Yeremiya Wanguleka Cha Kukamba Vakukwaskana ndi Yehova

Nyengu zinyaki ŵanthu atitinyoza pamwenga kutikwiyiya asani titiŵakambiya vakukwaskana ndi Yehova. Ivi vingatichitiska kuti tileki kukamba vakukwaskana ndi Chiuta. Kumbi nawi vikukuchitikiyapu?— Bayibolo lititikambiya kuti mnyamata munyaki yo wayanjanga Yehova wanguja kamanavi kuleka kukamba vakukwaskana ndi Yehova. Zina laki lenga Yeremiya. Tiyi tisambiri vinandi vakukwaskana ndi iyu.

Pa nyengu yo Yeremiya wenga munamana, Yehova wangumukambiya kuti watcheŵeski ŵanthu kuti aleki kuchita vinthu viheni. Ivi venga vakusuzga ukongwa kwaku Yeremiya ndipuso wenga ndi mantha. Iyu wangukambiya Yehova kuti: ‘Ndiziŵa cha vo ndingachikamba. Nde mwana ukongwa.’ Kweni Yehova wangumukambiya kuti: ‘Ungawopanga cha. Ndikuwovyengi.’

Mwaviyo, Yeremiya wangwamba kutcheŵeska ŵanthu kuti alangikengi asani alekengi kusintha. Kumbi uŵanaŵana kuti ŵanthu anguchita vo Yeremiya wangukamba?— Awa. Yiwu amunyozanga kweniso amukwiyiyanga. Anyaki akhumbanga kumubaya! Kumbi uŵanaŵana kuti Yeremiya wavwanga wuli?— Wenga ndi mantha ndipu wangukamba kuti: ‘Ndaleke penapa kukamba vakukwaskana ndi Yehova.’ Kumbi wanguleka nadi?— Awa, wanguleka cha. iyu wamuyanjanga ukongwa Yehova mwakuti watingi walekengi cha kukamba vakukwaskana ndi iyu. Ndipuso chifukwa chakuti Yeremiya wanguleka cha, Yehova wangumuvikiliya.

Mwakuyeruzgiyapu, nyengu yinyaki ŵanthu ankhaza anguponya Yeremiya mu chisimi cha vimaulambwi. Wengavi chakurya chechosi chinanga ndi maji viyo. Ŵanthu yaŵa akhumbanga kuti Yeremiya wafwiyi mwenimo. Kweni Yehova wangumutaska!

Kumbi ungasambiranji kwaku Yeremiya?— Chinanga kuti nyengu zinyaki wachitanga mantha, iyu wanguleka cha kukamba vakukwaskana ndi Yehova. Asani ukamba vakukwaskana ndi Yehova, ŵanthu angakunyoza pamwenga kukukwiyiya. Nyengu zinyaki ungachita soni pamwenga mantha. Kweni ungalekanga cha kukamba vakukwaskana ndi Yehova. Nyengu zosi, iyu wakuwovyengi nge mo wanguwovye Yeremiya.