Kujambula Kungakuwovyani Kuti Mukumbukengi vo Mwasambira

Tanandi vititisuzga kukumbuka vinthu vo tasambira. Kweni vititisuzga cha kukumbuka vo Yesu wasambizanga chifukwa kanandi wagwiriskiyanga ntchitu ntharika ndipuso vakuyeruzgiyapu pakusambiza. Mungaŵanaŵaniya vinthu vo iyu wakambanga ndipu venivi vingakuwovyani kuti mukumbuki vo wasambizanga. Mwakuyanana ŵaka, mungakumbuka vo musambira asani muŵanaŵaniya vinthu vo muŵerenga. Kumbi mungachita wuli venivi? Mujambulengi vithuzi va vinthu vo musambira.

Ŵanthu wo ajambula vithuzi va vinthu vasonu vo asambira kanandi akumbuka vinthu vo asambira. Nthowa yeniyi yitiŵawovya kukumbuka mazu kweniso fundu zikuluzikulu zo asambira. Yiwu ajambula vinthu vakusuzga cha kweni ajambula waka vipusu. Ndipu kujambula vithuzi kutiŵawovya ukongwa ŵanthu akukota kuti akumbukengi vinthu vo asambira.

Pa ulendu unyaki wo musambirengi, mungazichita umampha kujambula vithuzi va vinthu vo musambira. Ndipu mwazamuzizwa ukongwa kuwona kuti mukumbuka vinthu vinandi ukongwa vo mwasambira!