Kumbi Nchifukwa Wuli Titenele
Kuŵelenga Bayibolo?
BAYIBOLO lipambana ndi mabuku nganyaki ngosi. Ilu le ndi ulongozgi wakutuwa kwaku Chiuta. (1 Ŵatesalonika 2:13) Mupinduwengi ukongwa asani muchitengi vyo Bayibolo lisambiza. Muyambengi kumwanja ukongwa Chiuta ndi kundele kwaku iyu, Mpasi wa ‘chawanangwa chosi chamampha ndi chawezi chosi.’ (Yakobe 1:17) Musambirengi mo mungarombe kwaku Chiuta. Asani mwakumana ndi masuzgu, Chiuta wangakuwovyani. Ndipu asani mukalondonga malangu nga mu Bayibolo mu umoyu winu, wazakukupaskani umoyu wamuyaya.—Ŵaroma 6:23.
Bayibolo le ndi uneneska wo utitingweruwa. Asani munthu waziŵa Bayibolo, wafwatuka ku visambizu vya boza vyo ŵanthu ŵanandi ŵagomezga. Mwakuyeruzgiyapu, kuziŵa uneneska wa vyo vichitika asani munthu wafwa, kutitifwatuwa ku mantha ngakuti ŵakufwa ŵangatipweteka. Kweniso tifipa mtima cha kuti abali ndi anyidu wo ŵakufwa ŵasuzgika. (Wakutaula 9:5, 10) Ŵanthu wo ŵakwanjiwa ŵawu ŵafwa ŵapembuzgika ndi chisambizu cha chiyuka cha mu Bayibolo. (Yohane 11:25) Uneneska wakukwasana ndi angelu aheni utitovya kuziŵa urwani wakugomezga mizimu, kweniso tivwisiska chifukwa cho pa charu paŵiya masuzgu nganandi.
Fundu za mijalidu yamampha zo ze mu Bayibolo zititovya mo tingajaliya kuti tipinduwi mwakuliŵavu. Mwakuyeruzgiyapu, munthu yo ‘watijiko mu vyakuchita vyaki’ waja ndi umoyu wamampha. (1 Timote 3:2, NW ) Pa ‘titijitozga ku ukazuzi wose wa liŵavu ndi mzimu,’ titijivikiriya ku matenda. (2 Ŵakorinte 7:1) Kulondo ulongozgi wa mu Bayibolo kutovyaso kuti mu nthengwa muje likondwa ndipuso tipaskika ulemu.—1 Ŵakorinte 6:18.
Muŵengi ŵakukondwa ukongwa asani muchitengi vyo Mazu ngaku Chiuta ngakamba. Kuziŵa Bayibolo kutitovya kuŵa ndi chimangu mu mtima, chigomezgu ndi umoyu wakukhorweska. Kutitovya kuti tiŵi ndi mijalidu yakukondweska, nge ndi lisungu, chanju, chimwemwe, chimangu, ulemu ndi chivwanu. (Ŵagalatia 5:22, 23; Ŵaefeso 4:24, 32) Mijalidu iyi yitiwumbengi kuŵa murumi, muwori, apapi ndi ŵana ŵamampha.
Kumbi mukujifumbapu kuti vinthu vyazamukuŵa wuli munthazi? Mauchimi nga mu Bayibolo ngatitovya kuziŵa nyengu yo tilimu. Mauchimi yanga kuti ngakonkhoska vyo vichitika mu charu mazuŵa nganu pe cha. Kweni ngakonkhoskaso kuti pambula kuswera yapa Chiuta wazamusintha charu chosi kuŵa paradayisu.—Chivumbuzi 21:3, 4.
Cho Chingakuwovyani Kuti Muvwisi Bayibolo
Panyaki mukuyesapu kuŵelenga Bayibolo kweni mwalivwisiskanga cha. Pamwenga muziŵa cha malemba ngo ngangamuka mafumbu nginu mu Bayibolo. Asani ndi viyo, mwemwija pe cha. Tosi tikhumbikiya chovyu kuti tivwisiski Mazu ngaku Chiuta. Mu vyaru 235, Akaboni ŵaku Yehova asambiza ŵanthu ŵanandi Bayibolo kwawezi. Yiwu angakondwa ukongwa kukuwovyani.
Kanandi kutuŵa umampha kusambira Bayibolo kamanakamana, kwamba ndi visambizu vyakwambiriya. (Ŵahebere 6:1) Mukuluta kwanyengu, mungayamba kurya “chakurya chakukhoma,” kung’anamuwa visambizu vya mu Bayibolo vyo vikhumbikiya kusambira mwakufwiyapu. (Ŵahebere 5:14) Chakurya ichi chisanirika mu Bayibolo. Kusambira mabuku ngo ngakonkhoska Bayibolo, nge ndi buku la Chicheŵa lakuti Kodi Baibulo Limaphunzitsa Chiyani Kwenikweni?, kukuwovyeningi kuti muvwisi Malemba pa nkhani zakupambanapambana.
Kumbi Mungayanja Kupatuwa Nyengu Sabata Yeyosi Kuti Musambirengi Bayibolo?
Sambiru la Bayibolo lingachitika pa nyengu ndi malu ngo imwi mungasankha. Anandi asambiriya pa nyumba pawu. Anyaki asambiriya pa telefoni. Pa sambiru la Bayibolo paja ŵanthu ŵanandi nge ndi mu kilasi cha. Mungasambira pakumwija kuyana ndimo vinthu viliri ndi imwi. Mwazamulemba mayesu cha, ndipu palivi cho mwazamuchita nachu soni. Mafumbu nginu ngakukwasana ndi Bayibolo ngazamumukika, ndipu mwazamusambira mo mungandelele kwaku Chiuta.
Sambiru ili ndawezi. (Mateyu 10:8) Ŵanthu ŵavisopa vyosi ndi ŵambura kusopa, ŵasambira kwambura kulipira, malinga mbakukhumbisiska kuti ŵaziŵi vinandi vyakukwasana ndi Chiuta.
Kumbi mbayani anyaki wo angaŵapu pa sambiru? Mbumba yinu yosi ndi anyinu wosi wo mungayanja kuti aŵepu. Pamwenga mungaŵapu mwija asani ndipu mungayanjiya.
Ŵanthu ŵanandi ŵapatuwa ora limoza pasabata yeyosi kuti ŵasambiri Bayibolo. Che kwaku imwi kusankha utari wa nyengu yo mungakhumba kusambira. Kwali muyanjengi kusambira kwa nyengu yitari kujumpha yapa, pamwenga kwa nyengu yimanavi waka, Akaboni ŵaku Yehova mbakunozgeka kukuwovyani.
Titikupemphani Kuti Muyambi Kusambira
Titikupemphani kuti mukambiskani ndi Akaboni ŵaku Yehova. Nthowa yimoza yo mungakambiskirana nawu nkhulembe kalata ku adiresi yo ye pasi yapa. Asani ndipu mungachitiya, mbwenu Akaboni ŵaku Yehova ŵazamusambira namwi Bayibolo pa nyumba pinu kwawezi.
□ Nditumizgiyeni buku lakuti Kodi Baibulo Limaphunzitsa Chiyani Kwenikweni?
□ Chondi muzengi kuzisambira nani Bayibolo panyumba pangu kwawezi.
Malemba nga mu kapepala yaka ngatuwa mu Bayibolo la Mazu Ghaku Chiuta, kupatuwaku asani talongo linyaki. Po talemba kuti NW, ndikuti lemba lo latuwa mu Bayibolo la New World Translation of the Holy Scriptures.