Vinthu Vazamuja Umampha Ukongwa Kunthazi

Satana ndi viŵanda vaki alutirizgengi cha kupusika mtundu wa ŵanthu. Yehova wakuŵadikiska kali kuchanya. (Chivumbuzi 12:9) Pambula kuswera yapa, Chiuta wazamutuzgapu Satana ndi viŵanda vaki. Wakutumika Yohane wati wawona chiwona chakutuwa kwaku Chiuta wanguti: “Ndinguwona mungelu wasika kutuwa kuchanya, wakuŵa ndi mjuriru wa chizenji cho, ndi unyoru ukuru mu janja laki. Ndipu wanguko nchalinda yo, njoka yo yamwaka, yo ndi Diabolo ndi Satana; Ndipu wangumumanga virimika chikwi, wangumuponya mu chizenji cho, ndi wanguchijala ndi kuchizighiriya [kuchimata] pachanya paki, mwakuti waleki kulandizga so mitundu, mpaka vamala virimika chikwi.” (Chivumbuzi 20:1-3) Pavuli paki, Diabolo ndi viŵanda vaki azamubayikiya limu.—Chivumbuzi 20:10.

Ŵanthu aheni wosi azamutuzgikapu pacharu.—Sumu 37:9, 10; Luka 13:5.

Akufwa Azamuja so ndi Umoyu

Asani Satana ndi viŵanda azituzgikapu, Yehova wazamupaska mtundu wa ŵanthu vitumbiku vinandi. Kumbukani kuti akufwa mbamoyu so cha, kulivi. Yesu wanguyeruzgiya nyifwa ndi tulu takufwa natu. (Yohane 11:11-14) Iyu wangukamba viyo chifukwa waziŵanga kuti nyengu yinyaki wosi wo agona mu nyifwa azamuyuskikiya ku umoyu. Iyu wanguti: “Lituza ora lenilo wosi ŵamu miunda . . . ŵakatuwangamu.”—Yohane 5:28, 29; yeruzgiyani ndi Machitidu 24:15.

Yiwu azamuyuskikiya pacharu chapasi. M’malu mwa mauthenga nganyifwa, tazamuvwanga mauthenga ngakukondweska nga ŵanthu wo ŵazamuyuka. Chazamukuŵa chinthu chakukondweska nadi kulonde abali ŵidu kutuwa ku masanu!