Kuchitiska Masambiru nga Bayibolu Kuziya Pafoni

Daiane njumoza wa Akaboni aku Yehova kweniso mupharazgi wa nyengu zosi ku Brazil. Zuŵa linyaki wachipharazgiya ŵanthu kuziya pafoni, wangukambiskana ndi banja linyaki la chinyamata lo lakhumbanga kuziŵa vinandi. Banja lenili lingukambiya Daiane kuti lisamiyengi kumuzi unyaki, ko kulivi magesi kweniso intaneti. Chinyaki chenga chakuti kumuzi wo kwengavi Kaboni weyosi waku Yehova. Kuti alutirizgi kusambira Bayibolu, banja lo lingumupaska Daiane nambala ya foni yo muzi wosi wagwiriskiyanga ntchitu. Ndipu angupangana nyengu kweniso zuŵa lakuti azikambiskanengi.

Daiane wangumba foni pa nyengu yo angupangana, ndipu banja liya lingumuka! Kwa masabata ngaŵi ngakulondopu, Daiane wangusambira nawu maulendu ngatatu kuziya pafoni.

Pavuli paki banja lo lamukanga cha foni. Kweni Daiane wangufwa daka cha, wambanga mbwenu foni maulendu ngatatu pa sabata. Ndipu wapharazgiyanga munthu weyosi yo wamuka foni. Venivi vinguchitiska kuti Daiane wayambi kusambira Bayibolu ndi ŵanthu anandi a muzi wo.

Zuŵa linyaki Daiane ndi mulumu waki achisambira ndi mnyamata munyaki pafoni yiya, mulongozgi wa chisopa chinyaki wavwisiyanga. Iyu wangundere pafupi kuti wavwisiyi umampha. Pavuli paki, mulongozgi yo wangupempha kuti walongoro ndi Daiane kweniso mulumu waki. Iyu wangukondwa ukongwa ndi vo wanguvwa, ndipu nayu wangupempha kuti wayambi kusambira Bayibolu.

Pati pajumpha nyengu, Daiane ndi mulumu waki achitiskanga masambiru nga Bayibolu ngakukwana 6 mumuzi wenuwu, kusazgapu mulongozgi wa chisopa. Ŵanthu anyaki wo asambiranga Bayibolu akwamba kali kuwungana kuziya pafoni yeniyiya. Wakusambira munyaki wangupanga benchi lakuti wosi ajengepu asani asambira Bayibolu.

Daiane ndi mulumu waki awonga ukongwa chifukwa cha mwaŵi wo ŵenga nawu wakupharazga uthenga wa Ufumu kumuzi wakutali wenuwu. Daiane wangukamba kuti, “Yehova wanganozga kuti munthu weyosi wavwi uthenga wamampha chinanga kuti waja kumuzi wakutali.”