3. Ntchifukwa Wuli Ŵanthu Amampha Nawu Asuzgika?
Ntchifukwa Wuli Tikhumbika Kuziŵa Uneneska?
Weyosi watuvwa umampha cha mumtima ndipu vija vambula urunji asani tiwona ŵanthu amampha asuzgika. Kweniso vingalongo kuti palivi phindu lelosi chinanga munthu wangaja wamampha.
Ŵanaŵaniyani Ivi
Ŵanthu anyaki agomezga kuti taŵanthu titachibalika so kunyaki asani tafwa. Yiwu akamba kuti ŵanthu wo achita vamampha abalika so asani ŵafwa ndipu atamba so umoyu unyaki wamampha. Kweni wo achitanga viheni abalika so ndipu atachikumana ndi masuzgu ngakulu. Malinga ndi chigomezgu chenichi, chinanga mbanthu amampha nawu angakumana ndi masuzgu asani achitanga vinthu viheni pa “umoyu wawu wakali.” Kweni . . .
Kumbi kusuzgika kwenuku kungaŵa ndi phindu wuli asani munthu yo wakambika kuti wabalika so wakumbukapu chechosi cha cho wachitanga kali wechendabaliki so?
Ntchifukwa wuli tiyesesa kuja ndi umoyu wambula kutamatama kweniso kukhwecha ngozi asani umoyu wo tenawu sonu uthemba pa vo tachitanga kali techebaliki so?
KUTI MUZIŴI VINANDI
Woneriyani vidiyo yakuti Nchifukwa Wuli Chiuta Wazomerezga Kuti Tisuzgikengi? pa jw.org.
Vo Bayibolu Likamba
Masuzgu ntchilangu chakutuliya kwaku Chiuta cha.
Mumalu mwaki, masuzgu nganandi ngachitika mwamabuchibuchi ndipu kanandi ngatitiwiya chifukwa chakuti te pamalu ndipuso pa nyengu yiheni.
“Ndi nyengu zosi cha po ŵanthu wo atchimbiya ukongwa aphara pa maphara, ndi nyengu zosi cha po ŵanthu anthazi aphara pa nkhondu, ndi nyengu zosi cha po ŵanthu azeru aja ndi chakurya, ndi nyengu zosi cha po ŵanthu wo avwisa vinthu aja ndi chuma kweniso ndi nyengu zosi cha po ŵanthu wo aziŵa vinthu, vinthu vitiŵayende umampha, chifukwa nyengu ndipuso vinthu vamabuchibuchi viwiya wosi.”—WAKUTAULA 9:11.
Tikumana ndi masuzgu chifukwa cha ubudi wo tikuhara.
Kanandi ŵanthu agwiriskiya ntchitu mazu ngakuti “ubudi” asani akamba vinthu viheni vo ŵanthu achita. Kweni Bayibolu ligwiriskiya ntchitu mazu yanga pakukamba za ubudi wo ŵanthu amampha ndi aheni akuhara.
“Ndikubalika ndi mphulupulu, nde wakubuda kutuliya po ama angumere nthumbu yangu.”—SUMU 51:5.
Ubudi wo tikuhara watitimbanyiza ukongwa taŵanthu pacharu.
Ubudi wenuwu watimbinyiza ubwezi widu ndi Mlengi ndipu uchitiska so kuti maŵanaŵanu ngidu nganangiki, tileki kukoliyana ndi anyidu, kweniso wachitiska kuti ŵanthu achinangi ukongwa charu. Venivi vichitiska kuti munthu weyosi pacharu wasuzgikengi ukongwa.
“Asani ndikhumba kuchita chinthu chamampha, chiheni chija mwaku ini.”—AROMA 7:21.
“Chilengedu chosi chilutirizga kutamanthiya limoza ndipu chosi pamoza chituvwa urwirwi mpaka sonu.”—AROMA 8:22.