NKHANI YAKUSAMBIRA YA NAMBALA 15
SUMU 30 Ada Ŵangu, Chiuta Wangu Ndipuso Bwezi Langu
‘Kundere Kufupi ndi Chiuta Ntchinthu Chamampha’ Kwaku Isi!
“Kweni kwaku ini, chinthu chamampha nkhundere kufupi ndi Chiuta.”—SALIMO 73:28.
FUNDU YIKULU
Munkhani iyi tiwonengi vo tingachita kuti tilutirizgi kuja pa ubwezi wakukho ndi Yehova kweniso vitumbiku vo tisaniya chifukwa chakuchita viyo.
1-2. (a) Kumbi munthu wakhumbika kuchitanji kuti waje pa ubwezi wakukho ndi munthu munyaki? (b) Kumbi tikambiskanengenji munkhani iyi?
KUMBI mwe ndi munyinu wakandayapa nani ndikandepu? Kumbi munguchita wuli kuti muje mabwezi nga pamtima? Mutenere kuti mwachezanga nayu ndipu munguziŵa vinthu vo wakumanapu navu pa umoyu, vo watanja ndipuso vo watinkha. Munguziŵa so kuti iyu we ndi mijalidu yamampha ukongwa yo mukhumbisiska kutoliyaku. Venivi vingukuchitiskani kuti muyambi kumuyanja ukongwa.
2 Kuti muje pa ubwezi wakukho ndi munthu munyaki mukhumbika kufwiyapu kweniso pakhumbika kuto nyengu. Venivi ndivu so munthu wakhumbika kuchita kuti waje pa ubwezi wakukho ndi Yehova Chiuta. Munkhani iyi tikambiskanengi vo tingachita kuti tilutirizgi kuja pa ubwezi wakukho ndi Chiuta widu. Kweni chakwamba, tiyeni tikambiskani dankha vitumbiku vo tisaniya asani te pa ubwezi wakukho ndi Yehova.
3. Ntchifukwa wuli tikhumbika kuŵanaŵaniya vitumbiku vo tisaniya asani te pa ubwezi wakukho ndi Yehova? Kambani chakuyeruzgiyapu.
3 Tikayika cha kuti namwi muziŵa kuti kuja pa ubwezi wakukho ndi Yehova nkhwamampha. Kweni kuŵanaŵaniya ukongwa vitumbiku vo tisaniya asani te nayu pa ubwezi kungatiwovya kuti tilutirizgi kuja nayu pa ubwezi wakukho. (Salimo 63:6-8) Mwakuyeruzgiyapu, tiziŵa kuti kurya chakurya chamagulu ngosi, kuchita maekisasayizi, kugona mwakukwana kweniso kumwa maji ngakukwana kutitiwovya ukongwa. Kweni ŵanthu anandi ativiŵanaŵaniya ukongwa cha vinthu venivi ndipuso atijiphwere cha kuti aje ndi liŵavu lanthazi. Kweni asani tiŵanaŵaniya ukongwa mo tiyanduliya asani titesesa kujiphwere, vitiwovyengi kuti tichitengi vinthu vo vingatiwovya kuti tije ndi liŵavu lanthazi. Mwakuyanana ŵaka, tingaziŵa kuti kuja pa ubwezi wakukho ndi Yehova nkhwamampha kweni kuŵanaŵaniya ukongwa vitumbiku vo tisaniya kungatiwovya kuti tilutirizgi kuja nayu pa ubwezi.—Salimo 119:27-30.
4. Nge mo pakambiya pa Salimo 73:28, kumbi wamasalimo wangukambanji?
4 Ŵerengani Salimo 73:28. Yo wangulemba Salimo 73 wenga Mlevi ndipu wangusankhika kuti wateŵetiyengi nge wakumba sumu panyumba yakusopiyamu yaku Yehova. Iyu watenere kuti wanguteŵete Yehova mwakugomezgeka kwa vyaka vinandi. Kweni wakhumbikanga kukumbuka kuti ‘kundere kufupi ndi Chiuta’ chenga chinthu chakukhumbika ukongwa kwaku iyu. Wakhumbikanga so kuwovya ŵanthu anyaki kuti aziŵi kuti kuja pa ubwezi wakukho ndi Chiuta nkhwakukhumbika ukongwa. Kumbi ndi vitumbiku vinyaki nivi vo tisaniya chifukwa chakuchita venivi?
‘KUNDERE KUFUPI NDI CHIUTA’ KUTITIWOVYA KUTI TIKONDWENGI
5. (a) Ntchifukwa wuli kuja pa ubwezi wakukho ndi Yehova kutitiwovya kuti tikondwengi? (b) Mwakukoliyana ndi Nthanthi 2:6-16, kambani vakuyeruzgiyapu vo vilongo mo zeru zaku Yehova zingakuwovyiyani kweniso kukuvikiliyani pa umoyu winu.
5 Asani te pa ubwezi wakukho ndi Yehova tikondwa ukongwa. (Salimo 65:4) Pe vifukwa vinandi vo tikondwe asani te pa ubwezi wakukho ndi Yehova. Mwakuyeruzgiyapu, tiyanduwa ukongwa asani tigwiriskiya ntchitu ulongozgi waki wazeru wo usanirika mu Mazu ngaki Bayibolu. Vo Yehova watitisambiza vititivikiliya ku vinthu vo vingatipweteka kweniso vititivikiliya kuti tileki kuchita ubudi. (Ŵerengani Nthanthi 2:6-16.) Ndichu chifukwa chaki Bayibolu likamba kuti: “Ngwakukondwa munthu yo wasaniya zeru kweniso munthu yo wasaniya kuwamu.”—Nthanthi 3:13.
6. Ntchifukwa wuli wamasalimo wanguleka kukondwa?
6 Mbuneneska kuti chinanga mbateŵeti aku Yehova nawu nyengu zinyaki aguŵa. Yo wangulemba Salimo 73 wanguleka kukondwa wati wayamba kuja ndi maŵanaŵanu ngambula kwenere. Iyu wangukwiya kweniso wangwamba kuchita sanji chifukwa chakuti wawonanga kuti ŵanthu aheni wo atoliyangaku kanthu cha kuti kwe Chiuta kweniso alondonga cha fundu zaki, vinthu vaŵayendiyanga umampha pa umoyu. Iyu wawonanga nge kuti ŵanthu ankhaza kweniso akujikuzga nyengu zosi ŵenga akukhupuka, ŵenga ndi liŵavu lanthazi kweniso akumanangapu ndi masuzgu cha. (Salimo 73:3-7, 12) Ndipu nyengu yinyaki, wamasalimo mwenuyu wangwamba kuŵanaŵana kuti kuteŵete Yehova nkhwambula phindu. Iyu wanguguŵa ukongwa, ndipu wangukamba kuti: “Nadi panu, ndatowesa mtima wangu paŵaka kweniso ndasamba mumanja paŵaka kuti nde wambula mulandu.”—Salimo 73:13.
7. Kumbi titenere kuchitanji asani taguŵa? (Wonaniso chithuzi.)
7 Kweni wamasalimo mwenuyu wanguzomereza cha kuti waleke limu kuteŵete Yehova chifukwa cha vinthu vo wanguguŵa navu. Mumalu mwaki, iyu wanguchitapu kanthu. Iyu wangusere “mumalu ngakupaturika ngaku Chiuta,” mo Yehova wangumuwovya kwamba so kuja ndi maŵanaŵanu ngakwenere. (Salimo 73:17-19) Asani taguŵa, Yehova yo ndi Mubwezi widu wa pamtima waziŵa venivi. Asani tamupempha kuti watilongozgi kweniso kuvwiya ulongozgi wo iyu watitipaska kuziya mu Mazu ngaki kweniso mu mpingu, vititiwovya kuti tisaniyi nthazi kuti tilutirizgi kumuteŵete chinanga kuti tingaguŵa. Chinanga mphanyengu yo tifipa mtima ukongwa, Yehova watitipembuzga kweniso watitisisipuwa.—Salimo 94:19.a
Mlevi yo wakulemba Salimo 73, wama “mumalu ngakupaturika ngaku Chiuta” (Wonani ndimi 7)
TIKHORWA NDI UMOYU KWENISO TIJA NDI CHILINDIZGA ASANI ‘TANDERE KUFUPI NDI CHIUTA’
8. Kumbi tiyanduwa wuli asani te pa ubwezi wakukho ndi Chiuta?
8 Kuja pa ubwezi wakukho ndi Chiuta nkhwamampha kwaku isi mu nthowa zinyaki ziŵi zakukhumbika ukongwa. Chakwamba, kutitiwovya kuti tikhorwengi ndi umoyu. Chachiŵi, kutitipaska chilindizga chamampha cha munthazi. (Yere. 29:11) Tiyeni tikambiskani vinthu viŵi venivi.
9. Kumbi kuja pa ubwezi wakukho ndi Yehova kutitiwovya wuli kuti tikhorwengi ndi umoyu?
9 Kuja pa ubwezi ndi Yehova kutitiwovya kuti tikhorwengi ndi umoyu. Ŵanthu anandi wo agomezga kuti kulivi Chiuta aŵanaŵana kuti umoyu ulivi phindu kweniso kuti nyengu yinyaki munthazi, pacharu pazamuŵavi munthu weyosi. Kweni kusambira Mazu ngaku Chiuta kutitiwovya kusimikiza kuti Chiuta “waliku nadi ndipuso wapereka mphotu ku ŵanthu wosi wo atimupenja ndi mtima wosi.” (Ahe. 11:6) Chinanga ndi sonu panu, tikondwa ndi umoyu chifukwa chakuti titeŵete Awusefwi akuchanya a Yehova. Ndipu chenichi ndichu chifukwa cho tikulengeke.—Doto. 10:12, 13.
10. Mwakukoliyana ndi Salimo 37:29, kumbi Yehova watiŵalayizganji ŵanthu wo atimugomezga?
10 Ŵanthu anandi awona kuti umoyu nkhamoza pe. Yiwu awona kuti cho angachita pa umoyu wawu nkhugwira ntchitu, kuto pamwenga kuyirwa, kubala ŵana kweniso kusunga ndalama zo zingaziŵawovya kujiphwere asani akota. Yiwu aziŵa cha vinthu vo Chiuta walayizga munthazi. Kweni ateŵeti aku Yehova agomezga kuti Chiuta waphwere ateŵeti ŵaki. (Salimo 25:3-5; 1 Timo. 6:17) Titimugomezga ukongwa Chiuta yo ndi mubwezi widu ndipu tigomezga vinthu vo watilayizga. Munthazi, tilindizga vinthu vamampha vinandi kusazgapu kuzimuteŵete kwamuyaya mu Paradayisu.—Ŵerengani Salimo 37:29.
11. Kumbi ntchinthu wuli cho chichitika asani te pa ubwezi wakukho ndi Chiuta, nanga iyu watuvwa wuli asani te nayu pa ubwezi?
11 Kuja pa ubwezi wakukho ndi Chiuta kutitiwovya so mu nthowa zinyaki zinandi. Mwakuyeruzgiyapu, Yehova walayizga kuti waŵagowokiyengi maubudi ŵanthu wo alapa wo ŵe nayu pa ubwezi. (Yesa. 1:18) Venivi vititiwovya kuti tilekengi kujimba mulandu chifukwa cha maubudi ngo tikuchitapu kuvuli. (Salimo 32:1-5) Kweniso Yehova wakondwa asani te nayu pa ubwezi. (Nthanthi 23:15) Kukamba uneneska mungaŵanaŵaniya vitumbiku vinyaki vinandi vo tisaniya chifukwa chakuja pa ubwezi wakukho ndi Chiuta. Kweni kumbi mungachita wuli kuti mulutirizgi kuja pa ubwezi wakukho ndi Chiuta?
VO VINGATIWOVYA KUTI TILUTIRIZGI ‘KUNDERE KUFUPI NDI CHIUTA’
12. Kumbi mwachita vinthu nivi kuti muje pa ubwezi wakukho ndi Chiuta?
12 Asani ndimwi Mkhristu wakubatizika, ndikuti mwe pa ubwezi kali ndi Yehova. Mukusambira vinthu vinandi vakukwaskana ndi Yehova Chiuta kweniso Yesu Khristu, mukulapa maubudi nginu, mukulongo kuti mwe ndi chivwanu mwaku Chiuta ndipuso mutesesa kuchita vinthu mwakukoliyana ndi khumbu laku Chiuta. Kweni kuti muje pa ubwezi wakukho ndi Chiuta mukhumbika kulutirizga kuchita vinthu venivi.—Ako. 2:6.
13. Kumbi ndi vinthu vitatu nivi vo vingatiwovya kuti tilutirizgi kuja pa ubwezi ndi Yehova?
13 Kumbi ntchinthu wuli cho chingatiwovya kuti tilutirizgi kuja pa ubwezi wakukho ndi Yehova? (1) Titenere kulutirizga kuŵerenga kweniso kusambira Bayibolu. Asani tisambira Bayibolu, titenere cha kuja ndi mtima wakukhumba ŵaka kusambira fundu zakukwaskana ndi Chiuta. Mumalu mwaki, tikhumbika kuŵanaŵaniya vo Chiuta wakhumba kuti isi tichitengi kweniso tilongozgekengi ndi fundu zaki zo zisanirika mu Mazu ngaki. (Aefe. 5:15-17) (2) Titenere kukholeska chivwanu chidu mwakuŵanaŵaniya ukaboni wo ulongo kuti Chiuta watitiyanja. (3) Titenere kulutirizga kutinkha vinthu vo Yehova watinkhana navu kweniso titenere cha kuchezanga ndi ŵanthu wo achita vinthu viheni.—Salimo 1:1; 101:3.
14. Mwakukoliyana ndi 1 Akorinto 10:31, kumbi ndi vinthu vinyaki nivi vo tingachita pa umoyu widu kuti tikondwesi Yehova? (Wonaniso vithuzi.)
14 Ŵerengani 1 Akorinto 10:31. Kuchita vinthu vo vikondwesa Yehova nkhwakukhumbika ukongwa. Tikhumbika kuchita vinandi kuluska kuluta ŵaka mu upharazgi kweniso ku maunganu. Vinthu vo tichita zuŵa lelosi navu vikondwesengi Yehova. Mwakuyeruzgiyapu, asani tichita vinthu mwauneneska nyengu zosi kweniso asani tipaskaku anyidu vinthu vo te navu tikondwesa Yehova. (2 Akori. 8:21; 9:7) Iyu wakhumba so kuti tilongongi kuti tiwonga mphasu ya umoyu wo wakutipaska. Tija pa ubwezi wakukho ndi Chiuta yo wakutipaska umoyu asani tileka kurya ukongwa pamwenga kumwa ukongwa kweniso asani tichita vinthu vo vingatiwovya kuti tilekengi kutamatama. Asani Yehova wawona kuti titesesa kuchita vinthu vo vitimukondwesa, chinanga mphatinthu timanatimana, vitovya kuti watiyanjengi ukongwa.—Luka 16:10.
Tingakondwesa Yehova asani titendesa galimotu mwakuphwere, titovya anyidu, tiphwere liŵavu lidu mwakuchita maekisasayizi kweniso asani titurya chakurya cha magulu ngosi (Wonani ndimi 14)
15. Kumbi Yehova wakhumba kuti tichitengi wuli vinthu ndi anyidu?
15 Yehova walongo lisungu laki ku ŵanthu arunji ndi ambula urunji. (Mate. 5:45) Mwaviyo, iyu wakhaza kuti nasi tichitengi venivi ndi anyidu. Mwakuyeruzgiyapu, titenere ‘kulongoro mwachimwaza cha kwaku weyosi pamwenga kupindana kweni tilongongi kuti te akuzika ku ŵanthu wosi.’ (Tito 3:2) Mwaviyo, titijiwona kuti te apachanya cha kuluska anyidu chinanga mbanthu wo aleka kuteŵete Yehova. (2 Timo. 2:23-25) Tija pa ubwezi wakukho ndi Yehova asani nyengu zosi tichita vinthu mwalisungu kweniso tiŵanaŵaniya anyidu.
TINGALUTIRIZGA ‘KUNDERE KUFUPI NDI CHIUTA’ CHINANGA TINGANANGISA VINTHU VINYAKI
16. Kumbi nyengu yinyaki yo wangulemba Salimo 73 wajiwonanga wuli?
16 Kweni wuli asani nyengu zinyaki mutijiwona kuti Yehova wangakuyanjani cha? Nge mo tawone, venivi ndivu vinguchitikiya yo wangulemba Salimo 73. Iyu wangukamba kuti: “Malundi ngangu nganguja kamanavi kulanda; maphazi ngangu nganguja kamanavi kuteremuka.” (Salimo 73:2) Iyu wangukamba yija kuti ‘mtima waki unguŵaŵa, wengavi zeru’ kweniso kuti wenga “nge chinyama chambula zeru” pamasu paku Yehova. (Salimo 73:21, 22) Kweni kumbi wajiwonanga kuti Yehova wangamuyanja so cha chifukwa cha maŵanaŵanu ngaheni ngo wenga nangu?
17. (a) Kumbi wamasalimo wanguchitanji pa nyengu yo wanguguŵa ukongwa? (b) Kumbi tisambiranji pa vo iyu wanguchita? (Wonaniso vithuzi.)
17 Asani wamasalimo wawonanga kuti Yehova wamujowo, ndikuti iyu wenga ndi maŵanaŵanu ngenanga kwa kanyengu kamanavi ŵaka. Viwoneka kuti pa nyengu yo wavwanga viyo, wanguziŵa kukhumbika kwa kuja pa ubwezi wakukho ndi Chiuta. Ndichu chifukwa chaki wangulemba kuti: “Kweni sonu nde ndi yimwi [Yehova] nyengu zosi; ndipu yimwi mwako janja langu lamaryi. Mutindilongozga ndi ulongozgi winu, ndipu pavuli paki mundilongozgiyengi ku unkhankhu.” (Salimo 73:23, 24) Nasi tikhumbika kupempha Yehova kuti watipaski nthazi asani talopwa pamwenga tigongowa chifukwa cha vo tingunangisa. (Salimo 73:26; 94:18) Chinanga kuti tinganangisa vinthu vinyaki vikulu, kweni tingawere kwaku Yehova kweniso tingasimikiza kuti iyu ‘ngwakunozgeka kugowoka.’ (Salimo 86:5) Ndipu titenere kuyesesa kuja pa ubwezi wakukho ndi Chiuta widu, ukongwa pa nyengu yo taguŵa ukongwa.—Salimo 103:13, 14.
Asani tiwona kuti talopwa mwauzimu, tikhumbika kupemphera kweniso kusanirika pa maunganu nyengu zosi kuti tije pa ubwezi wakukho ndi Yehova (Wonani ndimi 17)
LUTIRIZGANI ‘KUNDERE KUFUPI NDI CHIUTA’ MPAKA MUYAYA
18. Ntchifukwa wuli kusambira vakukwaskana ndi Yehova kulivi mphaka?
18 Kuja pa ubwezi ndi Yehova kweniso kusambira vakukwaskana ndi iyu kulivi mphaka. Bayibolu likamba kuti “palivi yo wangabowozga” nthowa zaku Yehova, kuziŵa vinthu kweniso zeru zaki.—Aro. 11:33.
19. Kumbi mazu nga mu Salimo ngatitisimikiziyanji?
19 Lemba la Salimo 79:13 likamba kuti: “Isi taŵanthu ŵinu kweniso mbereri za mu mskambu winu, tikuwongeningi mpaka muyaya; ndipuso tipharazgengi mazu ngakukuthamikani kutuwa mugonezi mpaka mugonezi.” Asani mulutirizga kuja pa ubwezi wakukho ndi Chiuta, namwi mungasimikiza kuti wakutumbikeningi mpaka muyaya ndipu mungakamba ndi mtima wosi kuti: “Chiuta ndiyu jalawi la mtima wangu, ndipuso chigaŵa changu mpaka muyaya.”—Salimo 73:26.
SUMU 32 Jani ku Chigaŵa Chaku Yehova
a Ŵanthu anyaki wo asuzgika maŵanaŵanu, wo afipa mtima ndipuso wo aguŵa kwa nyengu yitali angakhumbika kuchikumana ndi dokotala kuti waŵawovyi. Kuti muziŵi vinandi pa nkhani yeniyi wonani Chigongwi cha Mlinda cha Na. 1 2023.