Sambiru 13
Kumbi Mungachisaniya Wuli Chisopa Chawuneneska?
Kumbi ndi visopa vyosi vyo vikondweska Chiuta, pamwenga nchimoza pe? (1)
Kumbi nchifukwa wuli pe visopa vinandi vyo vititi vya Chikhristu? (2)
Kumbi mungaŵaziŵa wuli Akhristu—awuneneska? (3-7)
1. Yesu wangwambiska chisopa cha Akhristu awuneneska chimoza pe. Mazuŵa nganu napu kutenele kuŵa gulu limoza pe lo lisopa Yehova Chiuta mwawuneneska. (Yohane 4:23, 24; Ŵaefesu 4:4, 5) Bayibolo lisambiza kuti mbanthu amanavi waka wo ŵepa nthowa yakuya ku umoyu.—Mateyu 7:13, 14.
2. Bayibolo lingulose limu kuti epa ŵakutumika ŵafwa, visambizu vyaboza ndi vyakuchitika vinyaki vyambula kukoliyana ndi Chikhristu, vyazamusele kamanakamana mu mpingu wa Chikhristu. Ŵanthu anyaki azamuguza akusambira kuti alondo yiwu m’malu mwakulondo Khristu. (Mateyu 7:15, 21-23; Machitidu 20:29, 30) Ndichu chifukwa chaki kwe visopa vinandi vyo vititi vya Chikhristu. Nanga tingaŵaziŵa wuli Akhristu awuneneska?
3. Jalidu likulu lo mungaziŵiya Akhristu awuneneska, nchanju cho ŵenachu pakati pawu. (Yohane 13:34, 35) Yiwu asambizika kujiwona kuti mtundu wawu ngwakuzirwa kuphara mitundu yinyaki cha, pamwenga ŵanthu akhungu linyaki cha. Ndipuso asambizika kutinkha ŵanthu a vyaru vinyaki cha. (Machitidu 10:34, 35) Lekani aleka kurwaku nkhondu. Akhristu awuneneska aja nge mpha ubali.—1 Yohane 4:20, 21.
4. Mungachiziŵaso chisopa chawuneneska chifukwa ŵanthu ŵaki awona Bayibolo kuŵa lakuzirwa ukongwa. Asimikizga kuti ndi Mazu ngaku Chiuta, ndipu agomezga vyo likamba. (Yohane 17:17; 2 Timote 3:16, 17) Awona Mazu ngaku Chiuta kuŵa ngakuzirwa ukongwa kuphara midawuku ndi maŵanaŵanu nga ŵanthu. (Mateyu 15:1-3, 7-9) Ayesesa kulondo malangu nga mu Bayibolo mu umoyu wawu. Ndipu vyo asambiza ndivu achita.—Tito 1:15, 16.
5. Chisopa chawuneneska chiteneleso kutumbika zina laku Chiuta. (Mateyu 6:9) Yesu waziŵiskanga ŵanthu zina laku Chiuta, Yehova. Ndimuso Akhristu awuneneska atenele kuchitiya. (Yohane 17:6, 26; Ŵaroma 10:13, 14) Mbayani muchigaŵa chinu wo akambiyaku anyawu za zina laku Chiuta?
6. Akhristu awuneneska atenele kumemeza za Ufumu waku Chiuta. Yesu nayu wachitanga viyo. Nyengu zosi wakambanga za Ufumu waku Chiuta. (Luka 8:1) Wangulamuliya akusambira ŵaki kuti amemezi uthenga uwu pa charu chosi chapasi. (Mateyu 24:14; 28:19, 20) Akhristu awuneneska agomezga kuti Ufumu waku Chiuta pe ndiwu wazamupangiska kuti pa charu chapasi paziŵi chimangu, ndipuso kuti ŵanthu ŵaziŵi ŵakuvikiririka.—Sumu 146:3-5.
7. Akusambira ŵaku Yesu atenele kuŵa a charu cha. (Yohane 17:16) Achitaku cha ndali ndi vivulupi vyo vichitika mu charu. Akhwecha jalidu liheni lelosi ndi mzimu uheni wo wawanda mu charu. (Yakobe 1:27; 4:4) Kumbi nchisopa nichi mu chigaŵa chinu, cho chichita vinthu vyo viziŵikiska Akhristu awuneneska?
[Vithuzithuzi papeji 26, 27]
Akhristu awuneneska atanjana, azirwiska Bayibolo, ndipuso amemeza za Ufumu waku Chiuta