Yesu we ndi Nthazi Kuluska Viŵanda

KUMBI utichikumbuka cho chinguchitiska kuti mungelu munyaki waku Chiuta waje Satana Dyaboli?— Iyu wakhumbisiskanga kuti ŵanthu amusopengi, ndipu wanguleka kuvwiya Chiuta. Kumbi penga angelu anyaki wo angwamba kulondo Satana?— Hinya, ŵengapu. Ndipu Bayibolu litiŵadana kuti ‘angelu aku’ Satana pamwenga kuti viŵanda.—Chivumbuzi 12:9.

Kumbi uwona kuti angelu aheni ŵenaŵa pamwenga kuti viŵanda vigomezga Chiuta?— Bayibolu likamba kuti ‘viŵanda vigomezga kuti kwe Chiuta.’ (Yakobe 2:19) Kweni sonu ve ndi mantha. Ve ndi mantha chifukwa viziŵa kuti Chiuta wazakuvilanga. Ntchifukwa wuli Chiuta wazakuvilanga, kumbi vikunanganji?—

Bayibolu likamba kuti angelu ŵenaŵa anguleka malu ngawu kuchanya, ndipu anguza pacharu chapasi ndi kujisintha kuja nge ŵanthu. Yiwu anguchita venivi chifukwa akhumbanga kuti agonanengi ndi anthukazi akutowa ukongwa pacharu. (Genezesi 6:1, 2; Yuda 6) Kumbi yiwi uziŵanjipu pa nkhani ya kugonana?—

Munthulumi ndi munthukazi agonana asani aja pamalu ngamoza munthowa yapade. Pavuli paki mwana wakhoza kupangika mumoyu mwa munthukazi. Kweni angelu akhumbika cha kugonana. Chiuta wakhumba kuti munthulumi ndi munthukazi akutorana pe ndiwu agonanengi. Ndichu chifukwa chaki asani mwana wawaku, ada waki ndi ama waki ndiwu atimuphwere.

Angelu ŵenaŵa ŵati ajisintha ndi kuja nge ŵanthu kuti agonani ndi anthukazi pacharu, angubala ŵana wo ŵenga viŵanthu vikuluvikulu. Viŵanthu venivi venga vankhaza ukongwa ndipu vapumanga ŵanthu. Mwaviyo, Chiuta wanguchitiska chigumula chikulu kuti wabayi viŵanthu venivi kweniso ŵanthu anyaki aheni. Kweni Iyu wangutuma Nowa kuti wakhomi chombu pamwenga kuti chingaraŵa cho chenga chiboti chikulu. Wanguchita venivi kuti wataski Nowa limoza ndi ŵanthu anyaki amampha. Msambizi Walusu wangukamba kuti tikhumbika kusambirapu kanthu pa vo vinguchitika pa nyengu Chigumula.—Genezesi 6:3, 4, 13, 14; Luka 17:26, 27.

Chigumula chati chayamba, kumbi uziŵa vo vinguchitikiya angelu aheni?— Yiwu angujisintha so, ndipu anguwere kuchanya. Kweni Chiuta wanguŵakana kuti aje so angelu ŵaki ndipu anguja angelu aku Satana pamwenga kuti viŵanda. Nanga uwona kuti ndi vinthu wuli vo vinguchitikiya ŵana ŵawu wo ŵenga viŵanthu vikuluvikulu?— Wosi angufwa pa Chigumula. Kweniso ŵanthu wosi wo akananga kuvwiya Chiuta, nawu angufwa pa nyengu yeniyi.

Kutuliya pa nyengu ya Chigumula, Chiuta wakuvizomerezapu so cha viŵanda kuti vijisinthi ndi kuja nge ŵanthu. Chinanga kuti tingaviwona cha viŵanda, kweni vinyengezere ŵanthu kuti achitengi vinthu viheni. Yivu vichitiska vinthu vinandi viheni mazuŵa nganu. Vichita venivi chifukwa chakuti vikudikisika kuchanya ndipu ve panu pacharu chapasi.

Kumbi uwona kuti ntchifukwa wuli titondeka kuviwona viŵanda?— Ntchifukwa chakuti viwoneka cha. Kweni tisimikiza kuti viliku nadi. Bayibolu likamba kuti Satana ‘walandizga ŵanthu pacharu chosi chapasi,’ ndipu viŵanda vaki vitimuwovya.—Chivumbuzi 12:9, 12.

Kumbi uwona kuti nasi tingalandizgika ndi Dyaboli kweniso viŵanda vaki?— Hinya, asani tingapusa. Kweni tikhumbika kopa cha. Msambizi Walusu wangukamba kuti: ‘Dyaboli walivi mazaza paku ini.’ Asani tilutirizgengi kuvwiya Chiuta, Iyu wativikiliyengi kuti Dyaboli ndi viŵanda vaki aleki kutilandizga.—Yohane 14:30.

Sonu tikhumbika kuziŵa vinthu viheni vo viŵanda vingatinyengezere kuti tichiti. Kumbi ukumbuka? Ndi vinthu viheni nivi vo viŵanda vinguchita vati vaza panu pacharu?— Chigumula chechendachitiki, viŵanda vingugonana ndi anthukazi. Kweni tawona kali kuti angelu akhumbika cha kuchita venivi. Mazuŵa nganu, viŵanda vikondwa ukongwa asani viwona kuti ŵanthu atimuvwiya cha Chiuta pa nkhani ya kugonana. Ndikufumbi, Kumbi uwona kuti mbanthu naŵa pe wo akhumbika kugonana?— Waneneska, mbanthu akutorana pe.

Mazuŵa nganu ŵana anyaki agonana, kweni kuchita venivi nkhuheni. Bayibolu likamba kuti Chiuta wakulenga kuti anthulumi kweniso anthukazi ajengi ndi viŵalu vakubisika. (Levitiko 15:1-3) Yehova wakutilenga ndi viŵalu venivi kuti ŵanthu akutorana pe ndiwu avigwiriskiyengi ntchitu munthowa yapade. Kweni viŵanda vikondwa ukongwa asani ŵanthu achita vinthu vo Yehova wakaniza. Mwakuyeruzgiyapu, viŵanda vikondwa asani mnyamata ndi msungwana aseŵeresana viŵalu vakubisika venivi. Kumbi uwona kuti tikhumbika kukondwesa viŵanda?—

Pe so chinthu chinyaki cho chikondwesa viŵanda kweni Yehova watinkhana nachu. Kumbi wachiziŵa?— Chiwawa pamwenga kuti ndewu. (Salimo 11:5) Ŵanthu wo achita ndewu apweteka anyawu. Asi ukumbuka kuti venivi ndivu ŵana a viŵanda, pamwenga kuti viŵanthu vikuluvikulu viya vachitanga?

Viŵanda vitanja so kuwofyeza ŵanthu. Nyengu zinyaki vipusikiziya nge kuti mbanthu wo akufwa. Ivu viyezga mazu nga ŵanthu akufwa. Viŵanda vipusisa ŵanthu anandi munthowa yeniyi, kuti yiwu aŵanaŵanengi kuti ŵanthu wo akufwa ŵeche amoyu ndipu alongoro. Chifukwa cha venivi ŵanthu anandi agomezga mizukwa.

Mwaviyo, tikhumbika kuchenje kuti Satana ndi viŵanda vaki aleki kutipusisa. Bayibolu litititcheŵeska kuti: ‘Satana walutirizga kujisambusa yija kuja nge mungelu wamampha, ndipu ateŵeti ŵaki nawu achita so venivi.’ (2 Akorinto 11:14, 15) Kweni uneneska ngwakuti, viŵanda viheni ukongwa. Tiyi tiwoni vo vichita kuti vitinyengezere kuti tiviyanjengi.

Kumbi uwona kuti ŵanthu anandi ativisambira pani vachiwawa, ndewu, kugonana kwambula kwenere, vamizimu ndipuso mizukwa?— Asi ativiwonere pa TV, mumafilimu, pa Intaneti, magemu ngo atchaya ndipuso mumabuku nganyaki? Kumbi asani tiwonere, tiŵerenga pamwenga tivwisiya vinthu vaviyo, tija pa ubwezi ndi yani, Chiuta pamwenga Satana ndi viŵanda vaki?—

Kumbi uwona kuti ndiyani yo wakhumba kuti tiwoneriyengi kweniso kuvwisiya vinthu viheni?— Hinya, ndi Satana ndi viŵanda vaki. Sonu kumbi yiwi ndi ini tikhumbika kuchitanji?— Tikhumbika kuŵerenga, kuvwisiya kweniso kuwonere vinthu vamampha vo vingatiwovya kuti timuyanjengi ukongwa Yehova. Kumbi uwona kuti ndi vinthu vamampha nivi vo tingaŵerenga, kuwonere pamwenga kuchita?—

Asani tichita vinthu vamampha tikhumbika cha kopa viŵanda. Yesu ngwanthazi ukongwa kuluska viŵanda ndipu vitimuwopa uheni. Zuŵa linyaki viŵanda vingufumba Yesu kuti: “Kumbi mwaziya kuzitinanga?” (Mariko 1:24) Kumbi uwona kuti tazamukondwa cha asani Yesu wazibaya Satana ndi viŵanda vaki?— Kweni pa nyengu yinu yasonu, tikhumbika cha kukayika kuti Yesu wativikiliyengi ku viŵanda asani tilutirizgengi kumuyanja kweniso kwanja Awisi akuchanya.