Gulu Lakukoliyana

KWA vyaka pafufupi 1,500, Yehova Chiuta wachitanga vinthu ndi Ayisirayeli nge ŵanthu wo aziŵikanga ndi zina laki. Pavuli paki, Yehova “wangung’anamukiya . . . ku ŵanthu amitundu yinyaki kuti watomu ŵanthu akuti aziŵikengi ndi zina laki.” (Machi. 15:14) Ŵanthu ŵenaŵa, atingi ajengi akaboni ŵaki. Chinanga kuti atuliyanga kuvigaŵa vakupambanapambana, yiwu atingi aŵanaŵanengi mwakukoliyana kweniso kuchita vinthu mwakukoliyana. Dangu lo Yesu wangupaska akusambira ŵaki ndilu latingi liŵachitiskengi kuja mwakukoliyana. Iyu wanguti: “Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi mu zina la Ada, la Mwana, ndipuso la mzimu wakupaturika. Mukaŵasambizengi kuti asungengi vinthu vosi vo ndikukulamulani.”—Mate. 28:19, 20.

² Asani mukujipatuliya kwaku Yehova ndi kubatizika ndikuti ndimwi wakusambira waku Yesu Khristu. Mwe mugulu la ŵanthu akukoliyana a pacharu chosi chapasi wo azomereza cha kuti agaŵikani chifukwa chakupambana charu cho atuliya, fuku ndipuso chuma. (Sali. 133:1) Chifukwa chakuti mwe mugulu laviyo, mutanja Akhristu anyinu mu mpingu ndipuso mutiŵatumbika. Anyaki mwa Akhristu ŵenaŵa, mupambana nawu mtundu, charu cho mutuliya, masambiru ndipu panyaki chifukwa cha venivi, anyaki mwachitiyanga nawu vinthu limoza cha. Kweni sonu mwe mugulu la abali wo atanjana ukongwa ndipu aluska ŵanthu wo atanjana chifukwa chakuti achitiya vinthu limoza, asope limoza pamwenga mba mubanja limoza.—Mariko 10:29, 30; Ako. 3:14; 1 Petu. 1:22.

KUSINTHA MAŴANAŴANU

³ Asani anyaki atondeka kuleka sankhu chifukwa cha mtundu, ndali, vinthu vo atanja pamwenga vifukwa vinyaki vo vikujalikiskika mumtima mwawu, atenere kukumbuka Akhristu akwamba achiyuda. Mwakupambana ndi chisopa chachiyuda, yiwu anguleka kutinkha ŵanthu a mitundu yinyaki. Pa nyengu yo Peturo wangutumika kuti waluti kunyumba yaku Koneliyasi, yo wenga mura wa gulu la asilikali a ku Roma, Yehova wangumunozgekereska kuti wakafiski vo watingi wamutumengi.—Machi. chap. 10.

⁴ M’chiwona, Chiuta wangukambiya Peturo kuti wabayi ndi kurya nyama zinyaki zo Ayuda aziwonanga kuti zakufipiskika. Iyu wati wakana, wanguvwa mazu kutuliya kuchanya ngakuti: “Vinthu vo Chiuta wavitowesa, leka kuvikamba kuti vakufipiskika.” (Machi. 10:15) Chiuta wati wakamba venivi, Peturo wangusintha maŵanaŵanu ngaki ndipu wanguluta kuchikambiskana ndi munthu yo wenga Myuda cha. Iyu wati wavwiya ulongozgi wo Yehova wangumupaska wangukambiya ŵanthu wo anguwungana kuti: “Muziŵa umampha kuti ntchakwenere cha kuti Myuda wachitiyi limoza vinthu ndi munthu wamtundu unyaki pamwenga kucheza nayu. Kweni Chiuta wandilongo kuti ndingakambanga so munthu weyosi cha kuti ngwawuyu pamwenga kuti ngwakufipiskika. Mwaviyo, ndati ndadanika, ndaza, ndakanaku cha.” (Machi. 10:28, 29) Pavuli paki, Peturo wangujiwone yija kuti Yehova wanguyanja Koneliyasi ndi a munyumba yaki.

⁵ Saulo wa ku Tariso, Mfarisi yo wenga wakusambira ukongwa wakhumbikanga kujiyuyuwa kuti wachezengi ndi ŵanthu wo kali wachezanga nawu cha. Ndipu nyengu zinyaki wakhumbikanga kulonde ulongozgi kutuliya kwaku yiwu. (Machi. 4:13; Aga. 1:13-20; Afi. 3:4-11) Ŵanaŵaniyani ŵanthu nge Sejiyo Paulosi, Dayonesiyasi, Damarisi, Filimoni, Onesimo kweniso anyaki wo angusintha maŵanaŵanu ndipu anguvwisiya uthenga wamampha, pavuli paki anguja akusambira aku Yesu Khristu.—Machi. 13:6-12; 17:22, 33, 34; Fili. 8-20.

TIYESESENGI KUJA MWAKUKOLIYANA

⁶ Mwambula kukayika chanju cho abali ndi azichi ŵe nachu mu mpingu chikukuwovyani kuti mundere kwaku Yehova kweniso gulu laki. Mukuwona kuti chanju chauneneska chiziŵikiska akusambira aku Yesu Khristu nge mo iyu wakukambiya kuti: “Nditikupaskani dangu lasonu, kuti muyanjanengi. Nge mo ini ndakuyanjiyani, yimwi namwi muyanjanengi. Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.” (Yoha. 13:34, 35) Mungwamba kwanja ukongwa Yehova ndi gulu laki mwati mwaziŵa kuti chanju cho che mu mpingu chitikuwovyani kuziŵa mo abali ndi azichi pacharu chapasi atanjiyana. Muwona kufiskika kwa uchimi wa m’Bayibolu wo ukamba vakukwaskana ndi kuwunganiskika kwa ŵanthu m’mazuŵa ngakumaliya kuti asopengi Yehova mwachimangu kweniso mwakukoliyana.—Mika 4:1-5.

⁷ Chifukwa chakuti mazuŵa nganu pe vinthu vinandi vo vichitiska kuti ŵanthu aleki kukoliyana, palivi yo wangaŵanaŵana kuti ŵanthu akutuwa “mu mitundu yosi, mu mafuku ngosi, mu ŵanthu wosi ndipuso mu malilimi ngosi,” angakoliyana. (Chivu. 7:9) Ŵanaŵaniyani kupambana ko kulipu pakati pa ŵanthu wo aja mumatawuni ngakukhupuka ndi ŵanthu wo aja kumizi wo alondo midawuku yakali. Wonani mphindanu zo ziŵapu pakati pa ŵanthu avisopa a mucharu chimoza ndipuso fuku limoza. Chifukwa chakuti mazuŵa nganu ŵanthu atanja ukongwa charu chawu, agaŵikana pa nkhani za ndali kuluska kali. Ŵanaŵaniyani mphindanu zo ziŵapu chifukwa cha chuma ndi vinthu vinyaki vinandi. Kweni asani muwona ŵanthu akutuliya mu mitundu yosi, a vineneru vakupambanapambana, akavu ndi akukhupuka atanjana ukongwa ndipuso aja mwachimangu, muziŵa kuti ndi Chiuta Wanthazizosi pe yo wangachitiska venivi.—Zeka. 4:6.

⁸ Mbuneneska kuti pe ŵanthu wo aja mwakukoliyana, ndipu namwi mungusere mugulu lenili mwati mwajipatuliya kwaku Chiuta ndi kubatizika kuti muje Kaboni waku Yehova. Namwi mukhumbika kuchitapu kanthu kuti muyanduwi ndi kukoliyana kwenuku ndipuso kuti kulutiriyi. Mungachita venivi asani mulondo mazu ngo wakutumika Paulo wangukamba pa Agalatiya 6:10 ngakuti: “Asani tasaniya ŵaka mpata, tichitiyi vamampha ŵanthu wosi, ukongwa abali ŵidu mu chivwanu.” Tivwiya so ulongozgi wakuti: “Mungachitanga cha chinthu chechosi mwamaphara pamwenga mwakujikuzga, kweni mwakujiyuyuwa, muwonengi kuti anyinu atikuluskani, ndipuso mungaŵanaŵaniyanga vakukhumba vinu pe cha, kweni va ŵanthu anyaki so.” (Afi. 2:3, 4) Mwaviyo, tikhumbika cha kuŵika maŵanaŵanu ngidu pa kawonekeru ka abali ndi azichi, m’malu mwaki tiŵawonengi nge mo Yehova watiŵawone. Asani tichitengi viyo, tilutirizgengi kuja nawu mwachimangu ndipuso pa ubwezi wamampha.—Aefe. 4:23, 24.

TIŴANAŴANIYENGI AKHRISTU ANYIDU

⁹ Nge mo wakutumika Paulo wangukonkhoske, ŵanthu mu mpingu akhumbika kuŵanaŵaniyana m’malu mwakugaŵikana. (1 Akori. 12:14-26) Chinanga kuti tingaja kutali ukongwa ndi Akaboni anyidu, tikwaskika mbwenu ndi vo vitiŵachitikiya. Asani abali anyaki atombozgeka, tosi tidandawula. Asani anyaki akhumbika chovyu pamwenga mucharu cho aja mwachitika masoka ngachilengedu, nkhondu ndipuso viwawa, Akaboni anyaki wosi atesesa kusaniya nthowa zakuŵachiskiya ndipuso kuŵapaska vinthu vakuliŵavu.—2 Akori. 1:8-11.

¹⁰ Tosi tikhumbika kuŵapempheriyanga abali ŵidu zuŵa lelosi. Anyaki ateseka kuti achiti vinthu viheni. Anyaki akumana ndi masuzgu ngakuwoneke limu. Penipo anyaki asuskika ndi ŵanthu wo agwira nawu ntchitu pamwenga ŵanthu a mu banja lawu wo mbakaboni cha. (Mate. 10:35, 36; 1 Ate. 2:14) Venivi vititikwaska chifukwa tikoliyana pacharu chosi chapasi. (1 Petu. 5:9) Anyaki aku isi ateŵete Yehova mwaphamphu, alongozga ntchitu yakupharazga kweniso mipingu. Pe so abali anyaki wo awonere ntchitu yakupharazga pacharu chosi. Wosi ŵenaŵa tikhumbika kuŵapemphere chifukwa asani tichita viyo, tilongo kuti titiŵayanja kweniso titiŵaŵanaŵaniya nadi chinanga kuti tingaŵavi chinthu chakuti tiŵapaski.—Aefe. 1:16; 1 Ate. 1:2, 3; 5:25.

¹¹ Chifukwa cha masuzgu nganandi ngo ngachitika mazuŵa nganu ngakumaliya, ŵanthu aku Yehova atenere kunozgeka kuwovya anyawu. Nyengu zinyaki chifukwa cha masoka ngachilengedu nge vidiririsi ndi kusapaliya kwa maji, pangakhumbika kugwira ntchitu yikulu yakovya abali ŵidu ndipuso kuwunganiska vinthu vinandi vakuti apaskiki. Akhristu a mu nyengu ya akutumika angulongo chakuwoniyapu chamampha ukongwa pa nkhani yeniyi. Akhristu a mumadera nganyaki angutumiza vinthu kwa Akhristu anyawu a ku Yudeya pa nyengu yo kwenga nja, chifukwa angukumbuka ulongozgi waku Yesu. (Machi. 11:27-30; 20:35) Pavuli paki, wakutumika Paulo wanguchiska Akhristu a ku Korinto kuti awovyi Akhristu anyawu ndipu ntchitu yeniyi yachitikanga mwandondomeku. (2 Akori. 9:1-15) Mazuŵa nganu, asani Akhristu anyidu akumana ndi masuzgu ndipu akhumbika chovyu, gulu kweniso abali ndi azichi aswera cha kujipereka kweniso kuŵapaska vinthu vo akhumbika.

TIKUSANKHIKA KUTI TICHITI KHUMBU LAKU YEHOVA

¹² Ndisi akukoliyana pacharu chosi kuti tichiti khumbu laku Yehova. Pa nyengu yinu, khumbu laku Yehova ndakuti uthenga wamampha wa Ufumu upharazgiki pacharu chosi chapasi kuti uje ukaboni ku ŵanthu amitundu yosi. (Mate. 24:14) Po tigwira ntchitu yeniyi, Yehova wakhumba kuti jalidu lidu likoliyanengi ndi fundu zaki za mijalidu yamampha. (1 Petu. 1:14-16) Tikhumbika kujithereska kwa anyidu ndipuso tichitengi vinthu vakulongo kuti tikhumba kuti ntchitu yakupharazga yiluti panthazi. (Aefe. 5:21) Sonu ndi nyengu yakuŵanaŵaniya vakukhumba vidu cha kweni ndi nyengu yakudanjiza Ufumu waku Chiuta pa umoyu widu. (Mate. 6:33) Asani tikumbuka fundu yeniyi po tigwiriya limoza ntchitu yakupharazga, tikondwa ndipuso vitiwovyengi kuti tizilonde vitumbiku vambula kumala.

¹³ Isi Akaboni aku Yehova te ŵanthu apade chifukwa Chiuta wakutisankha kutuliya mu mitundu yakupambanapambana, wakutitowesa ndipu titimuteŵete mwaphamphu. (Tito 2:14) Tipambana ndi ŵanthu anyaki chifukwa tisopa Yehova. Tigwira ntchitu mwakukoliyana ndi abali ŵidu pacharu chosi chapasi, tilongolo chineneru chimoza chauneneska ndipuso tichita vinthu mwakukoliyana ndi vo tipharazga. Yehova wakukamba kali venivi kuporote mwa mchimi Zefaniya. Iyu wanguti: “Ndazamusintha chineneru cha ŵanthu amitundu yosi kuti chiŵi chineneru chituŵa, kuti wosi adaniyi pa zina laku Yehova, kuti amuteŵete mwakukoliyana.”—Zefa. 3:9.

¹⁴ Pavuli paki, Zefaniya wangukambirika ndi Yehova kuti wakonkhoski kukoliyana kwa ŵanthu aku Yehova pacharu chosi ko kufiskika mazuŵa nganu. Iyu wanguti: “Ŵanthu akujaku aku Isirayeli, azamuchita cha vinthu vambula urunji; yiwu azamukambanga boza cha ndipuso lilimi lauryarya lazamusanirika cha mumulomu mwawu; yiwu azamukurya ndi kugona, ndipu palivi munthu yo wazakuŵawofya.” (Zefa. 3:13) Tichita vinthu mwakukoliyana chifukwa chakuti tiziŵa uneneska wa m’Mazu ngaku Yehova, tikusintha maŵanaŵanu ngidu kweniso mijalidu yidu kuti yikoliyanengi ndi fundu zaki. Tifiska kuchita vinthu vo ŵanthu anyaki wo aleka kuwona vinthu nge mo Yehova wativiwone, aŵanaŵana kuti vingachitika cha. Kukamba uneneska, ndisi ŵanthu apade nadi, ŵanthu aku Chiuta wo atimutumbika pacharu chosi chapasi.—Mika 2:12.