Vo Mungachita Kuti Mulekengi Kunanga Ndalama
Fundu za m’Bayibolu zawovya ŵanthu anandi kuti aleki kuja ndi masuzgu nganandi pa nkhani ya kugwiriskiya ntchitu ndalama.
MULEMBENGI VO MUKHUMBA KUGULA
FUNDU YA M’BAYIBOLU: “Maŵanaŵanu nga munthu waphamphu ngatovya kuti vinthu vimuyende umampha, kweni wosi wo achita vinthu mwakupupuluma akavukengi.”—Nthanthi 21:5.
VO FUNDU IYI YING’ANAMUWA: Vinthu vingakuyendiyani umampha asani mutesesa kulondo vo mwalemba. Mwaviyo, muziŵiyengi limu vinthu vo mukhumba kugula, mwechendaguli. Mukumbukengi kuti ndi vosi cha vo mukhumba pa umoyu winu vo mungafiska kugula. Venivi vikuwovyeningi kuti mugwiriskiyengi ntchitu ndalama zinu mwazeru.
VO MUNGACHITA:
Mulondongi bajeti yinu. Mulembengi vinthu vosi vo mukhumba kugula ndipu muviyikengi m’magulu. Pavuli paki musankhengi unandi wa ndalama zo mungagwiriskiya ntchitu pa gulu lelosi. Asani pa gulu linyaki mwananga ndalama zinandi kuphara zo mungunozgeke, mungatopu ndalama zo ze pa gulu linyaki kuti mugwiriskiyi ntchitu. Mwakuyeruzgiyapu, asani mwananga ndalama zinandi pa kugula mafuta nga galimotu kuphara zo mungunozgeke, mungagwiriskiya ntchitu ndalama zinyaki zo mungusungiya ntchitu yambula kukhumbika ukongwa.
Mungajanga ndi ngongoli cha. Asani vingachitika, mungajanga ndi ngongoli cha. Kweni musungengi ndalama zo mungaguliya vinthu vo mukhumba. Asani mugula vinthu pa ngongoli, mbumampha kupereka ndalama zosi pa nyengu yimoza kuti muzileki kupereka zapachanya. Kweni asani mwakongola ndalama zo mungaweza cha mwaliŵi, sankhani zuŵa lo mukhumba kuziweze, ndipu muyesesi kulondo vo mwalemba.
Kafukufuku munyaki walongo kuti asani ŵanthu agula vinthu pa ngongoli ananga ndalama zinandi. Asani ndimu viliri ndi yimwi, mutenere kugwiriskiya ntchitu ndalama mwazeru.
MUNGAJANGA ALESI CHA
FUNDU YA M’BAYIBOLU: “Munthu mulesi walima cha chifukwa cha kopa kuzizira, mwaviyo, wapemphesengi pa nyengu yakuvuna asani walivi kekosi.”—Nthanthi 20:4.
VO FUNDU IYI YING’ANAMUWA: Ulesi ungachitiska munthu kuja mukavu. Mwaviyo, mugwirengi ntchitu mwaphamphu ndipu muyesesengi kugwiriskiya ntchitu ndalama mwazeru.
VO MUNGACHITA:
Mugwirengi ntchitu mwaphamphu. Asani mugwira ntchitu mwaphamphu ndipuso mwakuthembeka, mabwana nginu ngangakuyanjani ukongwa ndipu angakutuzgani cha ntchitu.
Mujengi akugomezgeka. Mungabiyanga abwana ŵinu cha. Ziŵani kuti kuleka kugomezgeka kungananga mbiri yinu ndipu venivi vingachitiska kuti muzisuzgiki kusaniya ntchitu yinyaki.
Mungakhumbanga ndalama zinandi cha. Asani nyengu zosi mujaliya kukhumba ndalama zinandi mungananga umoyu winu ndipuso ubwezi winu ndi ŵanthu anyaki. Kumbukani kuti umoyu ngwakuzirwa ukongwa kuphara ndalama.
FUNDU ZINYAKI ZA M’BAYIBOLU
Ŵerengani Bayibolu la pa intaneti, lo lisanirika mu vineneru mahandiredi nganandi pa jw.org
MUNGANANGANGA NDALAMA ZINU PA VINTHU VAMBULA FUNDU CHA.
“Pakuti aloŵevu kweniso ankharyi akavukengi, ndipu kusiwa kuvwalikengi munthu malizwazwa.”—NTHANTHI 23:21.
MUNGAFIPANGA MTIMA CHA NDI NDALAMA.
“Lekani kufipiya mtima umoyu winu kuti muryengenji pamwenga mumwengenji, pamwenga liŵavu linu kuti muvwalengenji.”—MATEYU 6:25.
MUNGACHITANGA SANJI CHA.
“Munthu wasanji wakhumbisiska kukhupuka, kweni waziŵa cha kuti ukavu umusaniyengi.”—NTHANTHI 28:22.