Kumbi Ndingachita Wuli Kuti Ndije Kaboni Waku Yehova?

Yesu wangukonkosa vo munthu wakhumbika kuchita kuti waje Kaboni waku Yehova. Vinthu ivi vikulembeka pa Mateyu 28:19, 20. Mavesi yanga ngakamba kuti munthu yo wakhumba kuti waje wakusambira waku Khristu watenere kulongoro pamwenga kuti kuchitiya ukaboni vaku Yehova.

Chakwamba: Mukhumbika kusambira Bayibolu. Yesu wangukambiya akusambira ŵaki kuti “mukasambizengi ŵanthu . . . kuti aje akusambira.” (Mateyu 28:19, 20) M’Bayibolu mwe fundu zo zingakuwovyani kuja ndi umoyu walikondwa. (2 Timote 3:16, 17) Tikhumba kukuwovyani kuziŵa vo Bayibolu lisambiza mwakusambira namwi Bayibolu kwawezi.​—Mateyu 10:7, 8; 1 Ŵatesalonika 2:13.

Chachiŵi: Muchitengi vo musambira. Yesu wangukamba kuti asani munthu wasambira, watenere ‘kusunga vinthu vosi vo wangulamula.’ (Mateyu 28:20) Ivi ving’anamuwa kuti mukhumbika kusambira kuti muziŵi waka vinthu cha. Kweni mukhumbika so kusintha maŵanaŵanu ndi nkharu yinu. (Machitidu 10:42; Ŵaefesu 4:22-29; Ŵahebere 10:24, 25) Wo asunga vo Yesu wangulamula, akhumbika kusankha kuja akusambira ŵaki mwakujipatuliya kwaku Yehova Chiuta.​—Mateyu 16:24.

Chachitatu: Mutenere kubatizika. (Mateyu 28:19) Bayibolu liyeruzgiya ubatizu ndi kuwundiya munthu yo wafwa. (Yeruzgiyani ndi Ŵaroma 6:2-4.) Ubatizu umiya kufwa ku umoyu wakali ndi kwamba umoyu wasonu. Mwaviyo, ubatizu mbukaboni wakuti mwachita vinthu viŵi vo Yesu wangukonkhosa pa Mateyu 28:19, 20 ndipu mupempha Yehova kuti muje ndi njuŵi yituŵa.​—Ŵahebere 9:14; 1 Petro 3:21.

Ndingaziŵa wuli kuti nde wakunozgeka kubatizika?

Kambiyani ŵara a m’mpingu winu. Yiwu azamukumana namwi kuti aziŵi asani muvwisa cho ubatizu ung’anamuwa, muchita vo musambira kweniso asani mukujipatuliya kwaku Yehova mwakukhumba kwinu.​—Machitidu 20:28; 1 Petro 5:1-3.

Kumbi ŵana wo apapi ŵawu mbakaboni aku Yehova, nawu akhumbika kuchita venivi?

Hinya. Nge mo Bayibolu likukambiya, tisambiza ŵana widu fundu zaku Yehova. (Ŵaefesu 6:4) Kweni asani akuwa, atenere kusankha wija kusambira Bayibolu, kugomeza vo asambira ndi kuchita vo Bayibolu lisambiza kuti aje akwenere kubatizika. (Ŵaroma 12:2) Munthu weyosi wakhumbika kusankha yija pankhani iyi.​—Ŵaroma 14:12; Ŵagalatia 6:5.