Kumbi Mukumbuka?

Kumbi mukuŵerenga mwakuphwere nkhani za mu magazini nga Chigongwi cha Mlinda nga chaka chinu? Asani ndi viyo, wonani asani mungafiska kumuka mafumbu yanga:

Ntchifukwa wuli tikankhuska Yehova?

Tikankhuska Yehova chifukwa chakuti titimutumbika kweniso titimuyanja ukongwa. Titimukankhuska so chifukwa chakuti tikhumba kuti ŵanthu amuziŵi.—w25.01, peji 3.

Asani munthu munyaki watiguŵisa, kumbi tingachita wuli kuti timugowoke?

Kuti tigowoki ndi mtima wosi, titenere kuchitapu kanthu. Ndipu kuleka kulutirizga kukwiya kweniso kusunga vifukwa kungatiwovya kuti tilekengi kusuzgika maŵanaŵanu.—w25.02, peji 15-16.

Ntchifukwa wuli Mariko ntchakuwoniyapu chamampha kwa abali achinyamata?

Mariko wanguzomera ndi mtima wosi kuteŵete anyaki. Chinanga kuti nyengu yinyaki Mariko watenere kuti wanguguŵa ndi vinthu vinyaki vo vinguchitika, kweni iyu wanguleka cha kuteŵete. Iyu wangulutirizga kuja pa ubwezi ndi Paulo kweniso Akhristu anyaki akukhwima mwauzimu.—w25.04, peji 27.

Kumbi Yesu wang’anamuwanganji po wangupemphera kuti: “Ndaŵaziŵisa zina linu”? (Yohane 17:26)

Akusambira ŵaki aliziŵanga kali zina laku Chiuta. Kweni Yesu wanguwovya akusambira ŵaki kumuziŵa umampha Yehova, vo visazgapu kuziŵa khumbu Laki, vo wachita kweniso mijalidu Yaki.—w25.05, peji 20-21.

Kumbi kujiyuyuwa kutitiwovya kuziŵanji?

Kujiyuyuwa kutitiwovya kuziŵa kuti pe vinthu vinyaki vo tileka kuviziŵa. Mwakuyeruzgiyapu, tiziŵa cha po umaliru uziyengi pamwenga mo Yehova wazamuchitiya pa nyengu yeniyi. Ndipu tiziŵa so cha vo vichitikengi mawa kweniso mo Yehova watitiziŵiya.—w25.06, peji 15-18.

Ntchinthu wuli cho chingatiwovya kuti tiyanduwengi ndi nkhani zo tiŵerenga pamwenga nkhani zachisanisani?

Tingajifumba kuti: ‘Kumbi agwiriskiya ntchitu ukaboni wuli wo ungawovya munthu kuvwisa fundu yeniyi? Kumbi mwe chakuyeruzgiyapu cho ndingachigwiriskiya ntchitu pakusambiza munthu fundu yeniyi? Kumbi ndiyani yo wangayanduwa ndi nkhani yeniyi?’—w25.07, peji 19.

Kumbi tisambiranji vakukwaskana ndi Chiuta pa nkhani ya kugowoka asani tiŵanaŵaniya mo wanguchitiya ndi Davidi?

Chinanga kuti Davidi wanguchita maubudi ngakulungakulu, kweni wati walapa ndi mtima wosi, Yehova wangumugowoke. (1 Mafu. 9:​4, 5) Asani Chiuta wagowoka, iyu watitikumbusa so cha pamwenga kutimba mulandu.—w25.08, peji 17.

Kumbi mungachita wuli asani munthu yo musambira nayu Bayibolu watondeka kuvwisa fundu yinyaki?

Asani watondeka kuvwisa fundu yinyaki ya mu Bayibolu chinanga kuti mwayesesa kumusambiza mwakuvwika umampha, mungaluta pa fundu yinyaki ndipu pa fundu yo watiyivwisa cha mungaziweriyapu nyengu yinyaki.—w25.09, peji 24.

Ntchifukwa wuli Bayibolu likamba kuti ubudi we ndi “nthazi yachinyengu”? (Ahe. 3:13)

Ubudi ungatichitiska kuti tichiti vinthu viheni. Kweniso ungatipusisa kuti tikayikiyengi kuti Chiuta watitiyanja nadi.—w25.10, peji 16.

Kumbi ndi vinthu vitatu nivi vo vingatiwovya kuti mapempheru ngidu ngajengi ngamampha ukongwa?

(1) Tiŵanaŵaniyengi mijalidu yaku Yehova. (2) Tiŵanaŵaniyengi masuzgu ngo tikumana nangu kweniso tingazumbuwengi mupempheru. Mwakuyeruzgiyapu asani tikhumba kugowoke munthu munyaki. (3) Tipempherengi mapempheru ngataliku. Venivi vingatiwovya kuti tifwatukengi kukonkhoska vosi vo ve mumtima mwidu.—w25.10, peji 19-20.

Kumbi tingaŵawovya wuli Akhristu akukota?

Tingaŵayende pamwenga kuŵambiya foni. Kweniso tingaŵaperekeza ku chipatala. Ndipuso tingachita umampha kupharazga nawu limoza.—w25.11, peji 6-7.

Kumbi ndi fundu zakukhumbika nizi zo Akhristu atenere kwende kuti aje ndi zowala zo zitumbika Yehova?

Muvwiyengi marangu nga boma pa nkhani ya nthengwa. Muwonesesengi kuti mwambu wa zowala kweniso pa phwandu pachitika vinthu vo vilongo mijalidu yamampha yo mzimu waku Chiuta utuzga. Muchitengi vinthu mwakujiyuyuwa pa nkhani ya vakuvwala kweniso mukhwechengi midawuku yo yikoliyana cha ndi fundu za mu Malemba. Mukambiskanengi umampha asani munozgeke zowala.—w25.12, peji 21-24.