Chigaŵa 11
Chiŵanja cha Charu Chifya Chipangika Sonu
1, 2. Kumbi ndi vakuchitika wuli vo tiwona ndi masu ngidu vo vifiska uchimi wa m’Bayibolo?
CHINTHU chakukondwesa so ukongwa nchakuti chiŵanja cha charu chifya chaku Chiuta chipangika sonu, chinanga kuti charu chakali chaku Satana chilutirizga kunangika ukongwa. Titijiwone ndi masu ngidu kuti Chiuta wawunganisa ŵanthu kutuliya mu mitundu yosi, kuti apangi chiŵanja cha muzi wasonu wa pacharu chapasi wo userengi m’malu mwa charu chakugaŵanika pambula kuswera yapa. Pa lemba la m’Bayibolo la 2 Petro 3:13, muzi wasonu uwu udanika kuti “charu chifya.”
2 Uchimi wa m’Bayibolo ukamba so kuti: “Mu mazuŵa nga pavuli [ngo tilimu sonu] . . . , ŵanthu ŵanandi ŵakazanga ŵakatingi: ‘Zaninga, tikweriyengi ku phiri la Ambuya, [Yehova] [kuchimusopa mwauneneska], . . . alinga watisambizi nthowa zaki, ndi kuti ifwi tendengi mu tinthowa taki.’”—Yesaya 2:2, 3.
3. (a) Kumbi uchimi waku Yesaya ufiskika pa ŵanthu naŵa? (b) Kumbi buku lakumaliya la m’Bayibolo likambanji pa fundu yeniyi?
3 Uchimi uwu ufiskika pakati pa ŵanthu wo ‘avwiya ndi kwenda mu nthowa zaku Chiuta.’ Buku lakumaliya la m’Bayibolo likamba za chanju cha pacharu chosi cha ŵanthu wo aja nge “mzinda ukuru . . . ŵakutuwa mu mtundu wewosi, ndi mu mafuku, ndi makamu, ndi marongoroledu,” wo ŵe pa ubali chayiwu wa pa charu chosi ndipu ateŵete Chiuta mwakukoliyana. Bayibolo likamba so kuti: “Yaŵa mbeniwo ŵatuwa mu suzgu yikuru yo.” Ivi ving’anamuwa kuti azamupozomoka pa umaliru wa mgonezi uwu.—Chivumbuzi 7:9, 14; Mateyu 24:3.
Ubali Chayiwu Wapacharu Chosi
4, 5. Kumbi nchifukwa wuli Akaboni aku Yehova ŵe ndi ubali wa pacharu chosi?
4 Akaboni aku Yehova mamiliyoni nganandi ayesesa kuja mwakukoliyana ndi vo iyu wasambiza ndipuso nthowa zaki. Chigomezgu chawu cha umoyu wambula kumala chagona pa charu chifya chaku Chiuta. Chifukwa chakuja umoyu wakuvwiya marangu ngaku Chiuta zuŵa lelosi, yiwu alongo kuti akhumbisiska kuvwiya muwusu waki, sonu kweniso kunthazi mu charu chifya. Kwekosi ko ŵali, yiwu avwiya marangu ngakuyanana nga mu Mazu ngaku Chiuta mwambula kuphwere kanthu za charu cho atuliya pamwenga mtundu. Ndichu chifukwa chaki ŵe ndi ubali chayiwu wa pacharu chosi, muzi wasonu wa pacharu chapasi wo Chiuta wapanga.—Yesaya 54:13; Mateyu 22:37, 38; Yohane 15:9, 14.
5 Akaboni aku Yehova akhumba cha kutchuka chifukwa cha ubali wapade wa pacharu chosi wo ŵenawu. Yiwu aziŵa kuti ivi vachitika chifukwa chakuti mzimu wanthazi waku Chiuta ndiwu utovya ŵanthu wo avwiya marangu ngaki. (Machitidu 5:29, 32; Ŵagalatia 5:22, 23) Chiuta ndiyu wachitisa kuti vichitiki. Ivi viyanana waka ndi vo Yesu wangukamba kuti, “Vambura machitika ku ŵanthu vamachitika kwaku Chiuta.” (Luka 18:27) Mwaviyo, Chiuta yo wangupanga chilengedu chakuziziswa ichi, ndiyu so wapanga muzi wasonu wa pacharu chapasi.
6. Kumbi nchifukwa wuli tingakamba kuti ubali wa Akaboni aku Yehova nchakuziziswa cha mazuŵa nganu?
6 Mwaviyo, sonu tikhoza kuwone limu vinthu vo vazamuchitika mu charu chifya cha muwusu waku Yehova kuziya mu vinthu vo vichitika sonu po iyu wapanga chiŵanja cha charu chifya. Ndipu vinthu vo wachitiya Akaboni ŵaki vilongo nadi kuti nchakuziziswa cha mazuŵa nganu. Nchifukwa wuli tikamba viyo? Chifukwa chakuti iyu wawunganisa Akaboni ŵaki pamoza kuti aje pa ubali wa pacharu chosi wo ungasweka cha ndi maboma ngakugaŵanisa, kusankhana mitundu pamwenga ndi visopa vakugaŵanisa. Po chiŵerengeru cha Akaboni chikwera kufika mamiliyoni nganandi mu vyaru 235, yiwu amangika pamoza nge munthu yumoza yo wangagaŵika cha pakati. Ichi nchakuziziswa nadi cha mazuŵa nganu, chifukwa ubali wapade wa pacharu chosi waviyo wechendachitikepu, ivi vachitika nadi ndi Chiuta.—Yesaya 43:10, 11, 21; Machitidu 10:34, 35; Ŵagalatia 3:28.
Mo Tingaziŵiya Ŵanthu aku Chiuta
7. Kumbi Yesu wangukamba kuti akumulondo auneneska azamuziŵika ndi vinthu wuli?
7 Kumbi tingaŵaziŵa so wuli ŵanthu wo Chiuta watiŵagwiriskiya nchitu nge chiŵanja cha charu chifya? Kumbi mbayani wo afiska mazu ngaku Yesu nga pa Yohane 13:34, 35? Iyu wangukamba kuti: “Dangu lifya ndikupaskani, kuti mwanjani; nge ndimo ini ndakwanjiyani, imwi so mwanjani. Mwaku ichi ŵanthu wosi ŵaziŵengi kuti mwe ŵasambizi ŵangu, asani mwe ndi chanju yumoza ku munyaki.” Akaboni aku Yehova atingagomezga ukongwa mazu ngaku Yesu ndipu achita vo mazu ngo ngakamba. Nge mo mazu ngaku Chiuta ngakambiya, yiwu ŵe ndi ‘chanju chakufikapu pakati pawu.’ (1 Petro 4:8). Yiwu ‘atijivwalika chanju, chenicho chimanga pamoza vosi mu wanasi wakufikapu.’ (Ŵakolose 3:14) Mwaviyo, chanju cha ubali ndichu “phula” lo litiŵachitisa kuti akoliyanengeku pa charu chosi chapasi.
8. Kumbi lemba la 1 Yohane 3: 10-12 likamba kuti ŵanthu aku Chiuta aziŵika ndi vinthu wuli?
8 Kweniso lemba la 1 Yohane 3:10-12 likamba kuti: “Mwaku chenichi ŵarongoleka ŵana wo ŵaku Chiuta ndi ŵana wo ŵaku Diabolo: munthu yosi wakuura [yo waleka] kuchita urunji, kuti ngwa kwaku Chiuta cha, chingana ndi yo walivi kumwanja mbali waki. Pakuti wenuwu mbuthenga wo, weniwo mwavwa kutuwa ku mtendeku, kuti tanjani: Ulaka ndi Kaine cha, yo wenga wakutuliya ku mheni yo, ndipu wangubaya muvurwa waki.” Ndichu chifukwa chaki ŵanthu aku Chiuta achita viwawa cha, yiwu ŵe pa ubali wa pacharu chosi.
Chinthu Chinyaki cho Chitiŵaziŵikiska
9, 10. (a) Kumbi ateŵeti aku Chiuta azamuziŵika ndi nchitu niyi mu mazuŵa ngakumaliya? (b) Kumbi Akaboni aku Yehova alifiska wuli lemba la Mateyu 24:14?
9 Pe nthowa yinyaki so yo tingaziŵiya ateŵeti aku Chiuta. Mu uchimi waki wakukwaskana ndi umaliru wa charu, Yesu wangukambiya limu za vinthu vinandi vo vazamulongo kuti te mu nyengu ya mazuŵa ngakumaliya. (Wonani Chigaŵa 9.) Chisimikizgu chayichu cha uchimi uwu chizumbulika pa mazu ngo nge pa Mateyu 24:14 ngo ngakamba kuti: “Evangeli wenuwu wa ufumu umemezekengi mu charu chosi chapasi uli mbukaboni ku mitundu yosi; pavuli ndipu ukazanga umari wo.”
10 Kumbi tiwona kuti uchimi uwu wafiskika? Hinya. Kutuliya po mazuŵa ngakumaliya ngangwambiya mu 1914, Akaboni aku Yehova aja achipharazga uthenga wamampha wa Ufumu waku Chiuta pacharu chosi mwakugwiriskiya nchitu ulongozgi waku Yesu, wakuti apharazgengi mu nyumba za ŵanthu. (Mateyu 10:7, 12; Machitidu 20:20) Mamiliyoni nganandi nga Akaboni ngakambiskana ndi ŵanthu a mitundu yosi vakukwaskana ndi charu chifya. Ivi ndivu vachitisa so kuti imwi mulonde kabuku yaka, chifukwa nchitu ya Akaboni aku Yehova yisazgapu so kusindikiza ndi kugaŵiya ŵanthu mabiliyoni nganandi nga mabuku ngakukwaskana ndi Ufumu waku Chiuta. Kumbi mbayani wo muziŵa kuti apharazga za Ufumu waku Chiuta nyumba ndi nyumba pacharu chosi chapasi? Ndipuso lemba la Marko 13:10 lilongo kuti nchitu yakupharazga ndi kusambiza yeniyi yitenere kuchitika “dankha” umaliru wechendazi.
Kumuka Nkhani Yikulu Yachiŵi
11. Kumbi nchinthu wuli so cho Akaboni aku Yehova afiska asani avwiya muwusu waku Chiuta?
11 Mwakuvwiya marangu ndi fundu zaku Chiuta, Akaboni aku Yehova afiska so chinthu chinyaki. Yiwu alongo kuti Satana wapusikanga po wakambanga kuti ŵanthu angaja cha akugomezgeka asani ayeseka, mwakuchita ivi amuka nkhani yikulu yakukwaskana ndi kugomezgeka kwa ŵanthu. (Jobu 2:1-5) Nge gulu la ŵanthu mamiliyoni ngakutuliya mu mitundu yosi, Akaboni alongo kuti achita vinthu nge, munthu yumoza wakugomezgeka ku muwusu waku Chiuta. Chinanga kuti mbanthu ambula kufikapu, yiwu ŵe kuchigaŵa chaku Chiuta pa nkhani yaku yo ngwakwenere kuwusa chilengedu chosi, mwambula kuphwere kanthu za fuzi yaku Satana.
12. Kumbi Akaboni ayezga ayani pankhani ya chigomezgu?
12 Mamiliyoni nga Akaboni ŵenaŵa mazuŵa nganu alongo kugomezgeka kwaku Chiuta nge po achitiyanga Akaboni anandi wo ŵengaku kali. Anyaki aku yiwu ndi Abelu, Nowa, Jobu, Abrahamu, Sara, Yisaki, Yakobe, Debora, Ruti, Davidi, ndi Danyele. (Ŵahebere chaputala 11) Nge po Bayibolo likambiya, yiwu adanika kuti, ‘mtambu ukulu wa ŵakaboni akugomezgeka.’ (Ŵahebere 12:1) Yiwu pamoza ndi akusambira anyaki aku Yesu angulutirizga kusunga ukongorekwa wawu kwaku Chiuta. Yesu wangulongo chakuwoniyapu chikulu pa nkhani ya kusunga ukongorekwa chayiwu kwaku Chiuta.
13. Kumbi ndi mazu ngaku Yesu nanga ngakukwaskana ndi Satana ngo ngafiskika?
13 Ivi vilongo kuti vo Yesu wangukambiya alongozgi a visopa vakukwaskana ndi Satana vauneneska nadi: “Kweni sonu mulembe [mukhumba] kundibaya, ndamunthu ndamwenini ndarongoro namwi uneneska, wo ndinguvwa kwaku Chiuta. . . Imwi mwe ŵa uskemwi Diabolo yo, ndipu maulakalaka nga uskemwi ndingu mukhumba kuchita. Iyu wenga mubayaŵanthu kutuwa ku mtendeku, ndipu kuti wendi kanthu ndi uneneska cha, pakuti mulivi uneneska mwaku iyu. Po warongoro utesi, warongoro va umoyu waki: pakuti ndi mtesi ndipu ndi uskeu wa ŵatesi.”—Yohane 8:40, 44.
Kumbi Imwi Musankhengenji?
14. Kumbi nchinthu wuli cho chichitika sonu chakukwaskana ndi chiŵanja cha charu chifya?
14 Chiŵanja cha charu chifya cho Chiuta wapanga sonu pakati Akaboni aku Yehova pacharu chosi, chilutirizga kuja chakukho ukongwa. Chaka chechosi ŵanthu masauzandi nganandi agwiriskiya nchitu wanangwa wawu wakusankha kuti azomerezi muwusu waku Chiuta chifukwa chakuti asambira uneneska. Yiwu apanga gulu la ŵanthu a charu chifya, ŵe kuchigaŵa chaku Chiuta pa nkhani yakuti ndiyani yo ngwakwenere kuwusa chilengedu chosi, ndipu alongo kuti Satana ngwaboza.
15. Kumbi ndi nchitu yakupatuwa niyi yo Yesu wachita mazuŵa nganu?
15 Asani asankha muwusu waku Chiuta, aja akwenere kuŵikika ku “janja la maryi” laku Khristu po wapatuwa “mbereri” ku “mbuzi.” Mu uchimi waki wakukwaskana ndi mazuŵa ngakumaliya, Yesu wangukambiya limu kuti: “Ndipu yikawunjikikanga paurongo paki mitundu yosi; ndipu wakaŵagawuwanga yumoza ku munyaki, uli ndimo mliska wagawuliya mbereri ku mbuzi. Ndipu wakajarikanga mbereri zo ku janja laki la maryi, kweni mbuzi zo ku mazye.” Mbereri mbanthu akujiyuyuwa wo awungana ndi kovyana ndi abali aku Khristu, ndipu atijithereska ku muwusu waku Chiuta. Mbuzi mbanthu ambula kuvwiya wo akana abali aku Khristu ndipu achitapu chechosi cha cho chingalongo kuti ŵe kuchigaŵa cha muwusu waku Chiuta. Nanga nchinthu wuli cho chiŵachitikiyengi? Yesu wangukamba kuti: “Yaŵa [mbuzi] ŵarutengi ku chilanga chamuyaya: kweni ŵarunji wo [mbereri] ku umoyu wamuyaya.”—Mateyu 25:31-46.
16. Kumbi mutenere kuchitanji asani mukhumba kuzija mu Paradayisu yo watuza?
16 Mbuneneska kuti Chiuta watitiŵanaŵaniya. Pambula kuswera yapa watipaskengi charu chakutowa cha paradayisu. Kumbi mukhumba kuzija mu Paradayisu mweniyo? Asani ndi viyo, longoni kuti muwonga vo Yehova wapereka mwakusambira vakukwaskana ndi iyu kweniso kuchitapu kanthu pa vo mwasambira. “Penjani Ambuya [Yehova] penipo angasanirika, danani paku iwo penipo ŵeche pafupi; muheni waleki nthowa yaki, ndi wakuwura urunji maŵanaŵanu ngaki; wawere ku Ambuya, kuti amuŵiyi ndi lisungu.”—Yesaya 55:6, 7.
17. Nchifukwa wuli titenere cha kuswera kusankha yo tikhumba kumuteŵete?
17 Mungasweranga cha. Umaliru wa mgonezi uwu wepafupi ukongwa. Mazu ngaku Chiuta ngatitikambiya kuti: “Munganjanga charu cha, chingana ndi vo vamu charu. Asani munthu watanja charu cho, kuti chanju cho cha Dada che mwaki cha . . . Ndipu charu chikungunuka, ndi chilakalaka chaki; kweni mweniyo wachita khumbu laku Chiuta, wajaririya muyaya.”—1 Yohane 2:15-17.
18. Kumbi mungachitanji kuti muje ndi chigomezgu cha kuzija mu charu chifya chamampha ukongwa chaku Chiuta?
18 Sonu ŵanthu aku Chiuta asambizika mo azamujaliya mu charu chifya ndi umoyu wambula kumala. Asambizika vinthu vauzimu kweniso malusu nganyaki ngo ngazamuwovya kupanga paradayisu. Titikuchiskani kuti musankhi Chiuta nge Wakuwusa, ndipuso kovya pa nchitu yakutaska umoyu yo yichitika pacharu chosi chapasi mazuŵa nganu. Sambirani Bayibolo ndi Akaboni aku Yehova kuti muziŵi Chiuta yo watikuŵanaŵaniyani ndipuso yo watuzgengepu masuzgu. Asani mungachita ivi, namwi mungaja chigaŵa cha chiŵanja cha charu chifya. Pavuli paki mujengi ndi chigomezgu chakuti muyanjikengi ndi Chiuta ndi kuzija mu charu chifya chamampha ukongwa.
[Chithuzi papeji 31]
Akaboni aku Yehova ŵe pa ubali chayiwu wa pacharu chosi
[Chithuzi papeji 32]
Chiŵanja cha Charu Chifya Chaku Chiuta Chipangika Sonu