PACHARU PACHITIKA VINTHU VAKOFYA

2 | Vikiliyani Ndalama Ndipuso Katundu Winu

NTCHIFUKWA WULI NKHWAKUKHUMBIKA?

Zuŵa lelosi, ŵanthu anandi asuzgika kuti asaniyi vinthu vakukhumbika pa umoyu. Vachitima kuti masuzgu ngo ngachitika pacharu, ngachitiska kuti kuŵi kwakusuzga ukongwa kusaniya vinthu venivi. Chifukwa wuli?

Asani muchigaŵa mwachitika vinthu vakofya, vinthu nge chakurya kweniso nyumba, vidula ukongwa.
Masoka ngangachitiska kuti ntchitu zimali pamwenga ŵanthu agwirengi ntchitu ya ndalama zimana.
Masoka nga chilengedu, ngangananga mabizinesi nga ŵanthu, nyumba pamwenga katundu yo ŵenayu. Venivi vingachitiska kuti ŵanthu anandi aŵi akavu.

Vo Mutenere Kuziŵa

Asani mugwiriskiya ntchitu umampha ndalama zinu, mungazisuzgika cha asani kwachitika soka.
Mukumbukengi kuti ndalama kweniso vinthu vo mwe navu, vingamala ntchitu.
Pe vinthu vinyaki vo ndalama zingagula cha, nge likondwa kweniso kukoliyana mubanja.

Vo Mungachita Pasonu Panu

Bayibolu likamba kuti: “Asani te ndi chakurya ndi vakuvwala, tije akukhorwa ndi vinthu venivi.”—1 Timote 6:8.

Asani tikhorwa, tikondwa ndi vinthu vakukhumbika vo te navu. Kuchita viyo nkhwakukhumbika ukongwa asani te ndi ndalama zimanavi.

Kuti mukhorwengi, mutenere kwamba kuja umoyu wambula kukhumba vinandi. Asani kanandi mugula vinthu vambula kukoliyana ndi ndamala zo musaniya, musuzgikengi ukongwa.

KUMBI MUNGAJIVIKILIYA WULI?—Fundu Zakovya

Pa nyengu yo kwachitika vinthu vakofya, vikiliyani ndalama ndipuso katundu winu mwakuchita vinthu ivi

MUNGAGULANGA VINTHU VINANDI CHA

Mungagulanga vinthu vinandi cha

Mungagulanga vinthu bweka cha, pijapija asani mutivikhumba nadi. Jifumbeni kuti: ‘Kumbi ndikhumbika nadi kugula galimotu? Kumbi ndingaŵa ndi kadimba ka mphangwi?’
Mwechendaguli chinthu, jifumbeni kuti: ‘Kumbi nditichikhumba nadi? Kumbi ndingafiska kuchigula?’
Pemphani chovyu ku boma pamwenga mawupu ngo ngatovya ŵanthu asani ngalipu.

“Nge banja, tinguja pasi ndi kukambiskana mo tachitiyanga vinthu pa umoyu. Tinguleka kugwiriskiya ntchitu ndalama zinandi pa vakusangaluska. Tingwamba so kugula chakurya chakutchipa.”—Gift.

MUPANGENGI BAJETI

Mupangengi bajeti

Bayibolu likamba kuti: “Vinthu vo munthu waphamphu waŵanaŵana vichitiska kuti vinthu viyendi umampha, kweni wosi wo achita vinthu mwakupupuluma akavukengi.” (Nthanthi 21:5) Bajeti yikuwovyeningi kuti vinthu vo mugula vingajumphanga cha ndalama zo musaniya.

Chakwamba, lembani ndalama zo muwona kuti musaniyengi pa mwezi.
Chachiŵi, lembani vinthu vo mukhumba kugula kweniso wonani mo mugwiriskiya ntchitu ndalama zinu pa mwezi.
Pavuli paki, wonesesani kuti mwe ndi ndalama yakukwana kuguliya vinthu vosi vo mukhumba. Asani muwona kuti ndalama yinu njimana, gulani vinthu vija vo mukhumbikiya nadi.

“Mwezi wewosi tilemba ndalama zo tisaniya ndipuso vinthu vo tikhumba kugula. Titesesa kusunga ndalama kuti tizizigwiriskiyi ntchitu pa vinthu vamabuchibuchi kweniso pa vinthu vo tikhumba kuzigula kunthazi. Asani tachita viyo, tifipa ukongwa mtima cha chifukwa tiziŵiya limu mo tazakuzigwiriskiya ntchitu.”—Carlos.

MUKHWECHENGI NGONGOLI / MUSUNGENGI NDALAMA

Mukhwechengi ngongoli / musungengi ndalama

Pangani bajeti yamampha kuti ngongoli zo mwe nazu zimaleku. Asani vingachitika, mungajanga ndi ngongoli cha. Mumalu mwaki, musungengi ndalama zakuguliya vinthu vo mukhumbika.
Mwezi wewosi musungengi ndalama zimanavi kuti muzizigwiriskiyi ntchitu pa vinthu vamabuchibuchi kweniso kuziguliya vinthu vo mukhumba kunthazi.

MULIMBIKIYENGI NTCHITU / MUPHWERIYENGI NTCHITU

Bayibolu likamba kuti: “Munthu weyosi yo wagwira ntchitu mwaphamphu wasaniya phindu.”—Nthanthi 14:23.

Mulimbikiyengi ntchitu / muphweriyengi ntchitu

Muyiwonengi mwakwenere ntchitu yo mugwira. Chinanga kuti ntchitu yo mugwira ndiyu mwakhumbanga cha, kweni yitikuwovyani kusaniya ndalama.
Muyesesengi kulimbikiya ntchitu kweniso kuja akuthembeka. Venivi vingakuwovyani kuti mulutirizgi kuja pa ntchitu pamwenga kuzisaniya yinyaki asani ntchitu yinu yazimala.

“Ndigwira ntchitu yeyosi yo yasanirika chinanga kuti nditiyiyanja cha pamwenga ndalama yaki njimana. Nyengu zosi ndithembeka pa ntchitu kweniso ndigwira umampha ukongwa ntchitu nge kuti njangu.”—Dmitriy.

Asani mupenja ntchitu . . .

Muchitengepu kanthu. Mbiyani pamwenga lembiyani ku kampani ko kungasanirika ntchitu chinanga kuti akamba cha kuti kwe ntchitu. Kambiyani mabwezi kweniso ŵanthu a mu banja linu kuti mupenja ntchitu.
Mujengi akunozgeka kusintha. Vingachitika cha kuti musaniyi ntchitu yo ye ndi chechosi cho mukhumba.