Sambiru 11
Vigomezgu ndi Midawuku Yambula Kukondweska Chiuta
Kumbi ndi vigomezgu ndi midawuku niyi yo njiheni? (1)
Kumbi Akhristu atenele kugomezga kuti Chiuta ndi mutatu? (2)
Kumbi nchifukwa wuli Akhristu awuneneska akondwere cha Khrisimasi, Isitala, ndi mazuŵa ngakuwiya? (3, 4)
Kumbi ŵakufwa angatipweteka? (5)
Kumbi Yesu wangufwiya pa mphinjika? (6)
Kumbi kukondweska Chiuta nkhwakuzirwa wuli? (7)
1. Kuti ndi vigomezgu ndi midawuku yosi cha yo njiheni. Kweni Chiuta wativizomerezga cha asani vikutuliya ku visopa vyaboza, ndipuso asani vipambana ndi vyo Bayibolo lisambiza.—Mateyu 15:6.
2. Utatu: Kumbi Yehova ndi Mutatu? Kung’anamuwa kuti pe Chiuta dada, Chiuta mwana, ndi Chiuta mzimu? Awa! Yehova, Ada, ndiyu “Chiuta yija muneneska.” (Yohane 17:3; Marko 12:29) Yesu ndi Mwana Waki wakwamba, ndipu watimuvwiya. (1 Ŵakorinte 11:3) Ada mbara kuphara Mwana. (Yohane 14:28) Mzimu utuŵa ndi munthu cha, kweni ndi nthazi yo Chiuta wagwiriskiya nchitu pakuchita khumbu laki.—Chiyambo 1:2; Machitidu 2:18.
3. Khrisimasi ndi Isitala: Yesu wanguwa pa 25 Disembala cha. Wanguwa chakukwamba kwa Okutobala, nyengu yeniyo aliska ajanga ku dondu usiku wosi ndi viŵetu. (Luka 2:8-12) Yesu wanguŵakambiyapu cha akusambira ŵaki kuti akondweriyengi zuŵa laki lakuwiya. Kweni wanguŵakambiya kuti akumbukiyengi nyifwa yaki. (Luka 22:19, 20) Khrisimasi ndi midawuku yaki yosi yikutuliya ku visopa vyaboza vyakali. Ndimuso vilili ndi Isitala ndi midawuku yaki, nge kugwiriskiya nchitu mazira ndi akalulu, mo achitiya ku vyaru vinyaki. Akhristu akwamba akondweriyanga cha Khrisimasi ndi Isitala. Mazuŵa nganu, Akhristu awuneneska nawuso akondwere cha.
4. Mazuŵa Ngakuwiya: Mu Bayibolo mukulembeka maphwandu ngaŵi pe ngakukondwere zuŵa lakuwiya. Maphwandu yanga, nganguchitika ndi ŵanthu ambula kusopa Yehova. (Chiyambo 40:20-22; Marko 6:21, 22, 24-27) Akhristu akwamba akondweriyanga cha mazuŵa ngakuwiya. Visopa vyaboza vyakali ndivu vingwambiska kukondwere mazuŵa ngakuwiya. Akhristu awuneneska apaskana vyawanangwa ndi kukondwa pamoza ndi anyawu nyengu yeyosi yo akhumba mukati mwa chaka.
5. Kopa Ŵakufwa: Ŵanthu ŵakufwa angavwa pamwenga kuchita chechosi cha. Tingaŵawovya cha, ndipu nawu angatipweteka cha. (Sumu 146:4; Wakutaula 9:5, 10) Palivi cho chipozomoka asani munthu wafwa. (Ezekiele 18:4, NW ) Kweni nyengu zinyaki, angelu aheni, wo adanika kuti mademoni, atijiyeruzgiya kuja nge mbanthu wo ŵakufwa. Mudawuku wewosi wakukwaskana ndi kopa ŵakufwa pamwenga kuŵasopa nguheni.—Yesaya 8:19.
6. Mphinjika: Yesu wangufwiya pa mphinjika cha. Wangufwiya pa chimiti chimoza pe. Mazu nga Chigiriki ngo ngakung’anamulika kuti “mphinjika” mu Mabayibolo nganandi, ngang’anamuwa chimiti chimoza pe. (Machitidu 5:30; 1 Petro 2:24) Mphinjika yikutuliya ku visopa vyaboza vyakali. Akhristu akwamba agwiriskiyanga nchitu mphinjika cha pakusopa. Mwaviyo, kumbi muŵanaŵana kuti chingaŵa chakwenele kugwiriskiya nchitu mphinjika pakusopa?—Marangu 7:26; 1 Ŵakorinte 10:14.
7. Chingaŵa chakusuzga ukongwa kuleka vigomezgu ndi midawuku iyi. Abali ŵinu ndi anyinu angakunyengezeliyani kuti muleki kusintha vyo mugomezga. Kweni kukondweska Chiuta nkhwakuzirwa ukongwa kuphara kukondweska ŵanthu.—Nthanthi 29:25; Mateyu 10:36, 37.
[Chithuzi papeji 22]
Chiuta ndi mutatu cha
[Chithuzi papeji 23]
Khrisimasi ndi Isitala vikutuliya ku visopa vyaboza vyakali
[Chithuzi papeji 23]
Palivi chifukwa chakusope pamwenga kuwope ŵakufwa