Muchezengi ndi Ŵanthu Akupambanapambana
Suzgu lo Liŵapu
Asani tikhwecha kucheza ndi ŵanthu wo titiŵawona mwambula kwenere, mtima wa sankhu wo tenawu ungakuwa ukongwa. Ndipu asani ticheza ndi ŵanthu wo ayanana nasi pe, tingayamba kuwona kuti isi ndisi tiŵanaŵana umampha kweniso tichita umampha vinthu kuluska ŵanthu anyaki.
Fundu ya mu Bayibolu
“Sanuzgani mitima yinu.”—2 AKORINTO 6:13.
Kumbi venivi ving’anamuwanji? “Mtima” widu umiya mo tivwiya kweniso vo titanja. Asani titanja ŵanthu wo tiyanana nawu pe, mtima widu ujalika pamwenga kuti uja ufinyi. Kuti tikhwechi suzgu lenili, titenere kucheza ndi ŵanthu akupambanapambana.
Kumbi Kuja ndi Mabwezi Ngakupambanapambana Kutovya Wuli?
Asani taŵaziŵa umampha anyidu, titamba kuvwisa chifukwa cho achitiya vinthu mwakupambana ndi isi. Ndipu asani tayamba kuŵayanja ukongwa, tiŵanaŵaniyaku cha kuti tipambana nawu vinthu vinyaki. Titiŵatumbika ukongwa ndipu asani akondwa, nasi tikondwa ndipu asani aliya, nasi tiliya.
Ŵanaŵaniyani chakuyeruzgiyapu chaku Nazaré. Iyu waŵasankhanga ŵanthu akutuliya ku vyaru vinyaki. Nazaré wangukamba vo vingumuwovya kuti waleki kuchita sankhu. Iyu wanguti: “Kanandi, ndachezanga nawu kweniso ndagwiranga nawu ntchitu. Ŵanthu ŵenaŵa nkharu yawu yenga yakupambana ukongwa ndi vo ŵanthu a muchigaŵa chidu akambanga vakukwaskana ndi yiwu. Asani wayamba kucheza ndi ŵanthu wo upambana nawu mtundu, uleka kuŵachitiya sankhu, utamba kuŵayanja ukongwa kweniso utamba kuŵawona kuti mbakuzirwa.”
Vo Mungachita
Musaniyengi mpata wakucheze ndi ŵanthu akutuliya ku vyaru vinyaki, amitundu yinyaki pamwenga wo alongoro chineneru chakupambana ndi chinu. Mungachita ivi
Apempheni kuti akukambiyeni vinthu vinyaki vakukwaskana ndi yiwu.
Muŵadanengi kuti mukaryiyi nawu limoza chakurya.
Muvwisiyengi po atikukambiyani vinthu vo vaŵachitikiyapu ndipu muwonengi vinthu vo awona kuti vakukhumbika kwaku yiwu.
Asani mutesesa kuziŵa mo umoyu wawu uliri chifukwa cha vo akukumanapu navu, vikuwovyeningi kuti muŵawonengi mwakwenere ŵanthu a mtundu wawu.