Gwiriskiyani Nchitu Mwalusu ‘Lipanga la Mzimu’
1. Nchifukwa wuli tikhumbika kusambira mo tingagwiriskiya nchitu umampha “lipanga la mzimu”?
1 Msilikali wangagwiriskiya nchitu umampha vidya vaki va nkhondu asani wakusambira ndipuso waziŵa mo wangachitiya navu. Ndimu so titenere kuchitiya asani tigwiriskiya nchitu “lipanga la mzimu” pa nkhondu yidu yakusambiza mazu ngaku Chiuta. Wakutumika Paulo wakulemba kuti: “Pamphuka kujipereka wakurumbika [kuti uje wakuzomerezgeka] kwaku Chiuta, wa mlimu wambura kukanyara [soni], wakugaŵiya kwakurunjika mazu nga uneneska wo.”—2 Tim. 2:15.
2. Kumbi nchinthu wuli cho chingatiwovya kuti ‘tikonkhoskengi mwakurunjika mazu ngauneneska’ mu uteŵeti?
2 Kumbi nchinthu wuli cho chingatiwovya kuti ‘tikonkhoskengi mwakurunjika mazu ngauneneska’ mu uteŵeti? Tikhumbika kuliziŵa umampha Bayibolo techendaluti kuchipharazga kwa ŵanthu anyaki. Ivi ving’anamuwa kuti, titenere kuvwisiska lemba pamwenga nkhani yo tikhumba kuchipharazga. Dikishonale yinyaki yikamba kuti, “mazu ngo ngaja panthazi pamwenga pavuli pa chiganizu, ndingu ngatitiwovya kuvwisa umampha vo chiganizu cho ching’anamuwa.”
3. Kumbi tikhumbika kuphwere ndi chinthu wuli asani tikonkhoska malemba?
3 ‘Kukonkhoska mwakurunjika mazu ngauneneska’ kusazgapu vinandi kuruska ŵaka kukamba mwakulondo vo Bayibolo likamba. Titenere cha kugwiriskiya nchitu Bayibolo kunyoze ŵanthu. Chinanga kuti tingagwiriskiya nchitu Malemba kuŵikiya kuvuli uneneska nge po wanguchitiya Yesu panyengu yo Diabolo wamuyesanga, Bayibolo ndi chidya chakunyoze ŵanthu wo titiŵapharazgiya cha. (Mara. 6:16; 8:3; 10:20; Mate. 4:4, 7, 10) Tikhumbika kulondo ulongozgi waku Petro wakuti: ‘Patuwani Khristu uli ndi Mbuya mu mitima yinu, ŵakunozgeka nyengu zosi kumumuka yosi wakumufumbani chifukwa cha chigomezgu chinu, kweni chitani viyo mwakuzika ndi ulemu ukuru.’—1 Pet. 3:15.
4. Kumbi ndi “malinga” wuli ngo Mazu ngaku Chiuta ngabwanganduwa? Perekani chakuyeruzgiyapu cho muziŵa.
4 Kumbi Mazu ngaku Chiuta ngangachitanji asani tingangagwiriskiya nchitu umampha? (Ŵerengani 2 Ŵakorinte 10:4, 5.) Malemba ‘ngangabwanganduwa malinga,’ kung’anamuwa kuti ngangavumbuwa visambizu vaboza, mijalidu yiheni ndipuso zeru za ŵanthu zo zilongo kuti aŵanaŵana mwakupereŵere. Tingagwiriskiya nchitu Bayibolo kumaliska maŵanaŵanu ngosi ngo ‘ngasuskana ndi kumuziŵa Chiuta.’ Bayibolo lingawovya ŵanthu kuti maŵanaŵanu ngawu ngakoliyanengi ndi uneneska.