kufunda. Mu mwezi wewosi wa October, visamiya kumwera ku vyaru vakufunda, ndipu viwere ku Israel asani chihanya chayamba waka. (Sumu ya. 2:11, 12; Yere. 8:7) Venivi ving’anamuwa kuti mu Isirayeli wakali, venga vakusuzga kuti Ayisirayeli apereki njiŵa nge sembi mu nyengu yakuzizira.
Nkhunda ya mujarawi
Kweni kanandi nkhunda zisama cha, mwaviyo zasanirikanga ku Isirayeli chaka chosi. Ndipuso fundu yinyaki njakuti, nkhunda zaŵetekanga. (Yeruzgiyani ndi Yohane 2:14, 16.) Mwakukoliyana ndi vo buku linyaki likamba, “ku Palesitina, mumizi kweniso mu matawuni, ŵanthu aŵetanga nkhunda. Munthu weyosi yo waŵetanga nkhunda, wajanga ndi chikutu pamwenga zenji pa chimati kuti zijengemu.”—Bible Plants and Animals.
Nkhunda ye muchikutu
Mwaviyo, Yehova wangulongo kuti ngwachanju kweniso waŵanaŵaniya ŵanthu chifukwa wanguzomereza Ayisirayeli kuti aperekengi sembi viyuni vo avisaniyanga mwambula kusuzga chaka chosi.