Kumbi Bayibolu Likambanji pa Nkhani ya Kuwotcha Chiŵanda?
Vo Bayibolu likamba
Bayibolu lipereka ulongozgi wewosi cha pa nkhani ya kuwotcha chiŵanda. Mu Bayibolu mulivi so dangu lo likamba kuti asani munthu wafwa amuŵikengi kumasanu pamwenga kumuwotcha.
Mu Bayibolu mwe nkhani za ateŵeti anyaki akugomezgeka aku Chiuta wo ayikanga kumasanu ŵanthu akufwa. Mwakuyeruzgiyapu, Abrahamu wanguyesesa kupenja malu ngamampha ngakuti wakaŵikeku muwolu waki Sara wati wafwa.—Chiyambo 23:2-20; 49:29-32.
Bayibolu lizumbuwa so ateŵeti anyaki akugomezgeka wo awotchanga ŵanthu akufwa. Mwakuyeruzgiyapu, Fumu Sauli ya ku Isirayeli ndi ŵana ŵaki anthulumi atatu ŵati abayika kunkhondu, vitanda vawu venga mbwenu mu dera la arwani ŵawu ndipu anguviŵika mwambula ulemu. Kweni asilikali akugomezgeka a ku Isirayeli ŵati ŵavwa venivi, angusoka ndi kuchipawuwa chitanda chaku Sauli ndipuso va ŵana ŵaki pachimati. Yiwu anguchiviwotcha ndipu pavuli paki anguto vyotu ndi kuchiliŵika mu muunda. (1 Samuele 31:8-13) Ndipu Bayibolu lilongo kuti vinthu vo vinguchitika venga vakuzomerezeka.—2 Samuele 2:4-6.
Fundu yaboza yakukwaskana ndi kuwotcha chiŵanda
Fundu yaboza: Kuwotcha chiŵanda nkhuleka kutumbika munthu yo wakufwa.
Fundu yauneneska: Bayibolu likamba kuti ŵanthu wo atufwa awere ku fuvu, ndipu ivi ndivu vichitika asani thupi layamba kuvunda chifukwa lija fuvu. (Chiyambo 3:19) Kuwotcha chiŵanda kuchitiska kuti ivi vichitiki mwaliŵi chifukwa thupi la munthu yo asani lawotcheka lija vyotu pamwenga fuvu.
Fundu yaboza: Mu nyengu yakali ŵanthu ŵija pe wo alekanga kuteŵete Chiuta ndiwu aŵawotchanga asani ŵafwa.
Fundu yauneneska: Ŵanthu anyaki wo ŵenga ambula kugomezgeka aŵawotchanga asani ŵafwa. Mwakuyeruzgiyapu Akani ndi ŵanthu a mu banja laki anguwotcheka. (Yoswa 7:25) Ili lenga dangu cha Kweni vinguchitika ŵaka. (Marangu 21:22, 23) Nge po takambiyapu kali, ŵanthu anyaki akugomezgeka a munyengu yakali asani ŵafwa, nawu aŵawotchanga. Mwakuyeruzgiyapu Yonatani mwana wa Fumu Sauli wati wafwa, thupi laki anguliwotcha.
Fundu yaboza: Chiuta wazamuyuska cha munthu yo chiŵanda chaki anguchita kuchiwotcha.
Fundu yauneneska: Pakukamba za kuyuska ŵanthu akufwa, Chiuta wazamuyuska munthu weyosi chinanga wangaŵa kuti wakuchiŵikika kumasanu, wanguwotcheka, wangusoŵe mu nyanja pamwenga wanguchita kuryika ndi vinyama va mudondu. (Chivumbuzi 20:13) Chiuta wanthazi zosi wangatondeka cha kulenga so maliŵavu nganyaki nga ŵanthu wo akufwa.—1 Akorinto 15:35, 38.