Chigaŵa 2
Charu Chambula Masuzgu
1, 2. Kumbi ndi maŵanaŵanu nanga ngo ŵanthu anyaki ŵe nangu?
CHINANGA wuli ve viyo, ŵanthu mamiliyoni nganandi awona nkhani iyi mwakupambana. Yiwu awona kuti vinthu vazamuja umampha ukongwa kunthazi. Akamba kuti pambula kuswera yapa, charu chapasi chazamuja chambula uheni wewosi ndi masuzgu. Ŵe ndi chigomezgu chosi kuti vinthu viheni vosi vazamutuzgikapu pambula kuswera yapa ndipu charu chifya chazamujalikiskika. Akamba so kuti chiŵanja cha charu chifya chipangika sonu!
2 Ŵanthu yaŵa agomezga kuti charu chifya chazamuja chambula nkhondu, nkhaza, kuswa marangu, ukavu ndipu ŵanthu azamuchitanga vinthu mwaurunji. Chazamuja charu chambula matenda, chitima, kuliya kweniso nyifwa. Pa nyengu iyi ŵanthu azamuja akufikapu ndipu azamuja ndi umoyu wambula kumala mwalikondwa mu paradayisu pa charu chapasi. Kweniso ŵanthu akufwa azamuyuskika ndipu azamuja ndi mwaŵi wakulonde umoyu wamuyaya!
3, 4. Kumbi nchifukwa wuli ŵanthu yaŵa asimikizga kuti vo aŵanaŵana vauneneska?
3 Kumbi vo ŵanthu yaŵa aŵanaŵana vakukwaskana ndi mo vinthu vazamujaliya kunthazi ndi malotu waka, pamwenga ndi maŵanaŵanu ngakukhumba waka vinthu vamampha? Awa. Aŵanaŵana viyo chifukwa chakuti ŵe ndi chigomezgu chakukho chakuti Paradayisu uyu watondekengi cha. (Ŵahebere 11:1) Nchifukwa wuli asimikizga viyo? Chifukwa chakuti Mlengi wanthazi zosi ndiyu wakulayizga.
4 Pakukamba va malayizgu ngaku Chiuta, Bayibolo likamba kuti: “Palivi kanthu kamoza ka vinthu vamampha vo Yehova Chiuta winu wangupangana paku imwi katondeka; vosi vafiskikiya imwi, palivi ko katondeka.” “Chiuta kuti ndi munthu cha, kuti wanami . . . Kumbi cho wakamba, kuti wakachitanga cha? Pamwenga cho wanena kuti wakachifiskanga cha?” “Ambuya [Yehova] ŵa maŵanja ŵarapa: ‘Uli ndimo ndarongosole ndimu kukaŵiyanga, nge ndimo ndapimiya, viyo ndimu kukamuŵiyanga.’”—Yoswa 23:14; Maŵerengedu 23:19; Yesaya 14:24.
5. Kumbi ndi mafumbu nanga ngo ngatenere kumukika?
5 Kweni, asani Chiuta wakhumbanga kuti charu chapasi chije paradayisu wambula masuzgu, nchifukwa wuli wanguzomereza kuti vinthu viheni viyambi kuchitika? Nchifukwa wuli walindizga kuti papiti vyaka vakujumpha 6,000 wechendanozgi vinthu vo vikunangika? Kumbi vyaka vinandi vo taja tichisuzgika, vilongo kuti Chiuta watitiŵanaŵaniya nadi cha, pamwenga kuti iyu kulivi?