Chigaŵa 1
Kumbi Chiuta Watitiŵanaŵaniya Nadi?
1, 2. Kumbi ŵanthu afumba fumbu nili lakukwaskana ndi Chiuta, ndipu nchifukwa wuli?
AKHUMBA nyengu yinyaki mukujifumbapu kuti: ‘Asani kwe Chiuta yo watitiŵanaŵaniya nadi, nchifukwa wuli wazomerezga kuti tisuzgikengi viyo?’ Taŵanthu tosi tisuzgika pamwenga tiziŵa munthu munyaki yo wasuzgika.
2 Kwamba kali ŵanthu aja achisuzgika chifukwa cha nkhondu, nkhaza, kuswa marangu, kusoŵeka kwa urunji, ukavu, matenda ndipuso nyifwa ya akwanjiwa ŵawu. Mu vyaka va m’ma 1900 pe, ŵanthu akujumpha 100 miliyoni akubayika pa nkhondu. Anyaki so mamiliyoni nganandi angupwetekeka pamwenga kutaya nyumba ndi katundu wawu. Kuruska kali, mazuŵa nganu kuchitika vinthu viheni vinandi ukongwa vo vichitiska kuti ŵanthu anandi aje ndi chitima, aliyengi ndipuso kuti aŵevi chilindizga.
3, 4. Kumbi ŵanthu anandi aŵanaŵana wuli pa nkhani ya masuzgu ngo Chiuta wazomerezga?
3 Anyaki akwiya ndipu akamba kuti, asani Chiuta waliku ndikuti watitiŵanaŵaniya cha. Akhoza so kuŵanaŵana kuti kulivi Chiuta. Mwakuyeruzgiyapu, munthu munyaki yo wangusuzgika chifukwa chakusankhana mitundu, ko kunguchitiska kuti abwezi ŵaki ndi abali ŵaki abayiki pa Nkhondu Yakwamba ya Charu Chosi, wanguti: “Chiuta wenga pani pa nyengu yo tamukhumbanga ukongwa?” Munthu munyaki so yo wangupozomoka pa Nkhondu Yachiŵi ya Charu Chosi, po Anazi angubaya ŵanthu mamiliyoni nganandi, wenga ndi chitima ukongwa chifukwa chakuwona po ŵanthu angusuzgikiya, iyu wanguti: “Asani munganyanga mtima wangu, mukhoza kufwa.”
4 Ndichu chifukwa chaki ŵanthu avwisa cha chifukwa cho Chiuta wamampha wazomereze kuti vinthu viheni vichitikengi. Yiwu akayika asani watitiŵanaŵaniya pamwenga asani waliku nadi. Ndipu ŵanthu anandi aŵanaŵana kuti umoyu wa ŵanthu ukhumbika kuja ndi masuzgu nyengu zosi.
[Chithuzi papeji 2, 3]
Kumbi charu chifya chambula masuzgu chepafupi?