Ntchifukwa Wuli Ŵanthu Akuleka Kutumbikana?

**NTCHIFUKWA WULI KUTUMBIKA ANYIDU NKHWAKUKHUMBIKA UKONGWA?**

Asani titumbika anyidu vitovya kuti paleki kuŵa mphindanu kweniso kuti vinthu vileki kufika paheni ukongwa.

Nthanthi yinyaki ya mu Bayibolu yikamba kuti: “Kumuka mwakuzika kuweza ukali, kweni mazu ngaganyavu ngavunduwa ukali.” (Nthanthi 15:1) Asani tilongoro mwaganyavu pamwenga asani tichita vinthu mwambula ulemu vinthu vinganangika ukongwa.
Yesu wangukamba kuti: “Mulomu ulongoro vo vazaza mumtima.” (Mateyu 12:34) Asani tilongoro mwaganyavu vilongo waka mo tiwone ŵanthu a mitundu yinyaki, a muvyaru vinyaki kweniso wo tipambana nawu vinthu vinyaki.

Pambula kuswera yapa, ŵanthu akujumpha 32,000 akutuliya muvyaru 28 angufumbika mafumbu pa nkhani ya kuleka kutumbikana. Ndipu ŵanthu akujumpha hafu ya ŵanthu ŵenaŵa, angukamba kuti vo vichitika mazuŵa nganu vachilendu ukongwa.

KUMBI MUNGALONGO WULI KUTI MUTUMBIKA ŴANTHU?

Mutumbikengi ŵanthu wosi kwali nkhu sukulu pamwenga ku ntchitu, chinanga kuti angaŵa ndi maŵanaŵanu ngakupambana ndi nginu. Muwonengi vinthu vo mosi mungakoliyana. Venivi vingakuwovyani kuti muleki kuyeruzga anyinu.

“Lekani kuyeruzga ŵanthu kuti namwi muleki kuyeruzgika.”—Mateyu 7:1.

Muchitiyengi anyinu vinthu vo mukhumba kuti akuchitiyeni. Asani muchitiya lisungu ŵanthu, nawu akuchitiyeningi lisungu.

“Vinthu vosi vo mukhumba kuti ŵanthu akuchitiyeni, namwi muŵachitiyi venivo.”—Luka 6:31.

Mugowokiyengi anyinu. Musulengeku waka vo anyinu akunangiyani.

“Zeru za munthu zichitiska kuti ukali waki ugowoki, ndipu kuziŵaniza vo munthu wamunangiya, kuchitiska kuti wawoneki wakutowa.”—Nthanthi 19:11.

Mu Nyumba ya Ufumu ya Akaboni aku Yehova maunganu ngechendayambi. Ŵanthu a vyaka kweniso mitundu yakupambanapambana atawuzgana kweniso acheza.

Mu Nyumba ya Ufumu ya Akaboni aku Yehova maunganu ngechendayambi. Ŵanthu a vyaka vakupambanapambana kweniso mitundu yakupambanapambana atawuzgana kweniso acheza.

KUMBI AKABONI AKU YEHOVA ATOVYA WULI ŴANTHU KUTI ATUMBIKENGI ANYAWU?

Akaboni aku Yehova atumbika anyawu muchigaŵa cho aja kweniso ko agwira ntchitu.

Tisambiza ŵanthu Bayibolu kwawezi kweni titiŵachichizga cha kuti agomezgengi vo isi tigomezga. Mumalu mwaki, tigwiriskiya ntchitu ulongozgi wa mu Bayibolu asani tipharazga uthenga “mwakuzika kweniso ndi ulemu ukulu.”—1 Peturo 3:15; 2 Timote 2:24.

Tisankhana mtundu cha kweni tilondere weyosi pa mawunganu ngidu yo wakhumba kuziŵa vo Bayibolu lisambiza. Tizomereza maŵanaŵanu nga anyidu kweniso ‘titumbika ŵanthu amitundu yosi.’—1 Peturo 2:17.

Titumbika ŵaraŵara a boma a muchigaŵa cho tija. (Aroma 13:1) Tivwiya dangu la boma ndipuso tipereka msonkhu. Chinanga kuti tiseleriyamu cha mu vakuchitika va ndali kweni titumbika wanangwa wa anyidu pa vo asankha pa nkhani yakukwaskana ndi ndali.