Kalata Yakutuwa ku Wupu Wakulongozga

Akwanjiwa Apharazgi a Ufumu:

Yeruzgiyani kuti ndimwi yumoza mwa Akutumika ndipu mwama pa Phiri la Maolivi. Pavuli paki, Yesu wawoneke pakati pinu. We pafupi kuluta kuchanya, watikukambiyani kuti: “Mwazamulonde nthazi po mzimu wakupaturika wazamukuza paku yimwi ndipu mwazamuja akaboni ŵangu mu Yerusalemu, mu Yudeya mosi ndi mu Samariya mpaka kuvigaŵa vakutali ukongwa va charu chapasi.” (Machi. 1:8) Kumbi mwatingi muchitengi wuli?

Panyaki mwatingi muchitengi mantha chifukwa cha ukulu wa ntchitu. Panyaki mwatingi mujifumbengi kuti: ‘Kumbi tiyifiskengi wuli ntchitu yakuchitiya ukaboni “mpaka kuvigaŵa vakutali ukongwa va charu chapasi,” chifukwa tilipu ŵanthu amanavi?’ Kweniso panyaki mwatingi mukumbukengi ulongozgi wakutcheŵeska wo Yesu wangukamba usiku wakuti wafwengi mawa laki. Iyu wanguti: “Kapolu ndi mura cha kuluska mbuyaki. Asani atombozga ini, namwi azakukutombozgani. Kweniso asani asunga mazu ngangu, azamusunga so mazu nginu. Kweni azakukuchitiyani vosi venivi chifukwa cha zina langu, pakuti atimuziŵa cha Yo wakundituma.” (Yoha. 15:20, 21) Sonu chifukwa chakuŵanaŵaniya mazu ngenanga, mwatingi mujifumbengi kuti: ‘Kumbi ndingafiska wuli kuchitiya ukaboni mwakukwana po tisuskika ndipuso kutombozgeka?’

Mazuŵa nganu napu, tingajifumba mafumbu ngenanga. Chifukwa nasi nge Akaboni aku Yehova, ntchitu yidu nkhuchitiya ukaboni mwakukwana “mpaka kuvigaŵa vakutali ukongwa va charu chapasi,” ku “ŵanthu amitundu yosi.” (Mate. 28:19, 20) Kumbi tingafiska wuli kugwira ntchitu yeniyi asani tiŵanaŵaniya za kutombozgeka ko Yesu wangukambiya limu?

Buku la Machitidu nga Akutumika, likonkhoska nkhani yakukondwesa yo yilongo kuti akutumika ndipuso Akhristu anyawu, angufiska ntchitu yawu mwakuwovyeka ndi Yehova. Buku ili lo muŵerenga, likuwovyeningi kuti muyivwisi umampha nkhani yakukondwesa yeniyi. Mukondwengi kuwona kuti vo vichitikiya ŵanthu aku Chiuta mazuŵa nganu viyanana ukongwa ndi vo vachitikiyanga ateŵeti ŵaki a mu nyengu ya akutumika. Muwonengi kuti tigwira ntchitu yakuyanana yakupharazga kweniso vo vichitika mugulu lidu viyanana ndi vo vachitikanga pa nyengu yo. Kuziŵa venivi kukuwovyeningi kuti muleki kukayika kuti Yehova Chiuta walutirizga kulongozga chigaŵa cha pacharu chapasi cha gulu laki.

Titikupempheriyani ndipuso te ndi chigomezgu kuti kusambira buku la Machitidu kukuwovyeningi kuja ndi chivwanu chakukho kuti Yehova wakuwovyeningi ndi mzimu waki. Mwaviyo, buku ili likuchiskeningi kuti mulutirizgi kuchitiya ‘ukaboni wakukwaskana ndi Ufumu waku Chiuta mwakukwana,’ ndipuso kuwovya ŵanthu anyaki kuti ayambi kwenda panthowa yakuluta ku utaski.​—Machi. 28:23; 1 Timo. 4:16.