Chigaŵa 8
Chilatu Chaku Chiuta Chepafupi Kufiskika
1, 2. Kumbi Chiuta waja wachinozga wuli nthowa yakutuzgiyapu masuzgu ngosi?
ŴANTHU akugaruka ndipuso viŵanda awusa ŵanthu mwakukandirizga kwa vyaka vinandi. Kweni Chiuta waleka cha kuziŵa kuti tisuzgika. M’malu mwaki, mu vyaka vosi ivi, waja wachinozga nthowa yo wafwatuliyengi mtundu wa ŵanthu ku vinthu viheni ndipuso masuzgu ngo akumana nangu.
2 Pa nyengu yo ŵanthu angugaruka mu munda wa Edene, Chiuta wangwamba kuvumbuwa chilatu chaki chakuti wapangengi boma lo lisambuskengi charu kuja paradayisu wakujamu ŵanthu. (Chiyambo 3:15) Pavuli paki, nge wakuŵereŵete Chiuta mura, Yesu wagwiriskiyanga nchitu boma ili nge mutu wa vo wasambizanga. Iyu wakambanga kuti boma ili ndilu lija lo mtundu wa ŵanthu utenere kukhazga.—Danyele 2:44; Mateyu 6:9, 10; 12:21.
3. Kumbi Yesu wangulidana kuti wuli boma lo lazamuwusa charu, ndipu nchifukwa wuli wangulidana viyo?
3 Yesu wangukamba kuti boma laku Chiuta lo lituza lidanika “ufumu wa kuchanya,” chifukwa chakuti uwusiyengi kuchanya. (Mateyu 4:17) Wanguwudana so kuti “ufumu waku Chiuta,” chifukwa chakuti Mweneku ndi Chiuta. (Luka 17:20) Vyaka mahandiredi nganandi ngo ngajumpha, Chiuta wangukambiya akulemba Bayibolo kuti alembi mauchimi ngakukwaskana ndi wo azamupanga boma ili ndipuso vo lazamuchita.
Fumu Yifya ya Charu Chapasi
4, 5. Kumbi Chiuta wangulongo wuli kuti Yesu ndiyu Fumu yaki yakusankhika?
4 Uchimi wakukwaskana ndi yo wazamuja Fumu ya Ufumu waku Chiuta, ungufiskikiya paku Yesu vyaka pafufupi 2,000 kuvuli uku. Iyu wanguchita vinthu vakulongo kuti ndiyu wakusankhika ndi Chiuta kuti Wawusi ŵanthu mu boma lakuchanya ili. Pavuli pa nyifwa yaki, Chiuta wangumuyuskiya kuchanya nge chakulengeka chauzimu chanthazi kweniso cha umoyu wambula kufwa. Penga ŵanthu anandi wo anguchitiya ukaboni kuti Yesu wayuka.—Machitidu 4:10; 9:1-9; Ŵaroma 1:1-4; 1 Ŵakorinte 15:3-8.
5 Wati waluta kuchanya, Yesu ‘wanguja pasi ku janja la maryi laku Chiuta.’ (Ŵahebere 10:12) Iyu walindizganga nyengu yo Chiuta watingi wamupaskiyengi nthazi zakuti wachiti vinthu vakulongo kuti ndi Fumu yaku Chiuta ya Ufumu wakuchanya. Ivi vingufiska uchimi wa pa Sumu 110:1, po Chiuta wangumukambiya kuti: “Uje ku janja langu la kuryiya, mpaka po ndaŵika ŵamawongu ŵaku kusi ku marwayu [malundi] ngaku.”
6. Kumbi Yesu wangulongo wuli kuti wenga wakwenere kuja Fumu ya Ufumu waku Chiuta?
6 Pa nyengu yo wenga pacharu chapasi, Yesu wangulongo kuti wenga wakwenere udindu uwu. Iyu wangusunga ukongorekwa waki kwaku Chiuta chinanga kuti watombozgekanga. Vo wanguchita vingulongo kuti Satana wapusikanga po wangukamba kuti palivi munthu yo wangaja wakugomezgeka kwaku Chiuta asani wakumana ndi mayeseru. Yesu, munthu wakufikapu ndipuso ‘Adamu wachiŵi,’ wangulongo kuti Chiuta wangunangiska cha pakulenga ŵanthu ambula ubudi wewosi.—1 Ŵakorinte 15:22, 45; Mateyu 4:1-11.
7, 8. Kumbi ndi vinthu vamampha nivi vo Yesu wanguchita pa nyengu yo wenga pacharu chapasi, nanga wangulongo kuti wazamuchitanji kunthazi?
7 Kumbi ndi fumu niyi yo yachitapu vinthu vamampha ukongwa vo Yesu wanguchita mu vyaka vimanavi va umoyu waki po wenga pacharu chapasi? Nthazi yaku Chiuta ya mzimu utuŵa yingovya Yesu kuti wachizgi akutama, akupunduka, achibulumutiya kweniso ambula kuvwa ndi kulongoro. Iyu wanguyuska chinanga mbakufwa. Vinthu vimanavi vo wanguchita vingulongo vo wazamuchitiya mtundu wosi wa ŵanthu pa nyengu yo wazamuwusiya charu chapasi nge Fumu.—Mateyu 15:30, 31; Luka 7:11-16.
8 Yesu wanguchita vinthu vamampha vinandi ukongwa pa nyengu yo wenga pacharu chapasi, mwakuti wakusambira waki Yohane wangukamba kuti: “Kweni kwe vinyaki vinandi so vo Yesu wanguchita, venivo asani vingulembeka chimoza-chimoza, ndiŵanaŵana kuti chingana ndi charu ichu kuti chatingi chiziŵengi cha kufungiya mabuku ngo ngatingi ngalembekengi.”—Yohane 21:25.a
9. Kumbi nchifukwa wuli ŵanthu a mtima wamampha alutanga kwaku Yesu?
9 Yesu wachitiyanga ŵanthu lisungu ndi chitima kweniso waŵayanjanga ukongwa. Iyu wawovyanga ŵanthu akavu ndipuso akukandirizgika, kweni waŵapambanisanga cha ndi ŵanthu akukhupuka pamwenga ŵanthu a maudindu. Ŵanthu amtima wamampha anguchitapu kanthu mwaliŵi Yesu wati waŵadana kuti: “Zani kwaku ini, mosi mwaŵakudinirwa ndi mwaŵakuzitiskika, ndipu ini ndikupumuzganingi; jitoleni pinu goŵa langu, ndi sambirani kwaku ini; pakuti ndini mpovu [wakufwasa] ndi wakujiyuyuwa mu mtima: ndipu musaniyengi chipumulu ku mizimu yinu. Chifukwa goŵa langu ndakoroŵa, ndi chifinga changu nchiyuyu.” (Mateyu 11:28-30) Ŵanthu akopa Chiuta alutanga kwaku Yesu ndipu alindizganga muwusu waki.—Yohane 12:19.
Wo Amuwusiya Nayu Limoza
10, 11. Kumbi mbayani wo azamuwusa charu limoza ndi Yesu?
10 Nge mo maboma nga ŵanthu ngajaliya ndi ŵanthu wo awusa ndi pulezidenti, ndimuso Ufumu waku Chiuta wakuchanya uliri. Pe ŵanthu anyaki so wo azamuwusa charu limoza ndi Yesu, chifukwa chakuti Yesu wangulayizga anyaki wo wenga nawu pacharu chapasi kuti azamuwusa mtundu wa ŵanthu ndi iyu nge mafumu.—Yohane 14:2, 3; Chivumbuzi 5:10; 20:6.
11 Ndichu chifukwa chaki ŵanthu amanavi ayuskikiya kuchanya nge Yesu. Yiwu apanga Ufumu waku Chiuta wo wazamuchitisa kuti mtundu wa ŵanthu uzilonde vitumbiku vamuyaya. (2 Ŵakorinte 4:14; Chivumbuzi 14:1-3) Mwaviyo, Yehova wakwamba kali kunozga nthowa ya muwusu wo wazamuchitisa kuti mtundu wa ŵanthu uzilonde vitumbiku vambula kumala.
Muwusu wa Ŵanthu Umalengi
12, 13. Kumbi Ufumu waku Chiuta ngwakunozgeka kuchitanji sonu?
12 Mu nyengu yidu yinu, Chiuta wachitapu kanthu pa vakuchitika va charu chapasi. Nge mo tiwoniyengi mu Chigaŵa 9 cha kabuku yaka, uchimi wa m’Bayibolo, ulongo kuti Ufumu waku Chiuta wakuwusika ndi Khristu, ukujalikiskika mu 1914 ndipu sonu ngwakunozgeka kuphwanya mgonezi wosi waku Satana. Ufumu uwu ngwakunozgeka ‘kuthereska pakati pa ŵarwani [ŵaku Khristu].’—Sumu 110:2.
13 Pachifukwa ichi, uchimi wa pa Danyele 2:44 ukamba kuti: “Ndipu mu mazuŵa nga mafumu ngo, [ngo ngalipu sonu] Chiuta wakuchanya wazamujalikiska ufumu [kuchanya] wo kuti wazamubwangandulika cha, nanga nkhuti mazaza ngaki ngazamuperekeka ku ŵanthu anyaki cha [muwusu wa ŵanthu uzomerezgekengi so cha]. Iwu [Ufumu waku Chiuta] uvikitengi maufumu ngosi yanga ndi kungatuzgapu, ndipu ujengepu kwamuyaya.”—Revised Standard Version.
14. Kumbi ndi vinthu vamampha nivi vo vazamuŵaku asani muwusu wa ŵanthu wazituwapu?
14 Muwusu wa Ufumu waku Chiuta wazamusapaliya pacharu chosi chapasi asani maufumu nga ŵanthu ngazituzgikapu. Ndipu pazamuŵavi ŵanthu wo azamutimbanyiza Ufumu uwu chifukwa wazamuwusiya kuchanya. Nthazi zakwendese ufumu uwu zazamutuliya kuchanya kwaku Chiuta ko zenga pakwamba. Kweniso, chifukwa chakuti muwusu waku Chiuta ndiwu wazamuyendesa charu, pazamuŵavi munthu weyosi yo wazamulandizgika ndi visopa vaboza pamwenga zeru za ŵanthu kweniso malayizgu ngaboza nga ŵanthu andali. Vosi ivi kwazamuŵavi.—Mateyu 7:15-23; Chivumbuzi chaputala 17 mpaka 19.
[Mazu nga m’mphata]
a Kuti muziŵi vinandi vakukwaskana ndi umoyu waku Yesu, wonani buku la Munthu Wamkulu Woposa Onse Amene Anakhalako, lo likupharazgika mu 1991 ndi Watchtower Society.
[Chithuzi papeji 18]
Pa nyengu yo wenga pacharu chapsi, Yesu wanguchizga akutama ndi kuyuska akufwa kuti walongo vo wazamuchita mu charu chifya
[Chithuzi papeji 19]
Ufumu wakuchanya waku Chiuta wazamutuzgiyapu limu mitundu yosi ya maufumu nga ŵanthu