Yehova Wangutuma Yeremiya Kuti Wakapharazgi

Yehova wangusankha Yeremiya kuti waje mchimi wa Ayuda. Iyu wangumukambiya kuti wapharazgiyi ŵanthu ndi kuŵatcheŵeska kuti aleki kuchita vinthu viheni. Yeremiya wanguti: ‘Yehova ini ndeche munamana. Ndiziŵa cha mo ndingakambiskiyana ndi ŵanthu.’ Yehova wangumukambiya kuti: ‘Ungachitanga mantha cha. Ndakukukambiya vakuti ukakambi. Ndakukuwovya.’

Yehova wangukambiya Yeremiya kuti wawunganiski ŵara ŵa Ayuda ndipu waphwanyi chiŵiya panthazi pawu ndi kukamba kuti: ‘Yerusalemu wazamuphwanyika nge chiŵiya chenichi.’ Yeremiya wati wachita vo Yehova wangumukambiya, ŵara wo angukwiya ukongwa. Wasembi munyaki zina laki Pasuri, wangupuma Yeremiya ndipu angutolo chithabwa ndikuserezamu manja ndi malundi ngaki. Usiku wosi Yeremiya wanguja po angumumangiliya. Pasuri wati wamufwatuwa ndi mlenji, Yeremiya wanguti: ‘Ndifiskengi cha. Ndilekengi kupharazga.’ Kumbi wanguleka nadi? Awa. Iyu wati wayiŵanaŵaniya ukongwa ntchitu iyi, wanguti: ‘Uthenga waku Yehova wenge motu mumtima wangu. Ndilekengi cha kupharazga.’ Yeremiya wangulutirizga kutcheŵeska ŵanthu.

Pati pajumpha vyaka, fumu yinyaki yingwamba kulamuliya Yuda. Asembi ndi achimi aboza anguwutinkha uthenga wo Yeremiya wapharazganga. Yiwu angukambiya alongozgi kuti: ‘Munthu uyu wakhumbika kubayika.’ Yeremiya wangukamba kuti: ‘Asani mubayengi ini, mubayengi munthu wambula kunanga. Ndilongoro mazu ngangu cha kweni ngaku Yehova.’ Alongozgi wo ŵati ŵavwa ivi, anguti: ‘Munthu uyu watenere kubayika cha.’

Yeremiya wangulutirizga kupharazga ndipu alongozgi angukwiya ukongwa. Yiwu angupempha fumu kuti yibayi Yeremiya. Fumu yinguŵakambiya kuti achiti chechosi cho akhumba ndi Yeremiya. Yiwu anguko Yeremiya ndikumuponya muchisimi chitali cho chenga ndi vimawulambwi ndipu aŵanaŵananga kuti wafwiyengi mwenimo. Yeremiya wangwamba kubira mu vimawulambwi.

Mura wa munyumba ya fumu zina laki Ebedi-meleki, wangukambiya fumu kuti: ‘Alongozgi aponya Yeremiya muchisimi. Asani timulekengi mwenimo, wafwengi.’ Fumu yingulamula Ebedi-meleki kuti wadani ŵanthu aluti nayu kuchisimi akatuzgi Yeremiya. Kumbi nasi tikhumbika cha kuja nge Yeremiya yo wanguzomereza cha kuti chechosi chimutondekesi kupharazga?