Sambiru 8
Mbumba Yo Yikondweska Chiuta
Kumbi munthurumi wendi mazaza wuli mu mbumba? (1)
Kumbi munthurumi watenele kuja nayu wuli muwoli waki? (2)
Kumbi ada ŵendi maudindu wuli? (3)
Kumbi munthikazi wendi udindu wuli mu mbumba? (4)
Kumbi Chiuta wakhumba kuti apapi ndi ŵana achitengenji? (5)
Kumbi Bayibolo lititinji pa nkhani yakupatukana ndi kupatana? (6, 7)
1. Bayibolo lititi munthurumi ndiyu mutu wa mbumba. (1 Ŵakorinte 11:3) Munthurumi watenele kuto munthikazi yumoza pe. Ŵatenele kutolana mwakulondo dangu la boma.—1 Timote 3:2; Tito 3:1.
2. Munthurumi watenele kwanja muwoli waki nge mo watijiyanjiya mweneku. Watenele kumuphwere nge mo Yesu waphwelere mpingu waki. (Ŵaefesu 5:25, 28, 29) Wakhumbika cha kumupuma muwoli waki pamwenga kumusuzga mu nthowa yinyake yeyosi. M’malu mwaki, watenele kumupaska ulemu.—Ŵakolose 3:19; 1 Petro 3:7.
3. Ada atenele kutakataka kuti aphweriyengi mbumba yawu. Atenele kusaniriya munthikazi ndi ŵana ŵawu vyakurya, vyakuvwara, ndi nyumba. Ada ateneleso kuphwere mbumba yawu mwauzimu. (1 Timote 5:8) Alongozga mbumba yawu pakusambira vyaku Chiuta ndi khumbu laki.—Marangu 6:4-9; Ŵaefesu 6:4.
4. Munthikazi watenele kovya murumi waki. (Chiyambo 2:18) Watenele kumovya pakusambiza ndi kurunguchizga ŵana. (Nthanthi 1:8) Yehova wakhumba kuti munthikazi waphweriyengi mbumba yaki mwachanju. (Nthanthi 31:10, 15, 26, 27; Tito 2:4, 5) Watenele kumupaska ulemu ukuru murumi waki.—Ŵaefesu 5:22, 23, 33.
5. Chiuta wakhumba kuti ŵana ŵavwiyengi apapi ŵawu. (Ŵaefesu 6:1-3) Wakhumba kuti apapi arunguchizgengi ndi kuchenya ŵana ŵawu. Apapi atenele kusaniya nyengu yakuchezge ndi ŵana ŵawu ndi kusambira nawu Bayibolo. Asani achita viyo, aphwere ŵana ŵawu mwauzimu ndi mu maŵanaŵanu. (Marangu 11:18, 19; Nthanthi 22:6, 15) Nchamampha cha kuti apapi achenyengi ŵana mwaukali pamwenga mwankhaza.—Ŵaefesu 6:4.
6. Asani akutorana atanja kupindana, atenele kuyesesa kulondo ulongozgi wa mu Bayibolo. Bayibolo lititichiska kuti tiyanjanengi ndi kugowokiyana. (Ŵakolose 3:12-14) Mazu ngaku Chiuta ngalimbikiska kupatukana nge ndi nthowa yakumalisiya masuzgu ngamanangamana cha. Kweni munthikazi wangasankha kutuwaku dankha ku murumi waki asani (1) wakaniya limu kuphwere mbumba yaki, (2) watimupuma ukongwa mwakuti umoyu waki utuŵa pangozi, pamwenga (3) watondeka kusopa Yehova chifukwa chakuti watimukanizga.—1 Ŵakorinte 7:12, 13.
7. Akutorana atenele kuŵa akugomezgeka ku munyawu yo akutorana nayu. Uleŵi nkhunangiya Chiuta ndi yo tikutorana nayu. (Ŵahebere 13:4) Bayibolo lizomerezga ŵanthu kupatana ndi kutorana ndi munthu munyaki, pija asani yumoza waku yiwu wachita chigololu. (Mateyu 19:6-9; Ŵaroma 7:2, 3) Yehova wakwiya asani ŵanthu apatana ndi kutorana ndi munthu munyaki kwambura vifukwa vya mu Bayibolo.—Malaki 2:14-16.
[Vithuzi papeji 16, 17]
Chiuta wakhumba kuti apapi arunguchizgengi ndi kuchenya ŵana ŵawu
[Chithuzi papeji 17]
Ada wo atanja mbumba yawu atiyiphwere mwauzimu ndi ku liŵavu