Sambiru 15

Kovya Ŵanthu Kuchita Khumbu Laku Chiuta

Nchifukwa wuli mutenele kukambiyaku ŵanthu vyo musambira? (1)

Kumbi mbayani wo mungakambiyaku uthenga wa Ufumu? (2)

Kumbi nkharu yinu yingaŵakwaska wuli ŵanthu? (2)

Kumbi mungayamba zukwanji kumemeza uthenga wa Ufumu pamoza ndi mpingu? (3)

1. Pakufika sonu, mwasambira vinthu vyamampha vinandi kutuwa mu Bayibolo. Vyo mwasambira, vitenele kukupangiskani kuvwara wunthu Wachikhristu. (Ŵaefesu 4:​22-24) Uneneska wa mu Bayibolo uwu, ngwakukhumbika ukongwa kuti muzisaniyi umoyu wamuyaya. (Yohane 17:⁠3) Kweni ndipuwuli, ŵanthu anyaki nawuso atenele kuvwa uthenga wa Ufumu kuti azipozomoki. Akhristu wosi awuneneska atenele kukambiyaku anyawu uthenga wa Ufumu. Ndi dangu lakutuliya kwaku Chiuta.​—⁠Ŵaroma 10:10; 1 Ŵakorinte 9:16; 1 Timote 4:⁠16.

2. Mungayamba kukambiyaku wo muja nawu pafupi vinthu vyo musambira. Kambiyaniku ŵa mu mbumba yinu, abwezi ŵinu, wo musambira nawu sukulu, ndi wo mugwira nawu nchitu. Mutenele kuŵa akuzika ndi akukunthiyapu pakuŵakambiya. (2 Timote 2:​24, 25) Kumbukani kuti ŵanthu awona ukongwa nkharu ya munthu kuphara vyo wakamba. Pa chifukwa ichi, nkharu yinu yamampha ndiyu yingakopa ŵanthu kuti avwisiyi uthenga wo mutiŵakambiya.​—⁠Mateyu 5:16; 1 Petro 3:​1, 2, 16.

3. Mukuluta kwanyengu, asani mwafiska vyakukhumbika, mungazomerezgeka kwamba kumemeza uthenga wa Ufumu pamoza ndi mpingu wa Akaboni ŵaku Yehova. Ichi nchakukhumbika ukongwa kuti mukuŵi mwauzimu. (Mateyu 24:14) Mungaŵa ndi chimwemwe chikuru ukongwa asani mungawovya munthu kuŵa muteŵeti waku Yehova, kweniso kuti wazilonde umoyu wamuyaya.​—⁠1 Ŵatesalonika 2:​19, 20.