Bokosi la Mafumbu

◼ Kumbi ndi fundu za m’Bayibolo nizi zo zingatiwovya pa nkhani yakugwiriskiya nchitu mafoni asani te pa maunganu pamwenga mu uteŵeti wakumunda?

“Kanthu Kosi ke ndi Nyengu Yaki.” (Wak. 3:1): Mafoni ngatovya kuti ŵanthu atumiziranengi mauthenga ndi kukambiskana nyengu yeyosi. Kweni pe nyengu zinyaki zapade zo Akhristu akhumbika cha kutimbanyizgika ndi mafoni. Mwakuyeruzgiyapu, nyengu ya maunganu njakusope Yehova, kulonde ulongozgi, ndi kuchiskana. (Mar. 31:12; Sumu 22:22; Ŵar. 1:11, 12) Tingachita umampha ukongwa kuzimwa mafoni ngidu asani tafika kumaunganu ndi kuŵerenga mauthenga asani tamala maunganu. Asani pe vinthu vinyaki vamabuchibuchi vo vingakuchitiskani kuti muleki kuzimwa foni yinu, mutenere kuyithya kuti yileki kutimbanyizga anyinu.

Tichitengi Vosi Chifukwa cha Uthenga Wamampha. (1 Ŵakor. 9:23): Nyengu zinyaki patuŵa vifukwa vakwenere vakugwiriskiya nchitu foni mu uteŵeti. Mwakuyeruzgiyapu, mubali yo walongozga kagulu ka uteŵeti wakumunda, wangayigwiriskiya nchitu kuti wambiyi abali wo apharazga kurwandi linyaki la chigaŵa. Nyengu zinyaki apharazgi agwiriskiya nchitu foni pakumbiya munthu wakunweka pamwenga yo asambira nayu Bayibolo asani waja kutali kuti aziŵi asani we pakhomu. Asani tayenda ndi foni titenere kuphwere kuti yingatitimbanyizganga cha tichikambiskana ndi mweneku wa nyumba. (2 Ŵakor. 6:3) Asani munyinu wapharazga, m’malu mwakumbirananga mafoni pamwenga kutumizirananga mauthenga ndi anyinu, mungachita umampha kuŵika maŵanaŵanu nginu ngosi pa uteŵeti kweniso anyinu wo mupharazga nawu.

Tiŵanaŵaniyengi Anyidu. (1 Ŵakor. 10:24; Ŵaf. 2:4): Tingasweriyanga dala cha pakuluta ku unganu wa uteŵeti wa kumunda ndi chilatu chakuti timbengi foni pamwenga kutumizga uthenga kuti tiziŵi ko kagulu kidu kapharazga. Asani tafika mwakuswera titimbanyizga anyidu chifukwa tipereka nchitu yakugaŵa so. Nyengu zinyaki vikhoza kutichitikiya vinthu vo vingachitiska kuti tisweri. Kweni asani nyengu zosi tifika liŵi, tilongo kuti titumbika ndondomeku yo Yehova wakujalikiska, m’bali yo walongozga, ndi apharazgi anyidu.