Kumbi Akaboni aku Yehova ŵe ndi Marangu ngo Atende pa Nkhani ya Kukhumbana?

Akaboni aku Yehova agomezga kuti fundu kweniso marangu nga mu Bayibolu ngangatiwovya kuti tisankhengi vinthu mwazeru kweniso munthowa yo yingakondwesa Chiuta. (Yesaya 48:17, 18) Chinanga kuti ndisi cha tikupanga fundu ndi marangu ngenanga kweni titesesa kugwiriskiya ntchitu. Tiyeni tiwoni mo zinyaki mwa fundu zenizi zititiwovye pa nkhani yakukhumbana nthengwa.a

• Nthengwa yikhumbika cha kumala. (Mateyu 19:6) Akaboni aku Yehova atiyiwona mwakupepuka cha nkhani yakukhumbana chifukwa aziŵa kuti chija chiyambi cha nthengwa.

• Ŵanthu ŵija ŵeniwo afika pa msinkhu wakuti angato pamwenga kuyirwa ndiwu akhumbika kukhumbana nthengwa. Ŵanthu ŵenaŵa akhumbika ‘kujumpha pa unamana’ pamwenga nyengu yo chiryokuryoku chakugonana chija cha nthazi ukongwa.—1 Akorinto 7:36.

• Ŵanthu wo akhumbana nthengwa atenere kuja ŵanthu wo ŵe ndi wanangwa wakuto pamwenga kuyirwa. Yehova wawona kuti ŵanthu wo amalisa nthengwa yawu ku khoti alivi wanangwa wakuto pamwenga kuyirwa so chifukwa marangu ngaku Yehova ngakuti nthengwa yingamala asani yumoza waku yiwu wachita chigololu.—Mateyu 19:9.

• Akhristu wo akhumba kutolana akhumbika kuja ŵanthu wo agomezga vinthu vakuyanana. (1 Akorinto 7:39) Akaboni aku Yehova awona kuti dangu lenili likamba za munthu yo watumbika waka vo tigomezga cha kweni yo walondo ndipu ndi Kaboni wakubatizika. (2 Akorinto 6:14) Kwamba kali, Chiuta wakambiya ateŵeti ŵaki kuti atolanengi ndi munthu yo wagomezga vo yiwu agomezga. (Genezesi 24:3; Malaki 2:11) Akufufuza amazuŵa nganu nawu awona kuti fundu yeniyi njakovya ukongwa.b

• Ŵana akhumbika kuvwiya apapi ŵawu. (Nthanthi 1:8; Akolose 3:20) Ŵana wo ŵeche panyumba ya apapi ŵawu akhumbika kuvwiya marangu nga apapi ŵawu pa nkhani yakukhumbana. Apapi angaŵakambiya za msinkhu wo akhumbika kuŵa nawu pa nkhani yakukhumbana kweniso vo akhumbika kuchita asani akhumbana.

• Kaboni weyosi wasankha yija vakuchita pa nkhani yakukhumba kweniso munthu yo wakhumbana nayu nthengwa. Kweni pakuchita venivi watesesa kulondo fundu za mu Bayibolu. Venivi vikoliyana ndi fundu yakuti: “weyosi wazamunyamuwa katundu waki.” (Agalatiya 6:5) Akaboni aku Yehova anandi wo akhumbana nthengwa awona kuti mbumampha kufumbaku dankha zeru kwa Akaboni wo aziŵa vinandi kweniso wo atiŵakhumbiya vamampha.—Nthanthi 1:5.

• Ŵanthu anandi asani akhumbana achita maubudi ngakulungakulu. Mwakuyeruzgiyapu, Bayibolu likamba kuti tithaŵi ureŵi. Venivi visazgapu kugonana, kuseŵeresa viŵalu vakubisika va munthu yo ndi mulumu pamwenga muwolu waku cha ndipuso kugonana mumulomu pamwenga kumataku. (1 Akorinto 6:9-11) Likamba so kuti kuchita vinthu vo viyuska khumbiru lakugonana ndi “jalidu launyakazi” pa masu paku Yehova. (Agalatiya 5:19-21) Bayibolu likana so kukambiskana “nkhani zakutuka.”—Akolose 3:8.

• Mtima ngwakunyenga ukongwa. (Yeremiya 17:9) Mtima ungachitiska kuti munthu wachiti vinthu vo waziŵa kuti viheni. Kuti venivi vileki kuchitika, ŵanthu wo akhumbana akhumbika cha kuja pa malu ngambula kuwoneke. Mwaviyo, wo akhumbana nthengwa angasankha kuti nyengu zosi acheziyengi pa gulu pamwenga ajengi ndi munthu munyaki. (Nthanthi 28:26) Mkhristu yo wakhumba kuja pa nthengwa waziŵa kuti mbumampha cha kukhumbana nthengwa ndi munthu yo so waleka kumuziŵa umampha kuziya pa intaneti.—Masalimo 26:4.