Nkhondu yo Yichitika ku Middle East—Kumbi Bayibolu Likambanji?

Ŵanthu pacharu chosi afipa mtima ndi vo vichitika pakati pa charu cha United States, Israel ndi Iran. Kumbi nkhondu yeniyi yikuwengi ukongwa mpaka kukwaska vyaru vinandi? Kumbi maboma ngangamalisa nkhondu kuti pacharu paje chimangu?

Ŵanthu wo akuvwapu uchimi wa mu Bayibolu angajifumba kuti, kumbi nkhondu yeniyi yo yichitika ku Middle East ndiyu yiyambisengi nkhondu ya Aramagedoni yo yizumbulika mu Bayibolu mubuku la Chivumbuzi?

Kumbi Bayibolu likambanji?

Kumbi maboma ngangamalisa nkhondu yo yichitika ku Middle East?

Bayibolu likamba kuti: “Mungathembanga alongozgi cha pamwenga mwana wa munthu chifukwa wangakutaskani cha.”—Salimo 146:3.

Tiziŵa cha asani maboma ngafiskengi kumaliska nkhondu ku Middle East. Kweni Bayibolu likambiya limu kuti palivi munthu, ŵanthu pamwenga boma lo lingafiska kumaliska nkhondu ndikujalikiska chimangu pacharu chapasi. Ndi Chiuta pe yo wangafiska ‘kumalisa nkhondu pacharu chosi chapasi.’—Salimo 46:9.

• Kuti muziŵi vinandi ŵerengani magazini ya Chigongwi Cha Mlinda yamutu wakuti “Kumbi Nkhondu Zazamumala?”

Kumbi nkhondu yo yichitika ku Middle East yifiska uchimi?

Bayibolu likamba kuti: “Mwazamukuvwa viwawa vankhondu ndi mbiri zankhondu. . . . Mtundu wazamuyukiyana ndi mtundu unyaki, ufumu ndi ufumu unyaki.”—Mateyu 24:6, 7.

Nkhondu yo yichitika ku Middle East mbukaboni unyaki wo ulongo “kumala kwa nyengu yinu” ndipu venivi vititisimikizgiya kuti tija “mu mazuŵa ngakumaliya.” (Mateyu 24:3; 2 Timote 3:1) Nkhondu zo zichitika mazuŵa nganu zilongo kuti pambula kuswera yapa Chiuta wachitengepu kanthu kuti wamalisi nkhondu kweniso masuzgu nganyaki ngosi ngo taŵanthu tikumana nangu.

• Kuti muziŵi vinandi ŵerengani nkhani yamutu wakuti “Kumbi ndi Vinthu Wuli vo Vilongo Kuti Tija mu ‘Mazuŵa Ngakumaliya’ Pamwenga ‘Nyengu za Umaliru’?”

Kumbi nkhondu ya Aramagedoni yazamukwambiya ku Middle East?

Bayibolu likamba kuti: “Ndipu mazu ngakukambirika . . . nganguŵawunganisiya kumalu ngo mu Chiheberi ngadanika kuti Aramagedoni.”—Chivumbuzi 16:16.

Nkhondu ya Aramagedoni ndi nkhondu ya pakati pa maboma nga ŵanthu cha yo yazamukwambiya ku Middle East. Kweni ndi nkhondu ya pacharu chosi yo yazamuchitika pakati pa maboma nga ŵanthu ndi Chiuta.

• Kuti muziŵi vinandi ŵerengani nkhani ya mutu wakuti “Kumbi Nkhondu ya Aramagedoni ndi Nkhondu Wuli?”

Ntchinthu wuli chingatiwovya kuti tilekengi kufipa mtima panyengu yakusuzga yeniyi?

Bayibolu likamba kuti: “Mungafipanga mtima ndi chinthu chechosi cha, kweni pa chinthu chechosi, mwa pempheru ndi kuŵeyere limoza ndi kuwonga, vo mupempha viziŵiki kwaku Chiuta.”—Afilipi 4:6.

Yehovaa Chiuta wakhumba kuti tipempherengi kwaku iyu. Chifukwa chakuti Chiuta watitiyanja, wamuka mapempheru ngidu ndipuso watitiwovya kuti tilekengi kufipa mtima. (1 Peturo 5:7) Kuti wafiski venivi iyu watitiwovya kuvwisa chifukwa cho nkhondu zilutiriya kuchitika, mo zazamumaliya kweniso vo wazamuchita kuti watuzgepu urwirwi ndi masuzgu.—Chivumbuzi 21:3, 4.

• Kuti muziŵi so nthowa zinyaki zo Yehova wagwiriskiya ntchitu pakutiwovya ŵerengani nkhani ya mutu wakuti“Kumbi mu Bayibolu mwe Fundu zo Zingandipembuzga?.”