Kumbi Akaboni aku Yehova Asope Limoza ndi Matchalitchi Nganyaki?

Isi Akaboni aku Yehova titanja kukambiskana ndi ŵanthu a mu visopa vinyaki vo tigomezga. Kweni tisope nawu limoza cha. Bayibolu likamba kuti Akhristu ŵe nge viŵalu vo ‘vikoliyana pamoza,’ ndipu vo tigomezga ndivu vititiwovya kuti tikoliyanengi. (Aefeso 4:16; 1 Akorinto 1:10; Afilipi 2:2) Mbuneneska kuti Akhristu atenere kwanjana, kuchitiyana lisungu kweniso kugowokiyana. Kweni chakukhumbika ukongwa ndi fundu za mu Bayibolu zo tigomezga. Fundu zenizi zakukhumbika ukongwa chifukwa kwambula fundu izi chivwanu chidu chingaŵa chambula ntchitu.—Aroma 10:2, 3.

Bayibolu likamba kuti asani visopa visope pamoza vija nge nyama ziŵi zakupambana zo zamangika mugoli limoza. Kuchita venivi kungananga chivwanu cha Mkhristu. (2 Akorinto 6:14-17) Ndichu chifukwa chaki Yesu wanguzomereza cha kuti akusambira ŵaki asopiyengi limoza ndi visopa vinyaki. (Mateyu 12:30; Yohane 14:6) Mwakuyanana waka, Marangu ngo Chiuta wangupaska Mozesi, wangukaniza Ayisirayeli kuti angasopiyanga limoza cha ndi ŵanthu amitundu yinyaki wo asopanga Yehova cha. (Chituwa 34:11-14) Ndipu nyengu yinyaki Ayisirayeli angukana kuti ŵanthu a mu visopa vinyaki aŵawovyi kuzenga nyumba yaku Chiuta.—Ezra 4:1-3.

Kumbi Akaboni aku Yehova akambiyaku ŵanthu a mu visopa vinyaki fundu a mu Bayibolu zo agomezga?

Hinya. Mu 2015, tingumaliya maola ngakukwana 1,933,473,727 tichipharazgiya ŵanthu a mu visopa vinyaki mazu ngaku Chiuta. Nge mo wakutumika Paulo wachitiyanga, nasi tikhumba kuziŵa maŵanaŵanu ndi vigomezgu va “ŵanthu anandi ukongwa.” (1 Akorinto 9:19-22) Pa nyengu yo tikambiskana ndi ŵanthu ŵenaŵa, titesesa kugwiriskiya ntchitu ulongozgi wa mu Bayibolu wakulongo ulemu munthu weyosi.—1 Peturo 3:15.