Yesu Ngwamoyu!

PAZUŴA lachitatu kutuliya po Yesu wangufwiya, anthukazi anyaki wo ŵenga akulondo ŵaki anguwona kuti mwa wo angujaliya pa muwunda watuzgikapu. Ndipu anguwona so kuti muwunda wenga mwazi.

Angelu ŵaŵi anguza ndipu yumoza wangukamba kuti: “Mupenja Yesu waku Nazarete. Wayuka.” (Marko 16:⁠6) Mwaliŵiliŵi, anthukazi wo angutchimbiya kuchikambiya akutumika. Ŵe munthowa, angukumana ndi Yesu. Iyu wangukamba kuti: “Mungopanga cha, kaninga, katauliyeni abali ŵangu kuti ŵakenge ku Galile, ndiko ŵamukundiwona.”​—⁠Mateyu 28:⁠10.

Ndi musana pa zuŵa lenilo pe, akusambira ŵaki ŵaŵi atuwanga ku Yerusalemu kuluta ku Emause. Munthu wachilendu wangwamba kwenda nawu ndipu wanguŵafumba vo akambiskananga. Munthu yo wenga Yesu yo wanguyukisika, iyu wanguwoneka mwachilendu ndichu chifukwa chaki anguleka kumuziŵa pakwamba. Yiwu angumuka mwachitima kuti akambiskananga zaku Yesu. Munthu yo wangwamba kukonkhoska vinthu vosi vakukwaskana ndi Mesiya vo venga m’Malemba. Mbuneneska nadi kuti Yesu wangufiska mauchimi ngosi ngakukwaskana ndi Mesiya.a Akusambira ŵaki ŵati aziŵa kuti munthu yo ayendanga nayu wenga Yesu, yo wanguyukisika nge mzimu angumuwona so cha ko wanguluta.

Akusambira ŵaŵi wo Yesu wangukumana nawu anguwerere ku Yerusalemu. Yiwu anguchisaniya kuti akutumika aungana mu chipinda. Pa nyengu yo yiwu akonkhoskanga vo angukumana navu, Yesu wangufika. Akumulondo ŵaki awonekanga akuzizwa chifukwa angugomezga cha kuti vingachitika. Yesu wangufumba kuti: ‘Nchifukwa wuli mukayikiya mu mtima mwinu?’ ndipu wangukamba kuti: “Kwalembeka kuti Khristu wakomwe, ndi wayuke so ku ŵakufwa pazuŵa lachitatu.”​—⁠Luka 24:​38, 46.

Pati pajumpha mazuŵa 40 kutuliya po wanguyukiya, Yesu wanguwoneke kwa akusambira ŵaki pa chakuchitika chinyaki. Pa nyengu yinyaki wanguwoneke ku ŵanthu akujumpha 500. Pa nyengu yeniyi, watenere kuti wanguŵapaska nchitu yikulu. Iyu wangukamba kuti: ‘Rutani, sambizani mitundu yosi, ndi kuŵasambiza kusunga vosi vo ndalanguliya imwi. Ndipu onani, ini nde namwi mazuŵa ngosi mpaka ku umaliru wa mgonezi wo.’​—⁠Mateyu 28:​19, 20.

Pa nyengu yakumaliya yo wangukumana ndi akutumika ŵaki akugomezgeka 11, Yesu wanguŵalayizga kuti: Murondiyengi nthazi asani waza “paku imwe Mzimu Wakupaturika, ndipo mundiŵiyenge ŵakaboni . . . ku vigoti vya panupasi.” (Machitidu 1:⁠8) Pavuli paki Yesu wangwamba kukwere kuchanya, ndipu wangubisika ndi mitambu ndipu akusambira waki angumuwona so cha.

​—⁠Nkhani iyi yatuliya pa Mateyu chaputala 28; Marko chaputala 16; Luka chaputala 24; Yohane chaputala 20 ndi 21; 1 Ŵakorinte 15:​5, 6.