Chigaŵa 6
Chifukwa cho Chiuta Wazomereze Masuzgu
1, 2. Kumbi apapi ŵidu akwamba angutimbanyiza wuli chiyambi chamampha cha vinthu vo Chiuta wanguŵapaska?
KUMBI nchinthu wuli cho chingunangika? Kumbi panguchitika chinthu wuli cho chingutimbanyiza chiyambi chamampha cha vinthu vo Chiuta wangupasa apapi ŵidu akwamba mu Paradayisu wa mu Edeni? Kumbi nchifukwa wuli uheni kweniso kusuzgika vajapu kwa vyaka vinandi, m’malu mwa chimangu ndi kukoliyanaku kwa mu Paradayisu?
2 Nchifukwa chakuti Adamu ndi Eva angugwiriskiya nchitu wanangwa wawu mwabula kwenere. Anguluwa fundu yakuti vinthu vingaŵayende umampha cha kwambula Chiuta ndi marangu ngaki. Yiwu angusankha kujimiya pakuŵija kwambula Chiuta ndipu aŵanaŵananga kuti vinthu viŵayendiyengi umampha ukongwa pa umoyu wawu. Mwaviyo, yiwu angugwiriskiya nchitu wanangwa wawu wakusankha mwakujumpha mphaka yo Chiuta wanguŵapaska.—Chiyambo, Chaputala 3.
Nkhani Yakukwaskana ndi yo Ngwakwenere Kuwusa
3-5. Kumbi Chiuta wangulekiyanji kubaya Adamu ndi Eva ndi kulenga so ŵanthu anyaki?
3 Kumbi Chiuta wangulekiyanji kubaya Adamu ndi Eva ndi kulenga so ŵanthu anyaki? Chenga chifukwa chakuti iyu wangususkika kuti ngwakwenere cha kuwusa chilengedu chosi.
4 Fumbu ndakuti: Kumbi ndiyani yo watenere kuwusa, ndipu ndi muwusu wakuyani wo ngwakwenere? Chiuta ngwakwenere kuwusa chilengedu chosi chifukwa chakuti ngwanthazizosi ndipuso ndiyu Wakulenga vinthu vosi. Chifukwa chakuti ngwazeru ukongwa kuruska chinthu chechosi, muwusu waki ndiwu wamampha ukongwa ku vakulengeka vosi. Kweni muwusu waku Chiuta ukususkika. Ndipuso, kumbi chilipu chinyaki cho chingunangika pakulenga munthu? Kunthazi uku, tikambiskanengi fumbu lakukwaskana ndi kugomezgeka kwa munthu.
5 Chifukwa chakuti ŵanthu angwamba kujimiya pakuŵija kwambula Chiuta, pangubuka fumbu linyaki lakuti: Kumbi vinthu vingaŵayende umampha ŵanthu kwambula muwusu waku Chiuta? Mlengi waziŵanga umampha kwamuka kwa fumbu ili, kweni kuti ŵanthu aziŵi umampha pakhumbikanga kuŵapaska wanangwa wosi wo akhumbanga. Mwaviyo, ŵanthu ŵati asankha kujimiya pakuŵija, Chiuta wanguŵazomereza.
6, 7. Kumbi nchifukwa wuli Chiuta wazomereza kuti ŵanthu aje ndi wanangwa wakukwana kwa nyengu yitali viyo?
6 Mwakupereka mpata ukulu wakuti ŵanthu agwiriskiyi nchitu wanangwa wawu wosi, Chiuta wakujalikiska nthowa yakuti ŵanthu alongo asani angaja umampha ndi muwusu waki pamwenga pakuŵija. Ndipu nyengu yo wazomereza yitenere kuja yakukwana kuti ŵanthu achiti vosi vo awona kuti vingaŵawovya kufiska vilatu vawu, kaya pankhani za ndali, vakupangapanga, sayansi, ndipuso va chipatala.
7 Chiuta wazomereza kuti ŵanthu ajiwusi kwambula kusereriyapu mpaka sonu ndi chilatu chakuti ajiwone ŵija asani muwusu wa munthu ungayenda umampha kwambula iyu. Mwaviyo, ŵanthu atijisankhiya ŵija pakati pa lisungu ndi nkhaza, chanju ndi kutinkhana, urunji ndi vinthu vambula urunji. Kweniso akumana ndi vakutuwapu va vinthu vo asankha: umampha ndi chimangu pamwenga uheni ndi masuzgu.
Kugaruka kwa Vakulengeka Vauzimu
8, 9. (a) Kumbi kugaruka kungwamba wuli kuchanya? (b) Kumbi Satana wanguchitisa so ayani kuti agaruki nge Adamu ndi Eva?
8 Pe fundu yinyaki so yo titenere kuyiŵanaŵaniya. Apapi ŵidu akwamba ndiwu pe cha wo angugarukiya muwusu waku Chiuta. Nanga mbayani so anyaki wo ŵengaku pa nyengu iyi? Kwenga vakulengeka vauzimu. Chiuta wechendalengi ŵanthu, wangulenga angelu anandi munthowa yapade ukongwa kuti ajengi kuchanya. Nawuso angulengeka ndi mwaŵi wakusankha ŵija vakuchita kweniso akhumbikanga kuvwiya muwusu waku Chiuta.—Jobu 38:7; Sumu 104:4; Chivumbuzi 5:11.
9 Bayibolo lilongo kuti vakulengeka vauzimu ndivu vingwamba kugaruka. Mungelu munyaki wakhumbanga kuti waje ndi wanangwa wosi. Iyu wakhumbanga so kuti ŵanthu amusopengi. (Mateyu 4:8, 9) Mungelu uyu ndiyu wanguchitisa kuti Adamu ndi Eva agaruki, mwakukamba boza lakuti Chiuta waŵanolanga chinthu chinyaki chamampha ukongwa. (Chiyambo 3:1-5) Ndichu chifukwa chaki wadanika kuti Diabolo (Waboza) ndipuso Satana (Wakususka). Pavuli paki, wangunyenga so angelu anyaki kuti agaruki. Angelu yaŵa angwamba kudanika kuti viŵanda.—Marangu 32:17; Chivumbuzi 12:9; 16:14.
10. Kumbi nchinthu wuli cho chinguchitika chifukwa cha kugaruka kwa ŵanthu ndi vakulengeka vauzimu?
10 Ŵanthu ŵati agarukiya Chiuta, angujisereza mu suzgu yakuwusika ndi Satana ndi viŵanda vaki. Ndichu chifukwa chaki Bayibolo likamba kuti Satana ndi “chiuta wa mgonezi unu,” yo “waburumutizga vinjeru va ŵambura chivwanu.” Lekani mazu ngaku Chiuta ngakamba kuti “charu chosi chira mu nthazi ya muheni yo.” Ndipu Yesu wangukamba kuti Satana ndi “muusi wa charu ichi.”—2 Ŵakorinte 4:4; 1 Yohane 5:19; Yohane 12:31.
Nkhani Ziŵi zo Zingubuka
11. Kumbi Satana wangususka Chiuta pa nkhani yinyaki niyi?
11 Satana wangwambisa so nkhani yinyaki yakususka Chiuta. Vo wangukamba vilongo kuti wang’anamuwanga kuti Chiuta wanguŵalenga umampha cha ŵanthu ndipu palivi munthu yo wangachita vinthu vamampha asani wangakumana ndi suzgu. Kweniso iyu wangukamba kuti asani munthu wangakumana ndi mayeseru wakhoza kutuka Chiuta. (Jobu 2:1-5) Ivi vilongo kuti Satana wangususka kuti ŵanthu wosi angaja cha akongorekwa.
12-14. Kumbi nyengu yilongongi wuli uneneska wa nkhani ziŵi zo Satana wangwambisa?
12 Pachifukwa ichi, Chiuta wazomereza kuti pajumphi nyengu yitali kuti vakulengeka vaki vosi vazeru viwoni mo iyu wamaliskiyengi nkhani iyi kweniso nkhani ya muwusu waki. (Yeruzgiyani ndi Chituwa 9:16.) Vo ŵanthu akumanengi navu mu mbiri yosi ya umoyu wawu ndivu vilongongi uneneska wa nkhani ziŵi izi.
13 Chakwamba, kumbi nyengu yilongongi wuli uneneska wa nkhani yakuti Chiuta ndiyu ngwakwenere kuwusa chilengedu chosi? Kumbi ŵanthu angajiwusa umampha kwambula Chiuta? Kumbi pe boma lelosi la ŵanthu lo lingalongozge ŵanthu ku charu chambula nkhondu, chambula kuswa marangu ndipuso chaurunji? Kumbi lilipu boma lo lingatuzgiyapu limu ukavu ndi kuchitisa ŵanthu kuti asakati? Ndi boma nili lo lingatuzgapu matenda, ukoti ndi nyifwa? Muwusu waku Chiuta ndiwu ngwakwenere kuchita vinthu vosi ivi.—Chiyambo 1:26-31.
14 Chachiŵi, kumbi nyengu yilongongi wuli uneneska wa nkhani yakuti Chiuta wanguchita umampha kulenga munthu? Kumbi Chiuta wanguŵalenga nadi umampha cha ŵanthu? Pa ŵanthu wo angulengeka, kumbi walipu yo watingi wachitengi vinthu vamampha chinanga kuti wangakumana ndi mayeseru? Kumbi alipu ŵanthu wo atingi alongongi kuti akhumba muwusu waku Chiuta m’malu mwa muwusu wa munthu?
[Chithuzi papeji 13]
Chiuta wapereka nyengu yakuti ŵanthu afiski vakukhumba vawu
[Kukonkhoska Chithuzi]
Shuttle: Based on NASA photox