Kumbi Bayibolu Likambanji va Nyama ya Dinosaurs?

Vo Bayibolu likamba

Bayibolu likambapu chechosi cha vakukwaskana ndi nyama ya dinosaurs. Chinanga kuti ve viyo, likamba kuti Chiuta ndiyu “wakulenga vinthu vosi.” Mwaviyo tikayika cha kuti nyama yeniyi ye mugulu la vinthu vo Chiuta wangulenga.a (Chivumbuzi 4:​11) Chinanga kuti Bayibolu likambapu chechosi cha za nyama ya dinosaurs, kweni likamba za nyama zakupambanapambana ndipu nyama yeniyi yitenere kuti nayu ye mugulu lenili. Bayibolu likamba vamoyu nge:

• “Vamoyu vikuluvikulu va munyanja.”​—Chiyambo 1:​21; New American Bible.

• “Vinyama vosi vakukwaŵa pasi.”​—Chiyambo 1:​25.

• “Vinyama vamudondu.”​—Chiyambo 1:​25.

Kumbi nyama ya dinosaurs yikuchita kusambuka kutuliya ku nyama zinyaki?

Nyama ya dinosaurs yikusintha cha kutuwa ku nyama zinyaki, kweni yinguziŵika chifukwa cha vo akufukuwa pasi angusaniya. Ivi vikoliyana ukongwa ndi vo Bayibolu likamba kuti Chiuta ndiyu wakulenga nyama zosi. Mwakuyeruzgiyapu, lemba la Sumu 146:6 likamba kuti Chiuta “wakulenga kuchanya ndi charu chapasi, nyanja ndi vosi vo ve mwenimo.”

Kumbi nyama ya dinosaurs yingujaku zukwanji?

Bayibolu likamba kuti nyama za munyanja ndi za kumtunda zingulengeka mu mazuŵa 6 ngo Chiuta wangulenge vinthu.b (Chiyambo 1:​20-​25, 31) Ndichu chifukwa chaki Bayibolu lilongo kuti nyama izi zingujaku kwa nyengu yitali.

Kumbi Boku ndi Mung’ona vikuchita kusambuka kutuliya ku nyama ya dinosaurs?

Awa. Chinanga kuti boku (Muchiheberi Behemoti) ndi mung’ona (Muchiheberi Leviyatani) vizumbulika mubuku laku Jobu, palivi ukaboni wo ulongo kuti nyama zenizi zikusambuka kutuwa ku nyama yeniyi. Kweni buku la Jobu lizumbuwa waka za boku ndi mung’ona asani tiwona vo mavesi yanga ngakonkhoska. (Jobu 40:15-​23; 41:​1, 14-​17, 31) Mwemosi mo vingaŵiya mazu ngakuti “Behemoti” ndipuso ngakuti “Leviyatani” ngangang’anamuwa nyama ya dinosaurs cha. Chiuta wangukambiya Yobu kuti waŵanaŵaniyi nyama yeyosi pakuyija. Yobu wanguja ndi umoyu kwa nyengu yitali nyama ya dinosaurs yati yafwa.​—Jobu 40:16; 41:8.

Kumbi ntchinthu wuli chinguchitikiya nyama ya dinosaurs?

Bayibolu likamba vinandi cha vo vinguchitikiya nyama ya dinosaurs kuti yileki kuwoneka. Kweni Bayibolu likamba kuti vinthu vosi vikulengeka ‘chifukwa cha khumbu laki [Chiuta ].’ Mwaviyo, Chiuta wenga ndi chilatu pakulenga nyama ya dinosaurs. (Chivumbuzi 4:​11) Chiuta wati wafiska chilatu chaki, wanguzomereza nyama ya dinosaurs kuti yingasanirikanga so cha pamwenga kuti yifwi.