Chiuta Wasankha Davidi

KUMBI waviwona vo vachitika yapa? Mnyamata uyu wapozomoska mwana wa mbereri ku chimbalangondu. Ichu chinguko mbereri kuti chikaryi. Kweni mnyamata yo wanguchitchimbiriya ndi kuchilonda mbereri ku mulomu. Sonu chimbalangondu cho chakhumbanga kuti chimulondi so, kweni mnyamata yo wanguchiko ndi kuchibaya. Nyengu yinyaki iyu wangulondeska mbereri ku nkharamu. Mnyamata uyu, ngwambula mantha. Kumbi wamuziŵa kuti ndi yani?

Mnyamata uyu ndi Davidi. Iyu wajanga mu msumba wa Betelehemu ndipu wenga mzuku waku Obede, mwana waku Ruti ndi Boazi. Kumbi utiŵakumbuka? Awiski aku Davidi ŵenga a Jese. Davidi waliskanga mbereri za awiski. Iyu wanguwaku pati pajumpha vyaka 10, kutuliya panyengu yo Yehova wangusankha Sauli kuja fumu.

Nyengu yinyaki Yehova wangukambiya Samuele kuti: ‘To mafuta ngapade ndipu uluti ku Betelehemu, ku nyumba yaku Jese. Ndasankha yumoza wa ŵana ŵaki kuti waje fumu.’ Sonu Samuele wati wawona Eliabu mwana wakwamba waku Jese, wangukamba chamumtima kuti: ‘Uyu ndiyu nadi yo Yehova wamusankha.’ Kweni Yehova wangumukambiya kuti: ‘Ungawonanga utali pamwenga kutowa kwaki cha. Ndasankha iyu cha kuja fumu.’

Sonu Jese wangudana mwana waki Abinadabu ndipu wanguza nayu kwaku Samuele. Kweni Samuele wanguti: ‘Awa, Yehova wasankha uyu cha.’ Ndipu Jese wanguza ndi mwana waki Shama. Kweni Samuele wanguti: ‘Awa, Yehova wasankha uyu cha.’ Jese wanguza ndi ŵana ŵaki 7 kwaku Samuele, kweni pengavi yo Yehova wangusankhapu. Sonu Samuele wangufumba kuti: ‘Kumbi ŵana anthurumi wo wenawu mbenaŵa pe?’

Jese wangumuka kuti: ‘Yo wajaku ngwakumaliya kweni waluta kuchiliska mbereri.’ Sonu Davidi wati waza, Samuele wanguwona kuti wenga mnyamata wakutowa. Ndipu Yehova wanguti: ‘Uyu ndiyu ndasankha. Punguliya mafuta pamutu waki.’ Ivi ndivu Samuele wanguchita nadi. Sonu kunthazi Davidi ndiyu wanguzija fumu ya Yisraele.