Ataya Mwaŵi Wakuja mu Paradayisu

CHIUTA wangulenga angelu ndipu pati pajumpha nyengu yitali wangulenga ŵanthu. M’ngelu wakugaruka yo wanguziŵika kuti Satana Diabolo, wangwesesa mwakuchenje kunyenga Eva mu munda wa Edene, kuti waryi chipasu cha m’chimiti chimoza cho Chiuta wangumukaniza kurya.

Mwakupangisa njoka kuti yilongoro, Satana wangulongo kuti Chiuta wanolanga Eva ndi murumu waki chinthu chinyaki chamampha ukongwa. M’ngelu yo, wangukambiya Eva kuti iyu ndi murumu waki afwengi cha asani angarya chipasu cho angukanizika. Iyu wangumba mulandu Chiuta wakuti wapusikanga ŵana ŵaki a pacharu chapasi. Satana wanguŵachitisa kuti aleki kuvwiya Chiuta, ndipu wanguwona kuti iyi yenga nthowa yamampha yakuti aziŵiyi vinthu vinandi ndipuso aje ndi wanangwa. Kweni ili lenga boza, ndipu lenga boza lakwamba lo lenga lechendakambikepu pacharu chosi. Fundu yikulu pa nkhani yakukwasana ndi muwusu waku Chiuta njakuti, kumbi Chiuta ngwakwenere kuwusa nadi pamwenga kumbi wawusa munthowa yamampha yakuti ŵanthu waki akondweseka ndi muwusu waki?

Eva wangugomezga boza lo Satana wangukamba. Iyu wangwamba kukhumbira chipasu ndipu wangurya. Pavuli paki, wangupaska murumu waki ndipu nayu wangurya. Ivi vingupangisa kuti abudi. Chinanga kurya chipasu kunguwoneka kuti yenga nkhani yimana kweni kwenga kugaruka. Chifukwa chakuti angusankha kuleka kuvwiya marangu ngaku Chiuta mwadala, Adamu ndi Eva angukana muwusu wa Mulengi yo wanguŵapaska chechosi kusazgapu umoyu wamuyaya.

Chiuta wangupereka cheruzgu ku ŵanthu akugaruka yaŵa chifukwa cha vo anguchita. Iyu wangukambiya limu za Mtaski pamwenga Mphapu yakulayizgika yo yatingi yizinangengi Satana, yo wamiya njoka. Chiuta wangusweresa kuzisa cheruzgu cha nyifwa paku Adamu ndi Eva chifukwa wakhumbanga kulongo lisungu ku ŵana wo atingi azibalengi. Ŵana wo atingi ajengi ndi chilindizga chifukwa cha munthu yo Chiuta ŵatingi watumengi kuti wazimaliski masuzgu ngosi ngo nganguza chifukwa cha kugaruka ko kunguchitika mu Edene. Mo chilatu chaku Chiuta chatingi chifiskikiyengi, chakukwaskana ndi Mtaski wa munthazi kweniso yo watingi watumikengi, vatingi viziŵikengi kamanakamana panyengu yo Bayibolu lalembekanga.

Chiuta wangudikiska Adamu ndi Eva mu Paradayisu. Yiwu akhumbikanga kuti asuzgiki kuti alimi ndi kusaniya vakurya kubwalu kwa munda wa Edene. Pavuli paki, Eva wenga ndi nthumbu ndipu wangubala mwana zina laki Kaini, uyu wenga mwana wakwamba waku Adamu ndi Eva. Adamu ndi Eva angubala so ŵana anthurumi ndi anthukazi, kusazgapu Abelu ndi Sete, ko kungutuliya apapi aku Nowa.

​—⁠Nkhani iyi yatuliya pa Chiyambo chaputala 3 mpaka 5; Chivumbuzi 12:⁠9.