SAMBIRU 3
Adamu ndi Heva Anguvwiya Chiuta Cha
Zuŵa linyaki Heva wenga yija ndipu njoka yingulongoro nayu. Yingukamba kuti: ‘Kumbi mbuneneska kuti Chiuta wakukamba kuti mungaryanga cha vipasu va muchimiti chechosi cha mumunda uwu?’ Heva wangumuka kuti: ‘Tingarya vipasu va muvimiti vosi kupatuwaku chimoza pe. Asani tingarya chipasu cha muchimiti chenichi, tifwengi.’ Njoka yingukamba kuti: ‘Mufwengi cha. Pakuti Chiuta waziŵa kuti pa zuŵa lo mwazamuryiya vipasu va muchimiti cho, masu nginu ngazamujulika ndipu mwazamuyanana ndi Chiuta.’ Kumbi vo njoka yingukamba venga vauneneska? Awa, venga vaboza kweni Heva wanguvigomezga. Chifukwa chakuti Heva wachileresanga kaŵikaŵi chipasu cho, vinguchitisa kuti wachikhumbirengi ukongwa. Iyu wangurya chipasu cho ndipu wangupasaku so Adamu. Adamu waziŵanga kuti afwengi asani angaleka kuvwiya Chiuta kweni wangurya.
Zuŵa lenilo anguryiya, Yehova wangulongoro nawu. Iyu wanguŵafumba chifukwa cho anguleke kuvwiya. Heva wangumba mulandu njoka ndipu Adamu wangumba mulandu Heva. Yehova wangudikisa Adamu ndi Heva mumunda wa Edeni chifukwa chakuleka kuvwiya. Kuti yiwu aleki kuweliyamu, Yehova wanguŵika angelu pa khomu la munda wo ndipuso lipanga lo lanyekanga motu.
Yehova wangukamba so kuti walangengi yo wangukamba boza kwaku Heva. Yenga njoka cha yo yingulongoro ndi Heva. Yehova wangupanga njoka mu nthowa yakuti zilongorongi cha. Mungelu muheni ndiyu wanguchitisa kuti njoka yilongoro. Iyu wanguchita ivi kuti wapusisi Heva. Mungelu mwenuyu wadanika kuti Satana Dyaboli. Kunthazi, Yehova wazamubaya Satana kuti wazileki kupusisa ŵanthu kuti azichitengi vinthu viheni.
“Dyaboli . . . wenga wakubaya ŵanthu kwamba pakwamba, ndipu wakumapu cha mu uneneska, chifukwa mwaku iyu mulivi uneneska.”—Yohane 8:44