Zina chayilu laku Chiuta lo likulembeka mu vilembu vakwambiriya va Chiheberi lisanirika maulendu nganandi m’mipukutu yakwambiriya ya Bayibolu
VO BAYIBOLU LIKAMBA
Zina Laku Chiuta
Ŵanthu mamiliyoni nganandi apemphera kwaku Chiuta mwakugwirisiya ntchitu mazina nga udindu nge Ambuya, Wamuyaya, Allah pamwenga Chiuta. Chinanga kuti achita viyo, Chiuta we ndi zina laki chayilu. Kumbi mungayanja kuligwirisiya ntchitu?
Kumbi zina laku Chiuta ndiyani?
VO ŴANTHU ANYAKI AKAMBA
Ŵanthu anandi wo atijikamba kuti mbakhristu, agomezga kuti zina laku Chiuta ndi Yesu. Anyaki akamba kuti chifukwa chakuti Chiuta Wanthazizosi waliku yumoza pe, ndikuti palivi chifukwa chakuti agwirisiyengi ntchitu zina laki chayilu. Penipo anyaki akamba kuti nkhwakwenere cha kugwirisiya ntchitu zina laku Chiuta chayilu.
VO BAYIBOLU LIKAMBA
Zina laku Chiuta Wanthazizosi ndi Yesu cha, chifukwa Yesu ndi Chiuta Wanthazizosi cha. Ndipu Yesu wangusambiza akusambira ŵaki kuti apempherengi kwaku Chiuta kuti: “Ada, zina linu lipaturiki.” (Luka 11:2) Yesu nayu wangupemphera kwaku Chiuta kuti: “Ada, kankhuskani zina linu.”—Yohane 12:28.
M’Bayibolu, Chiuta wakukamba kuti: “Ini ndini Yehova. Zina langu ndenili. Ndipu unkhankhu wangu ndiwuperekengi kwaku weyosi cha.” (Yesaya 42:8) Zina lakuti “Yehova” likufwatulika kutuliya ku vilembu vinayi va Chiheberi vo vimiya zina lapade laku Chiuta. (YHWH) Zina lenili lisanirika maulendu pafupifupi 7,000 mu Malemba nga Chiheberi.a Ivi vilongo kuti zina laku Chiuta lisanirika ukongwa kuphara mazina ngaki nga udindu nge “Chiuta,” “Wanthazizosi,” pamwenga “Ambuya.” Ilu, liphara so mazina nganyaki nga ŵanthu wo akuzumbulika m’Bayibolu nge Abrahamu, Mozesi pamwenga Davidi.
M’Bayibolu palivi po Yehova wakukaniza kugwirisiya ntchitu zina laki mwaulemu. Malemba ngalongo kuti ateŵeti aku Chiuta a mu nyengu yakali agwirisiyanga ntchitu zina lakupaturika laku Chiuta. Pa mazina ngo adananga ŵana ŵawu, asazgangapu zina lakuti Yehova. Mwakuyeruzgiyapu, zina lakuti Eliya ling’anamuwa kuti “Chiuta wangu ndi Yehova” ndipuso lakuti Zekariya ling’anamuwa kuti “Yehova Wakumbuka.” Kusazgapu pa fundu yeniyi, yiwu agwirisiyanga ntchitu zina laku Chiuta pa vakuchita vawu va zuŵa ndi zuŵa.—Ruti 2:4.
Chiuta wakhumba kuti tigwirisiyengi ntchitu zina laki. Tosi tichiskika ‘kuwonga Yehova ndi kudana pa zina laki.’ (Sumu 105:1) Iyu wawona ŵanthu wo “aŵanaŵaniya zina laki.”—Malaki 3:16.
“Ŵanthu aziŵi kuti imwi, yo zina linu ndimwi Yehova, imwi pe ndimwi Wapachanya Limu pacharu chosi chapasi.”—Sumu 83:18.
Kumbi zina laku Chiuta ling’anamuwanji?
Ŵanthu anyaki wo asambira vakukwaskana ndi Chiuta akamba kuti mu Chiheberi zina lakuti Yehova ling’anamuwa kuti “Wachitisa Kuja.” Fundu iyi, yisazgapu so kuti Chiuta wangachita chechosi cho wakhumba kweniso wangachitisa vinthu vo wakulenga kuja chechosi cho wakhumba kuti wafiski khumbu laki. Ndi Mulengi wanthazizosi pe yo ngwakwenere kuja ndi zina laviyo.
KUMBI VENIVI VINGAKUWOVYANI WULI?
Kuziŵa zina laku Chiuta kungakuwovyani kuti mumuziŵi umampha. Muwonengi kuti nkhwambula kusuzga kuja nayu pa ubwezi. Kumbi mungaja wuli pa ubwezi ndi munthu yo muleka kuziŵa zina laki? Fundu yakukhumbika ukongwa njakuti Chiuta wakuvumbuliyani zina laki. Venivi vilongo kuti iyu wakhumba kuti imwi muje nayu pa ubwezi.—Yakobe 4:8.
Mutenere kusimikiza kuti nyengu zosi Yehova wachita vinthu mwakukoliyana ndi zina laki. Iyu ndi Chiuta yo wafiska malayizgu ngaki. Ndichu chifukwa chaki Bayibolu likamba kuti: “Ŵanthu wo aziŵa zina linu azakukugomezgani.” (Sumu 9:10) Kusambira vinandi vakukwaskana ndi zina laku Chiuta kukuwovyeningi kuti mumugomezgengi ukongwa. Ve viyo chifukwa zina laki likoliyana ndi mijalidu yaki yamampha nge chanju chambula kumala, lisungu kweniso urunji. (Chituwa 34:5-7) Kuziŵa kuti nyengu zosi Yehova wafiska vo walayizga kweniso wachita vinthu mwakukoliyana ndi mijalidu yaki, kukuwovyeningi kuti mumugomezgengi ukongwa.
Kuziŵa zina laku Chiuta Wanthazizosi ndi mwaŵi ukulu ukongwa. Vingakuwovyani kuti mulonde vitumbiku sonu kweniso kunthazi. Chiuta watitilayizga kuti: “Ndazakumuvikiriya chifukwa waziŵa zina langu.”—Sumu 91:14.
“Weyosi yo wadanengi pa zina laku Yehova wazamutaskika.”—Yoele 2:32.
Zina laku Chiuta mu vineneru vakupambanapambana
a Mu Mabayibolu nganandi atuzgamu zina laku Chiuta m’malu mwaki alembamu zina la udindu lakuti “AMBUYA” ndipu atililemba ndi vilembu vikuluvikulu. Penipo m’Mabayibolu nganyaki, alemba zina laku Chiuta mu mavesi ngakuŵerengeka pamwenga atililemba m’mazu nga mumphata. Mu Bayibolu la New World Translation of the Holy Scriptures akugwirisiya ntchitu zina lakupaturika laku Chiuta m’malu ngosi ngo likhumbika.