Akukota Mwe Akuzirwa Ukongwa Mumpingu

Panyaki namwi sonu mutondeka kuchita vo mwachitanga kali chifukwa cha ukoti. Chinanga kuti mwateŵete Yehova kwa vyaka vinandi kweni mungayamba kujimba mulandu chifukwa chakuti sonu mutondeka kuchita vinandi. Mwakuyeruzgiyapu, mungayamba kuyeruzgiya vo mwachitanga kali ndi vo muchita sonu. Asani ndivu muchita, kumbi ntchinthu wuli cho chingakuwovyani kuti muleki kuja ndi maŵanaŵanu ngenanga?

KUMBI YEHOVA WAKHUMBA KUTI MUCHITENGENJI?

Jifumbeni kuti, ‘Kumbi Yehova wakhumba kuti ndichitengenji?’ Mungachiskika ndi mazu nga pa Dotoronome 6:5 ngo ngakamba kuti: “Uyanjengi Yehova Chiuta waku ndi mtima waku wosi, umoyu waku wosi kweniso nthazi zaku zosi.”

Mwakukoliyana ndi vesi ili, Yehova wakhumba kuti mumuteŵetiyengi ndi mtima winu wosi, umoyu winu wosi kweniso nthazi zinu zosi. Fundu iyi yingakuwovyani kuti mulekengi kujiyeruzgiya ndi anyinu pamwenga kuyeruzgiya vo mufiska sonu ndi vo mwafiskanga kali.

Ŵanaŵaniyani fumbu ili: Kumbi pa nyengu yo mwenga wachinyamata, mwamupaskanganji Yehova? Ateŵeti anandi aku Yehova angamuka kuti ayesesanga kuchita vosi vo angafiska. Tikayika cha kuti ndivu namwi mwachitanga mwakukoliyana ndi mo vinthu venge pa umoyu winu pa nyengu yo. Kumbi sonu mutimupaskanji Yehova? Mulutirizga mbwenu kuchita vosi vo mungafiska mwakukoliyana ndi mo vinthu viliri pa umoyu winu pasonu panu. Asani muwona vinthu munthowa yeniyi, muwonengi kuti mulutirizga mbwenu kumupaska vosi vo mungafiska Yehova nge mo mwachitiyanga kali. Kali mwamuchitiyanga vosi vo mungafiska, ndipu sonu napu mutimuchitiya vosi vo mungafiska.

MUNGAWOVYA ANYINU

Pe chinthu chinyaki so cho chingakuwovyani. Mumalu mwakuŵanaŵaniya vo mutondeka kufiska chifukwa cha ukoti, muŵanaŵaniyengi nthowa zo mungawovye anyinu. Kukamba uneneska yimwi nge Mkhristu wakukota mungachita vinthu vo mwatingi muchitengi cha po mwenga wachinyamata. Mwakuyeruzgiyapu sonu:

Mungakambiyaku anyinu vinthu vo vakuchitikiyani paumoyu. Wonani vo malemba yanga ngakamba:

Fumu Davidi: “Kali ndenga mwana ndipu sonu ndakuwa, kweni ndechendawonepu munthu weyosi murunji wachijowoleka, pamwenga ŵana ŵaki achipempha chakurya.”—Salimo 37:25.

Yoswa: “Sonu awonani! Ndaja kamanavi kufwa, ndipu muziŵa umampha ndi mtima winu wosi kweniso ndi umoyu winu wosi kuti palivi mazu chinanga ngamoza pa malayizgu ngosi ngamampha ngo Yehova Chiuta winu wangukulayizgani, ngo ngaleka kufiskika. Ngosi ngafiskika paku yimwi, ndipu palivi chinanga ndi mazu ngamoza ngo ngatondeka.”—Yoswa 23:14.

Panyaki namwi mukukambapu mazu nga nge ngenanga pakuchiska anyinu. Davidi ndi Yoswa angukamba vinthu vo vinguŵachitikiyapu pa umoyu wawu. Mwaviyo, vo yiwu angukamba vakukhumbika ukongwa chifukwa angukamba vinthu vo anguviwona kweniso kuvwa kwa vyaka vinandi vo ateŵetiyanga Yehova.

Asani mwateŵete Yehova kwa vyaka vinandi, namwi mungakamba vinthu vamampha vo vakuchitikiyanipu pa umoyu winu. Kumbi mukumbuka nyengu yo munguwona mo Yehova wangutumbikiya ŵanthu ŵaki mu nthowa yapade? Asani ndi viyo, mungachita umampha kukambiyaku Akhristu anyinu nkhani yo! Venivi vingakuchiskani ukongwa. Ndipu asani mukonkhoske anyinu vo vingukuchitikiyanipu muchiteŵete Yehova, yiwu nawu angachiskika ukongwa.—Aro. 1:​11, 12.

Nthowa yinyaki yo mungachiskiya anyinu, nkhusanirika pa maunganu pamasu ndi pamasu asani mungafiska. Asani mwachita viyo, yimwi kweniso abali ndi azichi angachiskika ukongwa. Connie yo tamuzumbuwapu kali wangukamba kuti: “Kuwungana kutindiwovya kuti ndilekengi kugongowa. Asani nde pa maunganu ku Nyumba ya Ufumu, ndiguŵa cha chifukwa cha chanju cho abali ndi azichi atindilongo. Nditesesa kulongo kuti nditiŵawonga mwakuŵapaska mphasu chinanga kuti yingaŵa yimana. Ndipuso ndiwonesesa kuti nani ndichitaku vinthu vakukwaskana ndi kusopa limoza ndi abali ndi azichi.”

YEHOVA WAWONA KUTI UTEŴETI WO MUTIMUCHITIYA NGWAKUZIRWA

Mu Malemba mwe vakuwoniyapu va ŵanthu wo Yehova waŵayanjanga chinanga kuti atondekanga kuchita vinandi pakumuteŵete. Tiyeni tikambiskani chakuwoniyapu cha Myisirayeli munyaki wakukota zina laki Simiyoni yo wenga ndi umoyu mpaka po Yesu wanguwiyaku. Asani Simiyoni waluta ku nyumba yakusopiyaku, watenere kuti wawonanga achinyamata achigwira ntchitu zakukhumbika ukongwa. Kumbi Simiyoni wajiwonanga wuli? Panyaki Simiyoni wajiwonanga kuti ngwambula kukhumbika kwaku Yehova chifukwa watondekanga kuchita vinandi nge mo achinyamata achitiyanga. Kweni ndimu Yehova wamuwoniyanga cha. Yehova wawonanga Simiyoni kuti wenga “murunji ndipu wenga wakugomezgeka kwaku Chiuta” ndipuso wangumutumbika chifukwa wangumupaska mwaŵi wakuwona Yesu we bonda. Kweniso Yehova wangugwiriskiya ntchitu Simiyoni kuti wakambi uchimi wakuti Yesu wazamuja Mesiya ndipu “mzimu wakupaturika wenga paku iyu.” (Luka 2:​25-35) Kukamba uneneska Yehova waŵanaŵaniyanga ukongwa kuti Simiyoni ngwakukota cha, kweni waŵanaŵaniyanga ukongwa chivwanu chaki chakukho.

Namwi mutenere kusimikiza kuti Yehova wawona kuti uteŵeti winu ngwakuzirwa chinanga kuti mutondeka kuchita vinandi. Yehova wawona kuti sembi ‘njakuzomerezeka kwaku iyu asani yiperekeka mwakukoliyana ndi vo munthu walivi cha, kweni mwakukoliyana ndi vo we navu.’—2 Akori. 8:12.

Mwaviyo, muŵanaŵaniyengi ukongwa vo mungafiska. Mwakuyeruzgiyapu, ŵanaŵaniyani nthowa zo mungagwiriskiya ntchitu pakupharazga chinanga kuti mungapharazga kwa nyengu yimanavi ŵaka. Kweniso panyaki mungachiska Akhristu anyinu mwakuŵambiya foni pamwenga kuŵalembe kakalata. Akhristu anyinu angachiskika ukongwa ndi vo mungaŵachitiya, ukongwa asani munthu yo waŵachitiya venivi wateŵete Yehova kwa nyengu yitali.

Anyaki atondeka kuchita vinandi pakuteŵete Yehova chifukwa cha matenda kweni Yehova watiŵagwiriskiya ntchitu mbwenu pakovya ŵanthu anyaki. Wonani bokosi lakuti, “Wangugwiriskiya Ntchitu Bayibolu Pakutaska Munthu” kuti muziŵi vo vinguchitika mucharu chinyaki ku East Africa.

Mukumbukengi kuti chakuwoniyapu chinu chamampha pa nkhani yakuteŵete Yehova mwakugomezgeka chingachiska ŵanthu anandi. Ndipu yimwi ntchakuwoniyapu chamampha pa nkhani ya kukunthiyapu kweniso mungasimikiza kuti, “Chiuta ngwambula urunji cha kuti wangaluwa ntchitu yinu ndi chanju cho mungulongo pa zina laki, pakuti munguteŵete akupaturika ndipu mweche kuŵateŵete.”—Ahe. 6:10.

LUTIRIZGANI KUWOVYA ANYINU

Kafukufuku walongo kuti anthulumi kweniso anthukazi akukota wo atesesa kuwovya anyawu atamatama cha, aŵanaŵana umampha kweniso aja umoyu utali.

Mbuneneska kuti kuchita vinthu vamampha kungatuzgiyapu limu cha masuzgu ngo ngatuza chifukwa cha ukoti. Ndi Ufumu waku Chiuta pe wo wazamutuzgapu ubudi wo uchitiska kuti tikotengi kweniso kuti tifwengi.—Aro. 5:12.

Kweni chinanga ndi sonu napu vo muchita pakuteŵete Yehova nge kuwovya ŵanthu anyaki kuti aziŵi Yehova vingakuwovyani kuti muje ndi umoyu wamampha kweniso chilindizga chakukho. Abali ndi azichi akukota ziŵani kuti Yehova wawona kuti vosi vo muchita pakumuteŵete vakuzirwa ukongwa ndipu abali ndi azichi mu mpingu atikuwonani kuti mwe chakuwoniyapu chamampha pa nkhani ya kugomezgeka.