“Kuchitiya Ukaboni Mwakukwana” va Ufumu Waku Chiuta
1. Kumbi kwambiya sabata ya January 23, tazamusambira buku nili pa Sambiru la Bayibolo la Mpingu?
1 Sabata yakwambiya January 23, 2012, tazamuyamba kusambira buku la “Kuchitira Umboni Mokwanira” za Ufumu wa Mulungu pa Sambiru la Bayibolo la Mpingu. Buku ili likonkhoska buku la Machitidu mu nthowa yo yingawovya wakuŵerenga kuti wakwaskikengi ndi vakuchitika vo vikulembeka. Buku ili likulembeka mwakukonkhoska vesi lelosi cha, kweni likonkhoska fundu zo tingasambira m’buku la Machitidu ndipuso lititiwovya kuwona mo weyosi wangazigwiriskiya nchitu pa umoyu waki.—Ŵaro. 15:4.
2. Konkhoskani vinthu vinyaki vo ve m’buku la Kuchitira Umboni Mokwanira.
2 Vo ve m’Buku Ili: Mazu ngakwamba ngo nge pa peji 2 ndi kalata yachanju yakutuliya ku Wupu Wakulongozga yo yikonkhoska mo tingayanduliya ndi buku ili. Kukwamba kwa mutu wewosi kwe fundu yo yikonkhoska fundu yikulu ya mutu wo ndipuso chigaŵa cha buku la Machitidu cho patuwa nkhani yo tikambiskanengi. Mitu yinandi ye ndi mabokosi ngo ngakonkhoska mbiri ya ŵanthu, malu ndi vakuchitika. Le ndi malu ngakulu mumphepeti kuti tilembengemu fundu zidu. M’buku ili mwe vithuthuzi va vakuchitika va m’Bayibolo vo vakonkhoskeka umampha kuti vitiwovyi kuwona vakuchitika vakukhumbika m’maŵanaŵanu mwidu. Peji lakumaliya le ndi vithuthuzi ndi mazu ngakukonkhoska vakuchitika va chithuthuzi chechosi cho che m’buku ili. Mukati mwa chikonkhombi chakukwamba ndi chakukumaliya mwe mapu ngo ngangatiwovya kuwona vigaŵa vo Akhristu anyidu apharazgangaku mu nyengu ya akutumika, ŵati ayamba kupharazga uthenga wamampha “ku vigoti va panupasi.”—Machi. 1:8.
3. Kumbi ndi mafumbu ngakukhumbika ukongwa nanga ngo ngamukikengi pakusambira buku la Machitudu?
3 Limuka Mafumbu Ngakukhumbika Ukongwa: Kusambira buku la Machitidu kutiwovyengi kuti tivwisi umampha kwamuka kwa mafumbu ngakukhumbika ukongwa ngakukwaskana ndi uteŵeti wachikhristu. Mwakuyeruzgiyapu, kumbi ndi nchitu kweniso uthenga nuwu wo uziŵikiska akusambira aku Yesu Khristu chayiwu? Kumbi ndiyani yo walongozga nchitu yakupharazga pacharu chosi chapasi ndipu wachita wuli venivi? Kumbi kususkika ndi kutombozgeka kupereka mwaŵi wuli kwa ateŵeti aku Chiuta? Kumbi mzimu utuŵa utitiwovya wuli pa uteŵeti widu?
4. Kumbi tingachita wuli kuti tiziyanduwi ukongwa pakusambira buku ili?
4 Kuti muziyanduwi ukongwa pakusambira buku ili, muzinozgekengi ndi kuzimukapu pa sambiru la Bayibolo la mpingu. Muzisanirikengi pa sambiru lelosi ndi kuwona mo mungagwiriskiya nchitu vo mwasambira mu uteŵeti winu. Kusambira buku lamampha ili kwazakutiwovya kuti tichitiyi ukaboni mwakukwana va Ufumu waku Chiuta!—Machi. 28:23.