Sambiru 1

Mo Mungaziŵiya Vyo Chiuta Wakhumba

Kumbi mu Bayibolo mwe fundu wuli zakuzirwa? (1)

Kumbi mlembi wa Bayibolo ndi yani? (2)

Nchifukwa wuli mutenele kusambira Bayibolo? (3)

1. Bayibolo nchawanangwa chakuzirwa ukongwa chakutuwa kwaku Chiuta. Lenge ndi kalata yo ada alembe ŵana ŵawu akwanjiwa. Lititikambiya uneneska wakukwaskana ndi Chiuta. Likonkhoska kuti iyu ndi yani, kweniso vyo wakhumba. Likonkhoskaso mo tingachitiya ndi masuzgu ndipuso mo tingaŵiya alikondwa. Ndi Bayibolo pe lo lititikambiya vyo tingachita kuti tikondweski Chiuta.​—⁠Sumu 1:​1-3; Yesaya 48:​17, 18.

2. Bayibolo lingwamba kulembeka vyaka vyakujumpha 1,500 Yesu wechendazi pa charu chapasi, ndi ŵanthu 40. Linguto vyaka 1,600 kuti lilembeki. Lendi mabuku ngamanangamana 66. Wo angulemba Bayibolo anguwuzirika ndi Chiuta. Angulemba maŵanaŵanu ngaku Chiuta, ngawu cha. Mwaviyo Chiuta ndiyu Mlembi wa Bayibolo, ŵanthu cha.​—⁠2 Timote 3:​16, 17; 2 Petro 1:​20, 21.

3. Chiuta wanguwoneseska kuti Bayibolo lakopeka mwakugomezgeka ndi kusungika umampha. Mabayibolo nganandi ngasindikizika kuphara mabuku nganyaki ngosi. Mbanthu wosi cha angakondwa kukuwonani kuti musambira Bayibolo, kweni ichi chingakulekeskaningi cha. Kuti muzisaniyi umoyu wamuyaya, vithemba pakuziŵa Chiuta ndi kuchita khumbu laki chinanga ŵanthu anyaki angakukanizani.​—⁠Mateyu 5:​10-12; Yohane 17:⁠3.