Chiuta Watumbika Abrahamu ndi Banja Laki

YEHOVA wanguziŵa kuti Mwana waki wakwanjiwa wazamusuzgika ndipu zuŵa linyaki wazamukufwa. Uchimi wo ukulembeka pa lemba la Chiyambo 3:​15, ulongo chithuthuzi cha nkhani yeniyi. Kumbi Chiuta wangulongo ŵanthu mo nyifwa ya mwana waki wakwanjiwa yingumukwaskiya? Bayibolu lipereka chakuyeruzgiyapu cha vo vinguchitikiya munthu munyaki ndi mwana waki. Chiuta wangupempha Abrahamu kuti wapereki sembi mwana waki wakwanjiwa Yisaki.

Abrahamu wenga ndi chigomezgu chakukho. Kumbukani kuti Chiuta wangulayizga Abrahamu kuti Mtaski pamwenga Mphapu yo yingukambika yatingi yituliyengi mwaku Yisaki. Abrahamu wangugomezga kuti Chiuta watingi wayuskengi Yisaki, asani wangakhumba ndipu ivi vingumuchitisa Abrahamu kuvwiya ndi kukhumba kupereka sembi mwana waki yumoza pe. Kweni m’ngelu wakutuliya kwaku Chiuta, wangukaniza Abrahamu panyengu yo wakhumbanga kubaya mwana waki. Chiuta wangumuwonga Abrahamu chifukwa chakukhumbisiska kupereka mwana waki wakwanjiwa ukongwa ndipu wanguwerezga so kumulayizga munthu wakugomezgeka, Abrahamu.

Pavuli paki Yisaki wangubala ŵana anthurumi ŵaŵi, Esau ndi Yakobe. Mwakupambana ndi Esau, Yakobe wangutumbika vinthu vakupatulika ndipu wangupaskika mphotu. Chiuta wangusintha zina laku Yakobe kuja Yisraele ndipu ŵana ŵaki 12 ŵenga alongozgi a mafuku nga Yisraele. Sonu kumbi banja lenili lingusambuka wuli mtundu ukulu?

Vinthu vakupambanapambana vingwamba kuchitika panyengu yo ŵana anyaki angwamba kumuchitiya sanji muvurwa wawu Yosefe. Yiwu angumuguliska nge kapolu ndipu wangutoreke ku Egipiti. Kweni Chiuta wangumutumbika m’nyamata wakugomezgeka mweneyu kweniso wachiganga. Chinanga kuti Yosefe wangukumana ndi masuzgu ngakulu kweni pavuli paki Farao yo wawusanga mu Egipiti, wangumusankha ndipu wangumupaska udindu ukulu. Ivi vinguchitika panyengu yaki chifukwa chakuti kwawu kwenga nja ndipu Yakobe wangutuma ŵana ŵaki anyaki kuti akaguli chakurya ku Egipiti, panyengu iyi Yosefe ndiyu wenga ndi udindu wakuwonere vakurya. Wati wakumana mwamabuchibuchi ndi abali ŵaki wo angulongo mtima wakulapa, Yosefe wanguŵagowoke ndipu wangunozga kuti banja losi lisamukiyi ku Egipiti. Yiwu angupaskika malu ngakulu ndipuso ngamampha kuti alutirizgi kuyandana ndipuso kuja ndi umoyu wamampha. Yosefe wanguziŵa kuti Chiuta ndiyu wangunozga kuti vinthu ivi vichitiki ndi chilatu chakuti wafiski malayizgu Ngaki.

Yakobe yo wenga wakukota wanguja umoyu waki wosi ku Egipiti, pamoza ndi banja laki. Iyu weche ndafwi, wangukambiya limu kuti Mphapu yakulayizgika pamwenga Mtaski, wazamuja Wakuwusa wa nthazi yo wazamuwiya m’banja la mwana waki munthurumi Yuda. Pati pajumpha vyaka, Yosefe wechendafwi, iyu wangukambiya limu kuti zuŵa linyaki Chiuta wazamutuzga banja laku Yakobe mu Egipiti.

​—⁠Nkhani iyi yatuliya pa Chiyambo chaputala 20 mpaka 50; Ŵahebere 11:​17-22.