Mizimu Yechendajepu ndi Umoyu Pacharu Chapasi ndi Kufwa

Mizimu yiliku! Ku malu nga mizimu ngambula kuwoneka kwe mizimu yamampha ndi yiheni viyo. Kumbi mizimu iyi, mbanthu akufwa wo ŵenga ndi umoyu pacharu?

Awa. Asani munthu wafwa, waluta ku charu cha mizimu cha, nge mo ŵanthu anandi aŵanaŵaniya. Kumbi tiziŵa wuli venivi? Chifukwa ndivu Bayibolo likamba. Bayibolo ndi buku la uneneska lakutuwa kwaku Chiuta yija wauneneska, yo zina laki ndi Yehova. Yehova ndiyu wakulenga ŵanthu ndipu waziŵa umampha ukongwa vo vitiŵachitikiya asani ŵafwa.—Sumu 83:18; 2 Timote 3:16.

Bayibolo likamba kuti Chiuta wangulenga munthu wakwamba, Adamu “ndi fuvu la nyata.” (Chiyambo 2:7) Chiuta wangumuŵika mu Paradayisu, m’munda wa Edene. Asani Adamu wanguvwiya dangu laku Yehova watingi wafwengi cha; iyu mphanyi weche ndi umoyu pacharu chapasi mpaka sonu. Kweni Adamu wati waswiya dala dangu laku Chiuta, Chiuta wangumukambiya kuti: “Uweriyengi ku nyata. Pakuti ungutoleka mwenimo; ndiwi fuvu, ndipu ukaweriyanga ku fuvu.”—Chiyambo 3:19.

Kumbi mazu yanga ngang’anamuwanji? Kumbi Adamu wenga pani Yehova wechendamulengi kutuwa ku fuvu? Wenga kwekosi cha. Iyu wenga kuchanya cha nge mzimu wambula kuwaku. Adamu kwengavi. Mwaviyo, po Yehova wakambanga kuti Adamu ‘waweriyengi ku fuvu,’ wang’anamuwanga kuti Adamu wafwengi. Iyu wakuluta ku malu nga mizimu cha. Adamu wati wafwa wanguleka kuja ndi umoyu pamwenga kuti kwengavi. Nyifwa nkhumala kwa umoyu.

Sonu nanga ŵanthu anyaki wo akufwa, kumbi nawu so kulivi? Bayibolo limuka kuti:

• “Vosi [ŵanthu ndi nyama] viluta ku malu ngamoza vosi vakutuliya ku fuvu, ndipu vosi viwere so ku fuvu.”—Wakutaula 3:20.

• “Ŵakufwa . . . ŵaziŵa kanthu cha.”—Wakutaula 9:5.

• “Chanju chawu, tinkhu lawu, ndi sanji yawu vamara kali.”—Wakutaula 9:6.

• “Kulivi nchitu pamwenga maŵanaŵanu pamwenga kuziŵa pamwenga vinjeru mu muunda mwenimo ukarutanga.”—Wakutaula 9:10.

• “[Munthu] wawere ku dongu; pa zuŵa leniliya maŵanaŵanu ngaki ngosi ngagota.”—Sumu 146:4.

Kumbi muwona kuti nkhwakusuzga kuvwisa malemba yanga? Asani ndi viyo, ŵanaŵaniyani ivi: M’mabanja nganandi, munthurumi ndiyu wapenja ndalama zakovye banja laki. Asani wafwa, kanandi banja laki lisuzgika. Nyengu zinyaki muwolu waki ndi ŵana aŵavi ndalama zakukwana zakuguliya chakurya. Akhumba arwani a munthu uyu angasuzga so banja laki. Sonu jifumbeni kuti: ‘Asani munthu uyu ngwamoyu ku charu cha mizimu, nchifukwa wuli waleka kulutirizga kuphwere banja laki? Walekiyanji kuvikiliya banja laki ku ŵanthu aheni?’ Chifukwa chaki nchakuti Malemba nganeneska. Munthu yo ngwamoyu cha, wangafiska cha kuchita chechosi.—Sumu 115:17.

Kumbi ivi ving’anamuwa kuti akufwa azamuja ndi umoyu so cha? Awa. Tikambiskanengi va chiyuka kunthazi. Kweni ivi ving’anamuwa kuti ŵanthu akufwa aziŵa cha vo imwi muchita. Yiwu angakuwonani, kukuvwani, pamwenga so kulongoro namwi cha. Mungaŵawopanga cha. Angakuwovyani cha, ndipuso angakupwetekani cha.—Wakutaula 9:4; Yesaya 26:14.