Kumbi Uthenga Wamampha Ukutuliya Nadi Kwaku Chiuta?

1. Kumbi ndiyani Wakulemba Bayibolu?

Uthenga wamampha wakuti ŵanthu azamuja pacharu chapasi kwamuyaya ukulembeka mu Bayibolu. (Masalimo 37:29) Bayibolu likupangika ndi mabuku ngamanangamana 66. Chiuta wangugwiriskiya ntchitu ŵanthu 40 akugomezgeka kuti alembi mabuku yanga. Mabuku ngakwamba 5, ngangulembeka ndi Mozesi ndipu pajumpha vyaka pafufupi 3,500 kutuliya po ngakulembeke. Buku lakumaliya lingulembeka ndi wakutumika Yohane ndipu pajumpha vyaka 1,900 kutuliya po likulembeke. Kumbi wo akulemba Bayibolu angulemba maŵanaŵanu ngaku yani? Chiuta wangugwiriskiya ntchitu mzimu utuŵa pakulongoro ndi ŵanthu wo angulemba Bayibolu. (2 Samuyeli 23:2) Yiwu angulemba maŵanaŵanu ngawu cha kweni ngaku Chiuta. Mwaviyo, Chiuta ndiyu Wakulemba Bayibolu.​—Ŵerengani 2 Timote 3:16; 2 Peturo 1:20, 21.

Woneriyani vidiyo yakuti Kumbi Ndiyani yo Wakulemba Bayibolu?

2. Kumbi tingasimikiza wuli kuti Bayibolu likamba uneneska?

Tiziŵa kuti Bayibolu likutuliya nadi kwaku Chiuta chifukwa likamba uneneska wa vo vazamuchitika kunthazi. Palivi munthu weyosi yo wangachita ivi. (Yoswa 23:14) Ndi Chiuta Wanthazizosi pe yo waziŵa uneneska wa vo vazamuchitikiya ŵanthu kunthazi.​—Ŵerengani Yesaya 42:9; 46:10.

Buku lakutuliya kwaku Chiuta litenere kuja nadi lapade viyo. Mabayibolu mabiliyoni nganandi ngasindikizikapu mu vineneru mahandiredi nganandi. Chinanga kuti Bayibolu likulembeka ndi kali ukongwa, kweni vo likamba vikoliyana ndi fundu zauneneska zo asayansi akamba mazuŵa nganu. Ndipuso ŵanthu 40 wo akulemba Bayibolu akulemba vakususkana cha.a Bayibolu lititikambiya kuti Chiuta wauneneska watitiyanja ukongwa. Kweniso Bayibolu leche ndi nthazi zo zisintha umoyu wa ŵanthu. Fundu zenizi zichitiska kuti ŵanthu anandi avwanengi kuti Bayibolu ndi Mazu ngaku Chiuta nadi.​—Ŵerengani 1 Atesalonika 2:13.

Woneriyani vidiyo Kumbi Tingasimikizga Wuli Kuti vo Bayibolu Likamba Vauneneska?

3. Kumbi mu Bayibolu mwe uthenga wuli?

Mu Bayibolu mwe uthenga wamampha wakuti Chiuta wakhumba kuŵachitiya vinthu vamampha ŵanthu. Malemba ngatitikonkhoske vo vinguchitika kuti ŵanthu atayi mwaŵi wakuja mu paradayisu pacharu chapasi, kweniso mo paradayisu mwenuyu wazamuwezgekiyapu.​—Ŵerengani Chivumbuzi 21:4, 5.

Mu Mazu ngaku Chiuta musanirika so marangu ndi fundu zo zingatiwovya kuti tije ndi mijalidu yamampha. Kweniso Bayibolu le ndi vakuwoniyapu va mo Chiuta wachitiyanga vinthu ndi ŵanthu mu nyengu yakali. Vakuwoniyapu venivi vititiwovya kuziŵa mijalidu yaku Chiuta. Mwaviyo, Bayibolu lingakuwovyani kuti mumuziŵi umampha Chiuta. Likonkhoska so vo mungachita kuti muje nayu pa ubwezi.​—Ŵerengani Masalimo 19:7, 11; Yakobe 2:23; 4:8.

4. Mungachita wuli kuti muvwisengi vo Bayibolu likamba?

Kabuku yaka kakuwovyeningi kuti mulivwisi umampha Bayibolu asani mungalondo nthowa yo Yesu wagwiriskiyanga ntchitu. Iyu wagwiriskiyanga ntchitu Malemba ndipu wakonkhoskanga vo ‘ngang’anamuwa.’​—Ŵerengani Luka 24:27, 45.

Palivi chinthu chakukondwesa ukongwa kuluska uthenga wamampha wakutuliya kwaku Chiuta. Kweni pe ŵanthu anyaki wo akhumba cha kuvwa uthenga wenuwu ndipu anyaki akwiya nawu. Kweni yimwi mungagongowanga cha chifukwa mungazisaniya umoyu wambula kumala asani mungamuziŵa umampha Chiuta.​—Ŵerengani Yohane 17:3.